ওদালগুৰিত জিলা পৰ্যায়ৰ দুদিনীয়া ক্ৰীড়া সমাৰোহৰ সামৰণি

জেহালো দৈমালু ৱুশ্বু মাৰ্চিয়েল স্প’ৰ্টছ ক্লাৱে ভাৰত চৰকাৰৰ ক্ৰীড়া আৰু যুৱ কল্যাণ মন্ত্ৰ্যালয়ৰ অধীনৰ নেহৰু যুৱ কেন্দ্ৰৰ সহযোগত ওদালগুৰি ষ্টেডিয়ামত আয়োজন কৰা ওদালগুৰি জিলা পৰ্যায়ৰ দুদিনীয়া ক্ৰীড়া সমাৰোহৰ বৃহস্পতিবাৰে সামৰণি পৰে।

ক্ৰীড়া সমাৰোহখনত আয়োজন কৰা খেলসমূহৰ ভিতৰত আছিল ফুটবল (ল’ৰা), কাবাডী (ছোৱালী), শ্বটপুট (ল’ৰা), ছোৱালীৰ বাবে ১০০ মিটাৰ ৪০০ আৰু ৮০০ মিটাৰ দৌৰ প্ৰতিযোগিতা আৰু ল’ৰাৰ বাবে ৪০০,৮০০ আৰু ১৬০০ মিটাৰ দৌৰ প্ৰতিযোগিতা।

ফুটবল আৰু কাবাডীৰ বিজয়ীসকলক ট্ৰফী প্ৰদান কৰা হয় আৰু শ্বটপুট্ আৰু দৌৰ প্ৰতিযোগিতাৰ বিজয়ীসকলক সোণ, ৰূপ আৰু ব্ৰঞ্জৰ পদক প্ৰদান কৰা হয়। সমাৰোহত জিলাখনৰ ১৫০ গৰাকী নিৰ্বাচিত ছাত্ৰ-ছাত্ৰীয়ে অংশগ্ৰহণ কৰে।

ইয়াৰ আগেয়ে ক্ৰীড়া সমাৰোহখন উদ্বোধন কৰে জ্যেষ্ঠ সাংবাদিক ৰেৱতী ৰমন সাপকটাই।

উদ্বোধনী অনুষ্ঠানত উপস্থিত আছিল ওদালগুৰি জিলা ক্ৰীড়া সন্থাৰ সম্পাদক ছেমুৱেল দৈমাৰী, জেহালো দৈমালু ৱুশ্বু মাৰ্চিয়েল স্প’ৰ্টছ ক্লাৱৰ সভাপতি ধানেশ্বৰ বসুমতাৰীৰ লগতে অন্যান্য বহু স্থানীয় গন্য মান্য ব্যক্তি।