ইনাৰ লাইন পাৰ্মিট অবিহনেই অৰুণাচল প্ৰদেশত প্ৰৱেশৰ বাবে চাকমা আৰু হাজংসকলৰ অধিকাৰ সম্পৰ্কীয় এটা প্ৰশ্নক লৈ অৰুণাচল প্ৰদেশ চৰকাৰে গুৱাহাটী উচ্চ ন্যায়ালয়ৰ এটা ৰায়ক প্ৰত্যাহ্বান জনাই দিয়া আৱেদন উচ্চতম ন্যায়ালয়ে শুনানিৰ বাবে গ্ৰহণ কৰিছে। স্পেচিয়েল লিভ পিটিশ্যন ( SLP (C) CC No. 17762/2016)খন শুনানিৰ বাবে গ্ৰহণ কৰি শীৰ্ষতম আদালতখনে চাকমাসকলৰ অধিবক্তাই আৱেদনখন খাৰিজ কৰিবলৈ দিয়া যুক্তি খণ্ডন কৰে।
উল্লেখযোগ্য যে গুৱাহাটী উচ্চ ন্যায়ালয়ে ২০১৩ চনৰ ১৯ মাৰ্চৰ ৰায়টো আছিল চাকমা-হাজংসকলৰ সপক্ষে। ৰায়টোত কোৱা হৈছে যে চাকমা আৰু হাজংসকলক অৰুণাচল প্ৰদেশত প্ৰৱেশ কৰিবলৈ কোনো ধৰণৰ ইনাৰ লাইন পাৰ্মিটৰ দৰকাৰ নহয়। এনেকুৱা পাৰ্মিট অবিহনেও তেওঁলোকক পাৰ্মিট দিয়া বুলি ধৰা হ’ব।
এই ৰায়টোৰ বিৰোধিতা কৰি অৰুণাচল চৰকাৰে উচ্চতম ন্যায়ালয়ত গোচৰটো পুনৰ তৰিছিল।
জানিব পৰামতে গোচৰটো যোৱা ১২ মাৰ্চত উচ্চতম ন্যায়ালয়ত উঠিছিল আৰু অৰুণাচল প্ৰদেশৰ চৰকাৰী অধিবক্তাৰ যুক্তি শুনাৰ পিছত ন্যায়ালয়ে গোচৰটো আগ বঢ়াবলৈ সিদ্ধান্ত লয়।
ইয়াৰ বিৰোধিতাৰে যুক্তি দিয়া তথা চাকমাক প্ৰতিনিধিত্ব কৰা উকীলৰ যুক্তি খণ্ডন কৰে সৰ্বোচ্চ আদালতে।
আনহাতে অৰুণাচল প্ৰদেশৰ হৈ উপস্থিত থকা ৰাজ্যৰ অতিৰিক্ত মহাধিবক্তাজনে কয় যে উচ্চতম ন্যায়ালয়ে এছ এল পি গ্ৰহণ কৰাৰ অৰ্থ এইটোৱে যে এতিয়া চৰকাৰে এই বিষয়টো সন্দৰ্ভত সকলো দিশ খৰচি মাৰি উপস্থাপন কৰিব পাৰিব। অৰুণাচল প্ৰদেশৰ খিলঞ্জীয়া লোকৰ সাংবিধানিক ৰক্ষাকৱচৰ লগত সম্পৰ্ক থকা সকলোবোৰ দিশ উত্থাপন কৰাৰ সুযোগ দিয়াৰ উপৰি উচ্চতম ন্যায়ালয়কো বিষয়টো সূক্ষ্মভাৱে চালিজাৰি চোৱাৰ সুযোগ দিব। ইয়াৰোপৰি চাকমা আৰু হাজংসকলৰ অনুপ্ৰৱেশৰ বাবে দেশৰ প্ৰান্তীয় প্ৰদেশখনত হোৱা কৃত্ৰিম আৰু দ্ৰুত জনগাঁথনিগত পৰিৱৰ্তন সন্দৰ্ভতো উচ্চতম ন্যায়ালয়খনক অৱগত কৰাৰ চৰকাৰৰ দায়িত্ব হ’ব।
