নাগালেণ্ডৰ উপ মুখ্যমন্ত্ৰী ৱাই পেট্টনে বৃহস্পতিবাৰে নতুন দিল্লীত কেন্দ্ৰীয় গৃহ মন্ত্ৰী ৰাজনাথ সিঙক তেওঁৰ চৰকাৰী বাসভৱনত সাক্ষাৎ কৰে।
উপ মুখ্যমন্ত্ৰী গৰাকীয়ে তেওঁলোকৰ আলোচনাকালত নাগালেণ্ডৰ বিত্তীয় পৰিস্থিতিৰ বিষয়ে কেন্দ্ৰীয় মন্ত্ৰীগৰাকীক অৱগত কৰে।
নাগালেণ্ডৰ বাবে বিশেষ পৰিকল্পনা সাহায্যৰ বাবদ পাবলগীয়া ৮৬৩.৯৫ কোটি টকা শীঘ্ৰেই মুকলি কৰি দিয়াৰ বাবে তেওঁ কেন্দ্ৰীয় মন্ত্ৰীগৰাকীক আহ্বান জনায়।
ৰাজ্যখনৰ গৃহ বিভাগৰো দায়িত্বত থকা পেট্টনে সুৰক্ষা সম্পৰ্কীয় ব্যয় (এছ আৰ ই) আৰু এছ আৰ ইৰ অধীনত মোবাইল ইন্টাৰনেট ব্যয়কে ধৰি অনাদায় হৈ থকা ধন মোকলাই দিয়াৰ বাবেও অনুৰোধ কৰে।
জানিব পৰা মতে কেন্দ্ৰীয় গৃহ মন্ত্ৰীগৰাকীয়ে পেট্টনক বিষয়টো বিবেচনা কৰাৰ লগতে ৰাজ্যখনৰ বাবে সকলো প্ৰকাৰৰ সহায়-সহযোগিতা আগবঢ়োৱাৰ আশ্বাস দিয়ে।
বুধবাৰে উপ মুখ্যমন্ত্ৰীগৰাকীয়ে কেন্দ্ৰীয় গৃহ ৰাজ্যমন্ত্ৰী কিৰেন ৰিজিজুকো সাক্ষাৎ কৰে আৰু বৰ্তমান নাগালেণ্ড ৰাজ্যখনৰ পৰিস্থিতি সম্পৰ্কে তেওঁক অৱগত কৰে।
ইয়াৰ মাজতে সূত্ৰসমূহে জনোৱা মতে ৰাজ্যখনৰ ভাৰতীয় জনতা দলৰ ১২ গৰাকী বিধায়কৰ আটাইকেইজনে ৰাষ্ট্ৰীয় ৰাজধানীখনত বাহৰ পাতি আছে।
বিজেপিৰ সূত্ৰসমূহে কয় যে বিজেপি বিধায়ক কেইজনে কেন্দ্ৰীয় নেতাসকলক সৌজন্যমূলক সাক্ষাতৰ বাবে গৈ দিল্লীত উপস্থিত হৈছে।
