দীৰ্ঘদিনীয়া অসুস্থতাত ভুগি ওদালগুৰি উচ্চতৰ মাধ্যমিক বিদ্যালয়ৰ অধ্যক্ষ মৃগেন্দ্ৰনাথ কলিতাৰ শুকুৰবাৰে নিজা বাসভাৱনত পৰলোকপ্ৰাপ্তি হয়।
তেখেতৰ মৃত্যুৰ বাতৰি বিয়পি যোৱাৰ লগে লগে সমগ্ৰ অঞ্চলটোতে শোকৰ ছাঁ পৰে।মৃত্যুৰ সময়ত কলিতাৰ বয়স হৈছিল ৫৫ বছৰ। অধ্যক্ষ কলিতা দীৰ্ঘদিন ধৰি অসুখত ভুগি আছিল আৰু অসুসৰ বাবেই তেখেত ৱাশ্বৰূমত পৰি গৈ গুৰুতৰ আঘাত পায়। সেই আঘাতৰ ফলতেই তেখেতে শুকুৰবাৰে পুৱা ৪.১৫ বজাত পৰলোকলৈ গমন কৰে।
উল্লেখ্য যে এগৰাকী নিষ্ঠাবান শিক্ষক হোৱাৰ উপৰিও কলিতা এগৰাকী কবিও আছিল আৰু ওদালগুৰি সাহিত্য সভাৰ আলোচনী সম্পাদকৰ দায়িত্বত আছিল। প্ৰয়াত কলিতা ওদালগুৰি জিলা কবি সন্থাৰো প্ৰাক্তন সভাপতি আছিল আৰু অঞ্চলটোৰ ভালেকেইটা সামাজিক- ধৰ্মীয় অনুষ্ঠানৰ সৈতে জড়িত আছিল।
১৯৬২চনৰ ২৪ অক্টোবৰত জন্মলাভ কৰা কলিতাৰ কৰ্মজীৱন অতি উজ্জ্বল আছিল।
তেখেত উচ্চতৰ মাধ্যমিকত বিজ্ঞান শাখাৰ ছাত্ৰ আছিল আৰু পৰৱৰ্তী সময়ত কলা বিভাগত স্নাতক আৰু স্নাতকোত্তৰ ডিগ্ৰী লাভ কৰিছিল।
১৯৮৫চনৰ মে’ৰ ১ তাৰিখে তেখেতে ওদালগুৰি ছোৱালী উচ্চতৰ মাধ্যমিক বিদ্যালয়ত সহকাৰী শিক্ষক হিচাপে যোগদান কৰে। ২০১৭ৰ ১৩ জুনত তেখেতক বিদ্যালয়খনৰ অধ্যক্ষলৈ উন্নীত কৰা হয়।
বহুমুখী ব্যক্তিত্বৰ অধিকাৰী কলিতা এগৰাকী ভাল আবৃতিকাৰো আছিল আৰু ওদালগুৰিৰ বিভিন্ন অনুষ্ঠানত তেখেতে কবিতা আবৃত্তি কৰিছিল।
বিভিন্ন সংগঠন, ছাত্ৰসকলৰ প্ৰতিনিধিসকলে তেখেতলৈ তেওঁলোকৰ অন্তিম শ্ৰদ্ধা জ্ঞাপন কৰে।
সমগ্ৰ ওদালগুৰি চহৰৰ মাজেৰে এটা শোক শোভাযাত্ৰাও বাহিৰ কৰোৱা হয়।
ওদালগুৰি সাহিত্য সভা আৰু সদৌ অসম ছাত্ৰ সন্থাৰ ওদালগুৰি আঞ্চলিক গোটে প্ৰয়াত কলিতাৰ পৰিয়ালবৰ্গলৈ তেওঁলোকৰ আন্তৰিক শোকবাৰ্তা জ্ঞাপন কৰে।
প্ৰয়াত কলিতাৰ নশ্বৰ শৰীৰ তেখেতে শিক্ষাদান কৰা বিদ্যালয়খনলৈ কঢ়িয়াই নিয়া হয় আৰু তাতে তেখেতৰ নশ্বৰ দেহত শেষ শ্ৰদ্ধা জ্ঞাপন কৰা হয়।
তাৰ পাছত স্থানীয় শ্মশানত তেখেতৰ শেষ কৃত্য সম্পন্ন কৰা হয়।
প্ৰয়াত কলিতাই তেখেতৰ পত্নী, এজন পুত্ৰ আৰু এগৰাকী কন্যাক এই সংসাৰত এৰি থৈ যায়।
প্ৰয়াত কলিতাৰ মৃত্যুত অঞ্চলটোত গভীৰ শোকৰ ছাঁ পৰে।
