দুৰ্নীতিমুক্ত প্রশাসন চলোৱা বুলি অসম চৰকাৰে কৰি অহা বৰ বৰ দাবী গোকাট মিছা। অসমত এতিয়াও চলি আছে ‘ধনৰ বিনিময়ত চাকৰিৰ’ বেহা।
আগৰ চৰকাৰখনৰ দিনত সংঘটিত অসম লোকসেৱা আয়োগৰ ‘ধনৰ বিনিময়ত চাকৰি’ৰ কুখ্যাত কেলেংকাৰি ফাদিল হোৱাৰ পিছত, এইখন চৰকাৰৰ দিনতো পঞ্চায়ত আৰু গ্ৰামোন্নয়ন বিভাগৰ একাংশ বিষয়া একে ধৰণৰ এটা বৃহৎ কেলেংকাৰিত জড়িত হৈ থকা বুলি গম পোৱা গৈছে।
নৰ্থ-ইষ্ট নাও-ৰ এক বিশদ তদন্তই পোহৰলৈ আনিছে এই বিষয়াৰ চক্ৰটো, যি নিজৰ পদবীৰ ব্যৱহাৰ কৰি প্ৰভাৱশালী লোকৰ ঘনিষ্ঠ বা চাকৰিৰ বাবে ধন দিয়া বৃ্হৎ সংখ্যক প্ৰাৰ্থীৰ নিযুক্তি নিশ্চিত কৰিছে বিভাগটোত।
উল্লেখযোগ্য যে পঞ্চায়ত আৰু গ্ৰামোন্নয়ন বিভাগৰ ৯৪৫টা পদৰ বাবে ৰাজ্যজুৰি যোৱা ২০ মে’ত সংযুক্ত প্ৰতিযোগিতামূলক পৰীক্ষাৰ লিখিত পৰীক্ষা অনুষ্ঠিত হৈছিল। প্ৰায় ১.৮ লাখ প্ৰাৰ্থী এই পৰীক্ষাত অৱতীৰ্ণ হৈছিল।
অসম চৰকাৰে পৰীক্ষা পৰিচালনাৰ দায়িত্ব দিছিল ব্লুম ইলেক্ট্ৰনিকছ (Bloom Electronics) নামৰ দক্ষিণ ভাৰতৰ এটা কোম্পানিক। পৰৱৰ্তী সময়ত ব্লুমে গুৱাহাটীৰ এটা কোম্পানিক ৰাজ্যজুৰি এই পৰীক্ষা পৰিচালনাৰ দায়িত্ব দিয়ে।
কিন্তু পৰীক্ষাটো অনুষ্ঠিত কৰাত ব্যাপক খেলিমেলি হোৱা বুলি হৈ চৈ লাগিছিল। কোনোটো পৰীক্ষা কেন্দ্ৰত যদি পৰীক্ষাৰ প্ৰশ্নকাকতৰ নাটনি হৈছিল, কোনোটোত আকৌ প্ৰশ্নকাকত পলমকৈ পাইছিল। আন কিছুমান ঠাইত প্ৰশ্নকাকতৰ প্ৰশ্নবোৰ আগতেই ছ’চিয়েল মিডিয়া, বিশেষকৈ হোৱাটছএপৰ গ্ৰুপত আগতেই ফাদিল হৈ গৈছিল। আনকি বিতৰণৰ আগতে প্ৰশ্নকাকতৰ টোপোলাত ছীল মৰা হোৱা নাছিল।
তাৰ পিছতে ক্ষুভিত প্ৰাৰ্থীসকলে গুৱাহাটীৰ পাঞ্জাবাৰীস্থিত পঞ্চায়ত আৰু গ্ৰামোন্নয়নৰ কাৰ্য্যালয়ৰ সন্মুখত প্ৰতিবাদ কৰিছিল। যদিও বিভাগীয় মন্ত্ৰী নৱ দলেই পৰীক্ষা সুকলমে হোৱা বুলি দাবী কৰিছিল, পিছত চৰকাৰৰ নিৰ্দেশত ৰাজ্যৰ চোৰাংচোৱা বিভাগে ইয়াৰ এটা তদন্ত চলায়। আনহাতে বিষয়টো ন্যায়ালয় পোৱাত পৰীক্ষাটোৰ ফলাফল ঘোষণা নকৰিবলৈ নিৰ্দেশ দিছিল গুৱাহাটী উচ্চ ন্যায়ালয়ে।
কিন্তু নৰ্থ-ইষ্ট নাও-ৰ তদন্তত ফাদিল হৈছে যে গুৰুত্বপূৰ্ণ পৰীক্ষাটোৰ প্ৰশ্নকাকত প্ৰস্তুতিৰ পৰ্য্যায়তে সমগ্ৰ দুৰ্নীতিৰ প্ৰক্ৰিয়াটো আৰম্ভ হৈছিল। মন কৰিব লগীয়া যে অসম চৰকাৰে বিভাগটোৰ দায়িত্বৰ পৰা অতিৰিক্ত মুখ্য সচিব এম জি ভি কে ভানুক আঁতৰাই ঘটনাটো গাপ দিয়াৰ বাবে চেষ্টা কৰে।
কিন্তু ভানুৰ অপসাৰণেই বিষয়টোৰ সমাধান নে? বিষয়টোৱে পৰীক্ষা ব্যৱস্থাটোৰ নিখুঁততাৰ ওপৰতে এলানি প্ৰশ্নৰ অৱতাৰণা কৰিছে। প্ৰথমতে, প্ৰশ্নকাকত কটা লোকসকলক কিহৰ ভিত্তিত বাছনি কৰা হৈছিল? দ্বিতীয়তে, এই প্ৰশ্নকাকত যুগুতোৱা লোকসকল যে আন এটা ‘ধনৰ বিনিময়ত চাকৰি’ কেলেংকাৰিত জড়িত নহ’ব সেইটো কিদৰে নিশ্চিত কৰিছিল?
তৃতীয়তে, কিয় প্ৰশ্নসমূহ নিৰ্দিষ্ট তিনিটা ৱে’বছাইটৰ পৰা লোৱা হৈছিল? নৰ্থ-ইষ্ট নাও-ৰ তদন্তত পোৱা গৈছে যে প্ৰশ্নসমূহ www.onlinetyari.com, www.competoid.com আৰু www.brainly.in নামৰ ৱে’বছাইটকেইটাৰ পৰা কপি কৰা হৈছিল।
এইটো দেখাতেই প্ৰমাণ হয় যে ঘাইকৈ একাংশ প্ৰাৰ্থীৰ বাবে সংযুক্ত প্ৰতিযোগিতামূলক পৰীক্ষাটো সহজ কৰি তুলিবৰ বাবেই এই ৱে’বছাইট তিনিটাৰ পৰা প্ৰশ্নসমূহ কটা হৈছিল। কিন্তু বিষয়টো সন্দৰ্ভত মুখ খুলিব নোখোজে বিভাগটোৰ বিষয়াসকলে। যুটীয়া সঞ্চালক তথা পৰীক্ষাটোৰ নিয়ন্ত্ৰক এছ এ’ লস্কৰৰ সৈতে নৰ্থ-ইষ্ট নাও-এ যোগাযোগ কৰাত তেওঁ ব্লুম ইলেক্ট্ৰনিকছৰ স্থানীয় সহযোগীৰ নাম জনাবলৈ অস্বীকাৰ কৰে।
“বিষয়টোক লৈ মই একো ক’ব নোৱাৰো। আমাক নক’বলৈ কোৱা হৈছে,” বুলি মন্তব্য কৰি লস্কৰে আৰু কয়, “যদি আয়ুক্তই অনুমতি দিয়ে, তেন্তে এই বিষয়ত মই আপোনাক তথ্য দিব পাৰিম। আমি ব্লুম ইলেক্ট্ৰনিকছৰ কোনো কৰ্মচাৰীক চিনি নাপাওঁ। আমি তেওঁলোকৰ তামিলনাডুৰ কাৰ্য্যালয়ৰ লগত পোনপটীয়াকৈ যোগাযোগ কৰিছিলো।”
লস্কৰে কোম্পানিটোৰ কাকো চিনি নাপাওঁ বুলি কোৱাটো আশ্চৰ্য্যজনক।
কেইটামান নিৰ্দিষ্ট ৱে’বছাইটৰ পৰাহে কিয় এনেহেন গুৰুত্বপূৰ্ণ পৰীক্ষাটোৰ বাবে প্ৰশ্ন কটা হৈছিল জানিবলৈ বিচৰাত লস্কৰে এই সন্দৰ্ভত নিজৰ অজ্ঞতা প্ৰকাশ কৰে। যেতিয়া এই ৱে’বছাইটসমূহৰ পৰা লোৱা প্ৰশ্নসমূহৰ বিশদ তথ্য নৰ্থ-ইষ্ট নাও-ৰ হাতত আছে বুলি কোৱা হ’ল, তেতিয়া তেওঁৰ পৰা উত্তৰ পাবলৈ হ’লে আৰ টি আইৰ অধীনত আৱেদন কৰিবলৈ কয় যুটীয়া সঞ্চালকজনে।
“আমাৰ তদন্ত চলি আছে। আপুনি যদি কিবা জানিব খুজিছে, আৰ টি আই কৰক,” এয়ে আছিল তেওঁৰ উত্তৰ।
উল্লেখযোগ্য যে পৰীক্ষাটোৰ প্ৰশ্নকাকত ফাদিল কৰাৰ অভিযোগত ধুবুৰী আৰক্ষীয়ে যোৱা ২১ জুনত ২গৰাকী লোকক গ্ৰেপ্তাৰ কৰিছিল।
এই অভিযুক্ত দুজন আছিল ক্ৰমে ৰূপালী সাহা আৰু চাবিৰা খাটুন আৰু এওঁলোকক এটা পৰীক্ষা কেন্দ্ৰৰ ভাৰপ্ৰাপ্ত বিষয়াৰ অভিযোগ পাই গ্ৰেপ্তাৰ কৰা হৈছিল। চাবিৰা ধুবুৰী চহৰৰ বাসিন্দা হোৱাৰ বিপৰীতে ৰূপালী গোলকগঞ্জ চহৰৰ বাসিন্দা।
ধুবুৰী চহৰৰ বিদ্যাপাৰা ল’ৰা উচ্চতৰ মাধ্যমিক বিদ্যালয়ৰ পৰীক্ষা কেন্দ্ৰৰ ভাৰপ্ৰাপ্ত বিষয়াই আৰক্ষীক এই দুগৰাকী প্ৰাৰ্থীৰ সন্দেহজনক কাৰ্য্যকলাপ সম্বন্ধে জনাইছিল। অভিযোগ অনুসৰি এই দুগৰাকী প্ৰাৰ্থীয়ে পৰীক্ষা কেন্দ্ৰত ম’বাইল ফ’ন ব্যৱহাৰ কৰিছিল আৰু প্ৰশ্ন কাকতৰ ফট’ মাৰি পৰীক্ষা চলি থকা অৱস্থাতে হোৱাটছএপত বিয়পাই দিছিল।
এই সন্দৰ্ভত ভাৰতীয় দণ্ডবিধিৰ সংশ্লিষ্ট ধাৰাৰ অধীনত ধুবুৰী আৰক্ষী থানাত এটা গোচৰ (৬৪৬/ ২০১৮) ৰুজু কৰা হৈছিল।
