মুখ্য মন্ত্ৰী সৰ্বানন্দ সোণোৱালে আজি কলিয়াবৰ মহকুমাৰ সোণাৰিগাঁৱত শ্ৰীশ্ৰীবদলা পদ্মআতা কলাক্ষেত্ৰৰ আধাৰশিলা স্থাপন কৰে।
উল্লেখযোগ্য যে আজি শ্ৰীশ্ৰীবদলা পদ্মআতা সেৱা সমিতি, অসমৰ সৌজন্যত আৰু শ্ৰী শ্ৰী বদলা পদ্মআতা কলাক্ষেত্ৰ পৰিচালনা সমিতিৰ ব্যৱস্থাপনাত শ্ৰীশ্ৰীবদলা পদ্মআতাৰ ৪৭২ সংখ্যক জন্ম উৎসৱ আৰু সদৌ অসম ভাওনা সমাৰোহ উদযাপন উপলক্ষে আয়োজিত মুকলি সভাৰ আগতে মুখ্য মন্ত্ৰীয়ে এই আধাৰশিলা স্থাপন কৰে।
আনহাতে মুকলি সভাত মুখ্য অতিথি হিচাপে অংশ গ্ৰহণ কৰি প্ৰদান কৰা ভাষণত মুখ্য মন্ত্ৰী সৰ্বানন্দ সোণোৱালে শ্ৰীশ্ৰীবদলা পদ্মআতা কলাক্ষেত্ৰৰ চৌহদ শীঘ্ৰে নিৰ্মাণৰ বাবে নগাঁও জিলা উপায়ুক্তক ইতিমধ্যে নিৰ্দেশ দিয়া হৈছে বুলি কোৱাৰ লগতে নাৰায়নপুৰৰ মাধৱদেৱ কলাক্ষেত্ৰৰ অৰ্দ্ধনিমিত কাম শীঘ্ৰে সমাপ্ত কৰাৰ বাবে চৰকাৰে ব্যৱস্থা গ্ৰহণ কৰিব বুলিও কয়।
লগতে মুখ্য মন্ত্ৰী গৰাকীয়ে মাধৱদেৱ বিশ্ববিদ্যালয়ত শ্ৰীশ্ৰীবদলা পদ্মআতাৰ নামত এখন আসন স্থাপনৰ বাবে ৰাজ্য চৰকাৰে পদক্ষেপ গ্ৰহণ কৰিব বুলিও কয়।
উত্তৰ কমলাবাৰী সত্ৰৰ সত্ৰাধিকাৰ জনাৰ্দ্দন দেৱ গোস্বামীৰ পৌৰোহিত্যত অনুষ্ঠিত সভাত জল-সম্পদ মন্ত্ৰী কেশৱ মহন্ত, অসম পৰ্যটন উন্নয়ন নিগমৰ অধ্যক্ষ জয়ন্ত মল্ল বৰুৱা আৰু ‘প্ৰতিদিন টাইম’ৰ মুখ্য সম্পাদক নিতুমণি শইকীয়াও বক্তব্য ৰাখে।
সভাত দেউৰী স্বায়ত্ত শাসিত পৰিষদৰ মুখ্য কাৰ্যবাহী সদস্য মাধৱ দেউৰী, কেইবাগৰাকীও সত্ৰাধিকাৰ, নগাঁও জিলাৰ উপায়ুক্ত বিশ্বজিৎ পেগুকে ধৰি বহু গণ্য-মান্য ব্যক্তি উপস্থিত থাকে।
