উত্তৰ-পূৰ্বাঞ্চলৰ বাবে ভাৰত নেট আৰু অন্যান্য প্ৰধান টেলিকম প্ৰকল্প ৰূপায়ণ সম্পৰ্কে এখন সন্মিলন সোমবাৰে গুৱাহাটীত অনুষ্ঠিত হৈ যায়। এই সন্মিলনখন আছিল উত্তৰ-পূৰ্বাঞ্চলৰ ৰাজ্যকেইখনৰ মুখ্যমন্ত্ৰীসকলৰ মাজত।
ৰাজ্য চৰকাৰ আৰু ব্যক্তিগত খণ্ডৰ সহযোগিতাত সাধাৰণ লোক, প্ৰতিষ্ঠান আৰু গ্ৰামাঞ্চলৰ লোকৰ বাবে ব্যয়সাধ্য ব্ৰ’ডবেণ্ড সেৱা আগবঢ়োৱাই হৈছে এই প্ৰকল্পটোৰ লক্ষ্য।
যোগাযোগ বিভাগৰ কেন্দ্ৰীয় ৰাজ্যমন্ত্ৰী মনোজ সিনহাই ভাৰতৰ প্ৰথম ছেটেলাইট সংযোগী মেঘালয়ৰ গাওঁ পঞ্চায়তখনৰ উদ্বোধন কৰে। মন্ত্ৰীগৰাকীয়ে লগতে ভাৰত নেট প্ৰকল্পৰ ব্যৱহাৰ কৰি মণিপুৰৰ গাওঁ পঞ্চায়তত ১০০ ৱাই ফাই উদ্বোধন কৰে।
অনুষ্ঠানত অৰুণাচলৰ মুখ্যমন্ত্ৰী পেমা খাণ্ডু, অসমৰ বিজ্ঞান আৰু প্ৰযুক্তি বিভাগৰ মন্ত্ৰী কেশৱ মহন্ত, উত্তৰ-পূৰ্বাঞ্চলৰ ৰাজ্যকেইখনৰ মুখ্য সচিবসকল, টেলিকম মন্ত্ৰালয়ৰ জ্যেষ্ঠ বিষয়াসকল, ভাৰত ব্ৰ’ডবেণ্ড নেটৱৰ্ক আৰু ভাৰত সঞ্চাৰ নিগম লিমিটেডৰ প্ৰতিনিধি বৰ্গ উপস্থিত থাকে।
ভাৰত নেট বিশ্বৰ বৃহৎ গ্ৰাম্য ব্ৰ’ডবেণ্ড প্ৰকল্প বুলি উল্লেখ কৰি কেন্দ্ৰীয় যোগাযোগ মন্ত্ৰী মনোজ সিনহাই কয় যে দেশৰ লক্ষ্য আৰু অভিযান হৈছে বিছিন্ন হৈ থকা অঞ্চলক সংযোগ কৰি ভাৰতক সংযোগ কৰা প্ৰধানমন্ত্ৰীৰ ডিজিটেল ইণ্ডিয়াৰ লক্ষ্যত উপনীত হোৱা।
তেওঁ ভাৰত নেটৰ দ্বিতীয় পৰ্যায়ত ব্ৰ’ডবেণ্ড নেটৱৰ্কৰ সৈতে ২ লাখ ৫০,০০০ গাওঁ পঞ্চায়তক সংযোগ কৰাৰ পৰিকল্পনা গ্ৰহণ কৰা হৈছে বুলি জানিব দিয়ে।
