আজি ভোটাদান সম্পন্ন হোৱা মেঘালয়ৰ গাৰোপাহাৰ জিলাত ৰাজ্যখনৰ ৰাজনীতিৰ দুই মহাৰথী ক্ৰমে শাসনাধিষ্ঠিত কংগ্ৰেছৰ মুখ্য মন্ত্ৰী মুকুল চাংমা আৰু এন পি পিৰ মুখ্য নেতা কনৰাড চাংমাৰ ভাগ্য বন্দী হৈ ৰ’ল বেলটবাকচত।
কনৰাড চাংমা যদিও এজন প্ৰাৰ্থী নহয়, তেওঁৰ ৰাজনৈতিক ভাগ্য নিঃসন্দেহে এই নিৰ্বাচনে বহু পৰিমাণে নিৰ্ণয় কৰিব। আনকি ৰাজনৈতিক বিশ্লেষকে ২০১৮ ৰ নিৰ্বাচনক দুই চাংমাৰ যুঁজ বুলি অভিহিত কৰা দেখা গৈছে।
যোৱা কেইদিনত গাৰোপাহাৰক ৰাজ্যখনৰ নিৰ্বাচনী ঢৌৰ অন্যতম নাভিকেন্দ্ৰ হিচাপে দেখা গৈছিল। ইয়াত উবুৰি খাই পৰিছিলহি ৰাজ্যখনৰ ৰাজনৈতিক তাৰকা মুকুল চাংমা, কনৰাড চাংমাকে ধৰি কেইবাজনো কেন্দ্ৰীয় নেতাও।
আনহাতে দক্ষিণ তুৰাৰ পৰা এন পি পি দলৰ হৈ উঠা, প্ৰাক্তন সাংসদ পূৰ্ণ এ চাংমাৰ কন্যা প্ৰাক্তন কেন্দ্ৰীয় মন্ত্ৰী আগাথা চাংমাৰ বাবেও এই নিৰ্বাচন হৈ পৰিছে অতি গুৰুত্বপূৰ্ণ।
আজি সংবাদ মাধ্যমৰ আগত নিজৰ দলৰ সম্ভাৱনাৰ কথা ব্যক্ত কৰি মুকুল চাংমায়ে কয়, ‘মোৰ ৰাজ্যৰ মানুহৰ ওপৰত মোৰ সম্পূৰ্ণ বিশ্বাস আৰু আস্থা আছে আৰু অনায়াসে সংখ্যাগৰিষ্ঠতা পাম বুলি আশা কৰি আছো।’
সাংবাদিকে মুকুল চাংমাক তেওঁলোকৰ দলে নিৰ্বাচনত সংখ্যাগৰিষ্ঠতা নাপালে আন কাৰোবাৰ লগত মিত্ৰতা কৰিবলৈ আগ্ৰহী নেকি বুলি সোধা প্ৰশ্নৰ উত্তৰত কয়, ‘যদিও বিভিন্ন কথা উঠি আছে, এইটো কওঁ যে হয় আমাৰ ভাল বন্ধু আছে আৰু আমি এইটো কৰিম।’ তেওঁ কয় যে বিজেপিয়ে পূৰ্বেও কেইবাবাৰো মেঘালয়ত চেষ্টা কৰিছিল কিন্তু কংগ্ৰেছ দলে সফলতাৰে তেওঁলোকৰ মোকাবিলা কৰিব পাৰিছিল। আৰু এইবাৰো সেইটো অব্যাহত ৰাখিব।
তেওঁ প্ৰধান মন্ত্ৰী নৰেন্দ্ৰ মোদী আৰু গৃহ মন্ত্ৰী ৰাজনাথ সিঙক হ’ম ৱৰ্ক নকৰাকৈ নিৰ্বাচনী প্ৰচাৰ চলাবলৈ অহা বুলি আৰু সেয়ে গোকাট মিছা কথা ক’ব লগীয়া হয় বুলি কয়।
আনহাতে কনৰাড চাংমায়ে কয়, ‘আমি আত্মবিশ্বাসী হৈ আছো যে মানুহে পৰিৱৰ্তনৰ বাবে ভোট দিব আৰু আমাক জনাদেশ দিব। মোৰ আমাৰ মানুহৰ জ্ঞানৰ ওপৰত বিশ্বাস আছে আৰু মই নিশ্চিত যে তেওঁলোকে মেঘালয় ৰাজ্যৰ বাবে এটা সচেতন নিৰ্বাচন কৰিব।’
নিৰ্বাচনৰ ঠিক আগে আগে যোৱা ২৪ ফেব্ৰুৱাৰিত জি এন এল এৰ শীৰ্ষনেতা শ্বোহাম ডি চিৰাৰ হত্যাই শংকা কৰা মতে নিৰ্বাচনী প্ৰক্ৰিয়াত কোনো প্ৰভাৱ নেপেলালে। আনকি এন চি পিৰ পৰা উঠা ৱিলিয়ামনগৰ সমষ্টিৰ প্ৰাৰ্থী জনাথন এন চাংমাৰ হত্যাৰো বিশেষ প্ৰভাৱ পৰা দেখা নগ’ল গাৰো পাহাৰৰ ভোটাৰৰ ওপৰত। আনহাতে মুঠ ৩০ টাতকৈ অধিক ভোটকেন্দ্ৰ থকা গাৰোপাহাৰত ভোটিং মেচিনৰ বিজুতি সম্পৰ্কীয় কোনো বা-বাতৰি অহা নাই। গাৰো পাহাৰত ভোটদানৰ হাৰ প্ৰায় ৭৫ শতাংশ বুলি নিৰ্বাচন আয়োগৰ সূত্ৰই জানিবলৈ দিছে।
উল্লেখযোগ্য যে আজি গাৰো পাহাৰৰ লগতে সমগ্ৰ ৰাজ্যখনতে ভোটদান সুকলমে আৰু শান্তিপূৰ্ণভাৱে অনুষ্ঠিত হৈ যায়। মেঘালয়ৰ লগতে নাগালেণ্ডতো আজি নিৰ্বাচন হৈ যায়। ইয়াৰ পূৰ্বে যোৱা ১৮ ফেব্ৰুৱাৰিত ত্ৰিপুৰাত নিৰ্বাচন অনুষ্ঠিত হৈছিল। এই তিনিওখন ৰাজ্যৰ ফলাফল অহা ৩ মাৰ্চত ঘোষণা কৰা হ’ব।
