অৱশেষত অসমবাসীৰ ওচৰত ক্ষমা প্ৰাৰ্থনা কৰিলে হুণ্ডাই কৰ্তৃপক্ষই। কালি ঋষভ হিম্মতসিংকাক গ্ৰেপ্তাৰ কৰাৰ পিছতে হিম্মতসিংকা পৰিয়ালে গুৱাহাটীত আজি সংবাদমেলৰ আয়োজন কৰে।
ঋষভৰ মাতৃ কবিতা হিম্মতসিংকাই হৈ যোৱা ঘটনাটোক দুৰ্ভাগ্যজনক বুলি আখ্যা দিয়ে। ‘ঋষভৰ ব্যৱহাৰৰ বাবে আমি ক্ষমাপ্ৰাৰ্থী’– এই বুলি মন্তব্য কৰে ঋষভ হিম্মতসিংকাৰ মাকগৰাকীয়ে।
সংবাদমেলত ঋষভৰ ভ্ৰাতৃ নীতিন হিম্মতসিংকা আৰু শ্ব’ ৰূমটোৰ প্ৰবন্ধক ধীৰাজ দাস কাশ্যপেও অংশগ্ৰহণ কৰে।
উল্লেখযোগ্য যে হিম্মতসিংকাৰ গণেশগুৰিস্থিত হুণ্ডাই শ্ব’ৰূমৰ এগৰাকী কৰ্মচাৰীক ঋষভে দুৰ্ব্যৱহাৰ কৰাৰ অভিযোগৰ পিছত ৰাজ্যজুৰি বিৰূপ প্ৰতিক্ৰিয়াৰ সৃষ্টি হয় আৰু হিম্মতসিংকা কৰ্তৃপক্ষক ৰাজহুৱাভাৱে ক্ষমা খোজাৰ দাবী তোলে বিভিন্ন পক্ষই।
ইয়াৰ পিছতে সংবাদমেলৰ আয়োজন কৰি অসমবাসীৰ ওচৰত ক্ষমা প্ৰাৰ্থনা বিচাৰিছে হিম্মতসিংকা পৰিয়ালে।
আনহাতে, প্ৰতিষ্ঠানৰ কৰ্মচাৰীক শাৰীৰিকভাৱে অপদস্থ কৰা মুকেশ হুণ্ডাইৰ স্বত্বাধিকাৰী ঋষভ হিম্মৎসিংকাক দেওবাৰে দিচপুৰ আৰক্ষীয়ে গ্ৰেপ্তাৰ কৰি আদালতত হাজিৰ কৰোৱাৰ পিছত আদালতে অভিযুক্ত ঋষভক ১৪ দিনৰ ন্যায়িক জিম্মালৈ প্ৰেৰণ কৰে।
দিচপুৰ আৰক্ষীয়ে জনোৱামতে হিম্মৎসিংকাক তেওঁৰ বিৰুদ্ধে থানাখনত ৰুজু হোৱা দুটা গোচৰৰ অধীনত গ্ৰেপ্তাৰ কৰা হৈছে। তাৰে এটা ঘটনাৰ পিছদিনা, অৰ্থাৎ ৫ জুলাইত অৰ্কিড ইণ্ডিয়াই (No 1864/18) দিয়া আৰু আনহাটো গোচৰ (No 1894/18) ভুক্তভোগী কমল দাসে ৭ জুলাইত দিয়া।
মন কৰিব লগীয়া যে উক্ত ঘটনাটোত গণেশগুৰিস্থিত মুকেশ হুণ্ডাইত কৰ্মৰত এজন কৰ্মচাৰীক স্বত্বাধিকাৰী ঋষভ হিম্মৎসিংকাই সামান্য দোষতে কাণত ধৰাই আঁঠু কঢ়াই থৈছিল। ইয়াৰ ভিডিঅ’ আৰু আলোকচিত্ৰ ছ’চিয়েল মিডিয়াত ভাইৰেল হৈ পৰাত কথাটো সকলোৰে মাজত প্ৰচাৰ হৈ যায় আৰু ব্যাপক প্ৰতিক্ৰিয়াৰ সৃষ্টি হয়। ঘটনাটো ৰাজহুৱা হোৱাৰ লগে লগে বিভিন্ন দল-সংগঠনে গণেশগুৰিস্থিত মুকেশ হুণ্ডাইৰ সন্মুখত প্ৰতিবাদ সাব্যস্ত কৰাৰ লগতে ঋষভ হিম্মৎসিংকাৰ বিৰুদ্ধে একাধিক গোচৰ ৰুজু হৈছিল দিচপুৰ থানাত।
