সৰ্থেবাৰীৰ পাঁচখেল গঞা গয়ৰহৰ উদ্যোগত ইয়াৰ ঐতিহ্যমণ্ডিত সভাখোলাত অনুষ্ঠিত এখন সম্বৰ্দ্ধনা সভাত মুখ্যমন্ত্ৰী সৰ্বানন্দ সোণোৱালে কয় যে গ্ৰাম্য অৰ্থনীতি, গ্ৰাম্য সংস্কৃতি আৰু আধ্যাত্মিকতাৰ সৈতে নিবিড় সম্পৰ্ক থকা কাঁহ শিল্পক এক শক্তিশালী ৰূপত গঢ় দিয়াৰ উদ্দেশ্য ৰাজ্য চৰকাৰে বিজ্ঞানসন্মতভাৱে অধ্যয়ন কৰি এক সুকীয়া আঁচনি গ্ৰহণৰ ব্যৱস্থা কৰিছে।
সৰ্থেবাৰীৰ ঐতিহ্য-সংস্কৃতিৰ ওপৰত আলোকপাত কৰি মুখ্যমন্ত্ৰীগৰাকীয়ে কয়,’‘শিল্প কলা আৰু আধ্যাত্মিকতাৰ স্থান সৰ্থেবাৰীয়ে অসমৰ সাহিত্য সংস্কৃতি আৰু জাতীয় জীৱনলৈ উল্লেখযোগ্য বৰঙণি আগবঢ়াইছে। শক্তিশালী শিল্প কলাক সৰ্থেবাৰীয়ে উজলাই তোলাই নহয়, অসমীয়া জাতিৰ গৌৰৱ বৃদ্ধি কৰিছে আৰু বিশ্বৰ বুকুত অসমৰ ঐতিহ্য প্ৰতিফলিত কৰিছে।‘’
শংকৰদেৱকে আদি কৰি গুৰুসকলে সত্ৰ প্ৰতিষ্ঠা কৰি সাংস্কৃতিক আৰু আধ্যাত্মিক বাতাবৰণ সৃষ্টি কৰিছিল আৰু তাৰ ভেটিতে অসমৰ সমাজ জীৱন পৰিচালিত বুলি উল্লেখ কৰি মুখ্যমন্ত্ৰীয়ে কয় যে গুৰুসকলৰ আদৰ্শেৰে সমাজৰ পৰা অন্ধবিশ্বাস, দুস্কৃতি আঁতৰ কৰাৰ বাবে সমাজত ভাল মানুহৰ সৃষ্টি কৰিব লাগিব।
মুখ্যমন্ত্ৰীগৰাকীয়ে কয় যে সু-শাসন ব্যৱস্থাৰ বাবে ভাল মানুহৰ প্ৰয়োজন। সমাজখন নিয়মানুৱৰ্তী, শৃংখলাবদ্ধ আৰু পৰিস্কাৰ পৰিচ্ছন্ন কৰি ৰখাৰ ক্ষেত্ৰত প্ৰতিজন মানুহ দায়বদ্ধ হ’লেহে প্ৰকৃতাৰ্থত ৰাজ্যখনত পৰিৱৰ্তন হ’ব।
সভাত বিজেপিৰ ৰাজ্যিক সভাপতি ৰঞ্জিত দাসে বিশিষ্ট অতিথি হিচাপে ভাষণ দি সৰ্থেবাৰীৰ ঐতিহ্য সংস্কৃতিৰ ওপৰত ব্যাখ্যা দাঙি ধৰি কয় যে এই অঞ্চলত মাধৱদেৱ স্থাপিত গোমূৰা পূবৰ সত্ৰ, গদ্য সাহিত্যৰ জনক ভট্টদেৱ স্থাপিত ব্যাসকুছি সত্ৰ আৰু মনোহৰদেৱ স্থাপিত বৰকাপলা সত্ৰ, কৃষ্ণগুৰু সেৱাশ্ৰমকে ধৰি অনেক সত্ৰ, থান আছে।
কাঁহ শিল্প, পিতল শিল্প, মৃৎ শিল্পৰে গৌৰৱান্বিত এই ঠাইৰ কাপলা বিলকে ধৰি জলাশয়সমূহ মাছ-পুঠিৰ বাবে বাবেও প্ৰখ্যাত বুলি উল্লেখ কৰে সভাপতি গৰাকীয়ে। তেওঁ কয় যে মুখ্যমন্ত্ৰী সোণোৱালে সত্ৰসমূহৰ সংৰক্ষণ, বেদখল উচ্ছেদ, মেধাৰ আধাৰত এপিএছচিকে ধৰি সকলো চৰকাৰী বিভাগতে নিযুক্তিকে ধৰি কেতবোৰ গুৰুত্বপূৰ্ণ পদক্ষেপ গ্ৰহণ কৰিছে।
মুখ্যমন্ত্ৰীয়ে আজিৰ সভাতে সৰ্থেবাৰীৰ সভাখোলাৰ চৌপাশৰ পকীবেৰ নিৰ্মাণৰ বাবে ২৫ লাখ টকাৰ অনুদান দিয়াৰ কথা ঘোষণা কৰে।
