আজি এটা আনুষ্ঠানিকতাৰ জৰিয়তে ছিকিমৰ কৃষি আৰু উদ্যান শস্য বিভাগৰ মন্ত্ৰী সোমনাথ পৌদ্যালে গেংটকত ২২.৭৫ কোটি টকা ব্যয়েৰে নিৰ্মাণ কৰা ৰাজ্যখনৰ প্ৰথমখন কিষাণ বজাৰ মুকলি কৰে।
সাতমহলীয়া এই বজাৰখন আনুষ্ঠানিকভাৱে উদ্বোধন কৰি মন্ত্ৰীজনে কয় চৰকাৰে কৃষকসকল পোনপটীয়া বজাৰৰ লাভ দিবৰ বাবে আৰু তেওঁলোকক জৈৱিক কৃষিৰ বাবে উৎসাহিত কৰাৰ বাবে এই বজাৰ কেন্দ্ৰটো নিৰ্মাণ কৰিছে। “এই বজাৰখন সেইসকল কৃষকৰ বাবে খোলা আছে, যিসকলে নিজৰ জৈৱিক পদ্ধতিৰে উৎপাদিত কৃষিজাত সামগ্ৰী আৰু অন্যান্য জৈৱিক সামগ্ৰী বিক্ৰী কৰিব বিচাৰে। আগতে আমাৰ খেতিয়কসকলে লাল বজাৰৰ সৰু ঠাইত নিজৰ সামগ্ৰী বিক্ৰী কৰিছিল। কিন্তু আজিৰ পৰা তেওঁলোকে নিজৰ পাচলিবোৰ বিক্ৰী কৰিবলৈ এডোখৰ ভাল ঠাই পালে। এইটো আমাৰ জৈৱিক সামগ্ৰী অভিযানত এটা ডাঙৰ সংযোজন।” মন্ত্ৰীজনে কয়।
তেওঁ আৰু কয় যে তেওঁৰ বিভাগটোৱে জৈৱিকভাৱে উৎপাদিত সামগ্ৰী পোনপটীয়াকৈ বজাৰত বিক্ৰীৰ সুযোগ দি খেতিয়কসকলক তেওঁলোকৰ উৎপাদন আৰু আয় দুগুণ কৰাৰ বাবে উৎসাহিত কৰাৰ কথা ভাবি আহিছিল।
“মই নিশ্চিত যে এতিয়া ছিকিমৰ খেতিয়কে এই পোনপটীয়া বজাৰ ব্যৱস্থাৰ জৰিয়তে তেওঁলোকৰ জৈৱিক কৃষি সামগ্ৰীৰ বাবে উত্তম দাম পাবলৈ সক্ষম হ’ব। এইটোৱে তেওঁলোকক তেওঁলোকৰ উৎপাদন বৃদ্ধি কৰিবলৈ উৎসাহিত কৰিব।” মন্ত্ৰীজনে কয়।
আনহাতে আজিৰ উদ্বোধনৰ দিনটোতে বিভিন্ন ঠাইৰ পৰা তেওঁলোকৰ সামগ্ৰী বিক্ৰীৰ বাবে অহা কৃষকসকলক তেওঁলোকে চৰকাৰলৈ আগ বঢ়োৱা সমৰ্থনৰ বাবে পৌদ্যালে ধন্যবাদ জ্ঞাপন কৰে। তেওঁ লগতে কয় যে অতি সোনকালেই পূব ছিকিমৰ চিংটামত আন এখন এনেকুৱা কিষাণ বজাৰ স্থাপন কৰা হ’ব।
উল্লেখযোগ্য যে আজিৰ উদ্বোধনী দিনটোত নিজৰ সামগ্ৰী বিক্ৰী কৰিবলৈ বিভিন্ন ঠাইৰ পৰা খেতিয়কসকল আহিব পৰাকৈ আৰু তেওঁলোকৰ সামগ্ৰী আনিব পৰাকৈ ২৮ খন গাড়ীৰ ব্যৱস্থা কৰা হৈছিল। খেতিয়কসকলেও এই ব্যৱস্থাটোৰ বাবে চৰকাৰৰ প্ৰতি কৃতজ্ঞতা প্ৰকাশ কৰা দেখা গ’ল।
আজিৰ অনুষ্ঠানটোত নগৰ উন্নয়ন মন্ত্ৰী এন কে সুভা আৰু অন্যান্য বিষয়াসকল উপস্থিত আছিল।
