প্ৰধানমন্ত্ৰী নৰেন্দ্ৰ মোদীৰ চৰকাৰত প্ৰহ্লাদ যোশীয়ে নতুন কেন্দ্ৰীয় শিক্ষা মন্ত্ৰী হিচাপে নিযুক্তি পাইছে। শেহতীয়া কেবিনেট সালসলনিৰ অংশ হিচাপে প্ৰায় পাঁচ বছৰৰ অন্তত ধৰ্মেন্দ্ৰ প্ৰধানৰ স্থানত তেওঁক এই দায়িত্ব দিয়া হৈছে। ইয়াৰ পূৰ্বে তেওঁ কেন্দ্ৰীয় গ্ৰাহক পৰিক্ৰমা, খাদ্য আৰু ৰাজহুৱা বিতৰণ আৰু নৱীকৰণযোগ্য শক্তি মন্ত্ৰী হিচাপে কাৰ্যনিৰ্বাহ কৰি আছিল। নিট পৰীক্ষাত হোৱা ভয়ংকৰ অনিয়মৰ দায়িত্ব স্বীকাৰ কৰি শিক্ষাৰ্থীৰ স্বাৰ্থ আৰু ৰাষ্ট্ৰীয় একতা ৰক্ষাৰ বাবে ধৰ্মেন্দ্ৰ প্ৰধানে পদত্যাগ কৰাৰ পিছতেই এই ডাঙৰ পৰিৱৰ্তন ঘটিছে।
এই কেবিনেট সালসলনিৰ সমান্তৰালকৈ কেন্দ্ৰীয় চৰকাৰে শিক্ষা মন্ত্ৰালয়ৰ উচ্চ পৰ্যায়ৰ বিষয়াসকলৰ মাজতো গুৰুত্বপূৰ্ণ সালসলনি কৰিছে। উচ্চ শিক্ষা সচিব বিনীত যোশীক পঞ্চায়ত ৰাজ মন্ত্ৰালয়লৈ বদলি কৰাৰ বিপৰীতে নৰেশ পাল গাংৱাৰক নতুন উচ্চ শিক্ষা সচিব হিচাপে নিযুক্তি দিয়া হৈছে। আনহাতে, টি কে অনিল কুমাৰে বিদ্যালয় শিক্ষা আৰু সাক্ষৰতা বিভাগৰ সচিব হিচাপে দায়িত্ব গ্ৰহণ কৰিছে। শেহতীয়া পৰীক্ষাৰ বিতৰ্কসমূহৰ পিছত শিক্ষা মন্ত্ৰালয় আৰু ৰাষ্ট্ৰীয় পৰীক্ষা সংস্থা চমুকৈ এন টি এৰ কাম-কাজ সুদৃঢ় কৰাৰ লক্ষ্যৰেই এই প্ৰশাসনিক পৰিৱৰ্তনসমূহ কৰা হৈছে বুলি ধাৰণা কৰা হৈছে।
ধৰ্মেন্দ্ৰ প্ৰধানে ২০২১ চনৰ জুলাই মাহত ৰমেশ পোখৰিয়ালৰ পিছত শিক্ষা মন্ত্ৰী হিচাপে দায়িত্ব গ্ৰহণ কৰিছিল। তেওঁৰ কাৰ্যকালত ৰাষ্ট্ৰীয় শিক্ষানীতি ২০২০ ৰূপায়ণৰ কাম দ্ৰুতগতিত আগবাঢ়িছিল। ৰাষ্ট্ৰীয় পাঠ্যক্ৰমৰ আৰ্হি আৰু নতুন এন চি ই আৰ টি পাঠ্যপুথিৰ প্ৰৱৰ্তন আছিল তেওঁৰ সময়ৰ উল্লেখযোগ্য পদক্ষেপ। ইয়াৰ লগতে দশম আৰু দ্বাদশ শ্ৰেণীৰ বোৰ্ডৰ পৰীক্ষা বছৰত দুবাৰ অনুষ্ঠিত কৰাৰ প্ৰস্তাৱো ৰখা হৈছিল। কিন্তু তেওঁৰ কাৰ্যকালৰ শেষৰ ফালে প্ৰতিযোগিতামূলক পৰীক্ষাসমূহৰ বিতৰ্কই এই সকলোবোৰ সাফল্য ম্লান পেলাইছিল। ২০২৪ আৰু পৰৱৰ্তী সময়ত ২০২৬ চনত নিট পৰীক্ষাত প্ৰশ্নকাকত ফাদিল আৰু ভয়ংকৰ অনিয়মৰ অভিযোগে সমগ্ৰ দেশতে তীব্ৰ প্ৰতিবাদৰ সৃষ্টি কৰিছিল। যাৰ ফলত চৰকাৰে নিট পৰীক্ষা বাতিল কৰি চি বি আইৰ তদন্তৰ নিৰ্দেশ দিবলগীয়া হৈছিল আৰু বিৰোধীয়ে তেওঁৰ পদত্যাগ দাবী কৰিছিল।
এতিয়া নতুন শিক্ষা মন্ত্ৰী প্ৰহ্লাদ যোশীৰ সন্মুখত এক কঠিন পথ আৰু বহুতো প্ৰত্যাহ্বান আছে। ৰাষ্ট্ৰীয় শিক্ষানীতিৰ সম্পূৰ্ণ ৰূপায়ণৰ লগতে বিদ্যালয়ৰ পাঠ্যক্ৰম সংস্কাৰৰ কাম তেওঁ আগুৱাই নিব লাগিব। কিন্তু আটাইতকৈ ডাঙৰ প্ৰত্যাহ্বানটো হ‘ল দেশৰ পৰীক্ষা ব্যৱস্থা আৰু ৰাষ্ট্ৰীয় পৰীক্ষা সংস্থাৰ ওপৰত ৰাইজে হেৰুওৱা বিশ্বাস পুনৰ ঘূৰাই অনা। চৰকাৰে ইতিমধ্যে নিটৰ দৰে ডাঙৰ প্ৰৱেশ পৰীক্ষাসমূহ কম্পিউটাৰ ভিত্তিক কৰাৰ প্ৰস্তুতি চলাইছে আৰু পৰীক্ষা ব্যৱস্থাত কাৰিকৰী সুৰক্ষা বৃদ্ধিৰ প্ৰস্তাৱ দিছে। নতুন মন্ত্ৰীগৰাকীয়ে এই সংস্কাৰসমূহ কেৱল ঘোষণাতেই আৱদ্ধ নাৰাখি বাস্তৱত সফলভাৱে ৰূপায়ণ কৰিব লাগিব যাতে দেশৰ লাখ লাখ শিক্ষাৰ্থীয়ে এক নিকা আৰু নিৰ্ভৰযোগ্য পৰীক্ষা ব্যৱস্থা লাভ কৰিব পাৰে।
