অসমৰ এয়েৰচে’ল গ্ৰাহকসকলৰ বাবে সুখবৰ কঢ়িয়াই সেৱা বন্ধ কৰা কোম্পানিটোক চলিত বছৰৰ ১৫ এপ্ৰিললৈকে গ্ৰাহকসকলক ম’বাইল নম্বৰ প’ৰ্টেবিলিটি (MNP)ৰ সুবিধা প্ৰদান কৰিবলৈ নিৰ্দেশ দিছে ভাৰতীয় টেলিকম নিয়ামক কৰ্তৃপক্ষ(TRAI)ই।
‘কমেও ৯০ দিন (তিনি মাহ)’ এয়েৰচে’ল নে’টৱৰ্ক ব্যৱহাৰ কৰা কোনো নম্বৰৰ গ্ৰাহককে একেটা নম্বৰতে অইন কোম্পানিৰ সেৱা ল’ব পৰাকৈ য়ুনিক প’ৰ্ট ক’দ (UPC) যোগান ধৰাৰ বাবে ত্ৰায়ে কোম্পানিটোক মঙলবাৰে নিৰ্দেশ দিছে।
নিজৰ ম’বাইল নম্বৰ প’ৰ্ট কৰিব খোজা সকলো অনুৰোধ ৰাখিবৰ বাবে কোম্পানিটোক নিৰ্দেশ দি কোৱা হৈছে যে ‘এই নিৰ্দেশ জাৰি কৰাৰ পূৰ্বে দিয়া এই দিনটোত বৈধ হৈ থকা সকলো য়ুনিক প’ৰ্ট ক’ড (UPC) ২০১৮ চনৰ ১৫ এপ্ৰিলৰ ২৩-৫৯-৫৯ বজালৈকে বৈধ হৈ থাকিব।’
অসম আৰু উত্তৰ-পূৰ্বাঞ্চলৰ উপৰি এয়েৰচে’ল দিশ্বনে’ট ৱায়াৰলে’ছৰ অনুজ্ঞাপত্ৰ থকা দেশৰ বাকী এলেকাসমূহতো গ্ৰাহকসকলে এই সুবিধা পাব।
এয়েৰ্চে’ল গ্ৰুপে ট্ৰাইক যোৱা ২২ ফেব্ৰুৱাৰিত জনাইছিল যে গভীৰ বিত্তীয় হেঁচাৰ বাবে তেওঁলোকে ৩১ জানুৱাৰি, ২০১৮ৰ পৰা ছটা এলেকাত তেওঁলোকৰ সেৱা বন্ধ কৰিব লগা হৈছে।
কোম্পানিটোৰ সেৱা বন্ধ হোৱাৰ ফলত অসমৰ গাঁৱে-চহৰে এয়েৰচে’লৰ হাজাৰ-বিজাৰ গ্ৰাহকৰ মাজত হাহাকাৰৰ সৃষ্টি হৈছে। সৰু-সুৰা ঠাইসমূহতো নিজৰ নম্বৰ প’ৰ্ট কৰাৰ বাবে দৈনন্দিন কাম-কাজ এৰি গ্ৰাহকসকলে দীঘলীয়া শাৰী পতা দেখা গৈছে।
