অসমৰ ছয় জনগোষ্ঠীৰ জনজাতিকৰণৰ বিষয়টো কেন্দ্ৰীয় চৰকাৰৰ বিবেচনাধীন হৈ থকাৰ সময়তে অসমৰ জনজাতি সংগঠনসমূহৰ সমন্বয়ৰক্ষী সমিতিৰ মুখ্য আহ্বায়ক আদিত্য খাখলাৰীয়ে যোৱা ১৪ জুলাইত এখন সংবাদমেলত ছয় জনগোষ্ঠীৰ জনজাতিকৰণ অসাংবিধানিক বুলি মন্তব্য কৰাৰ পাছতে জাঙুৰ খাই উঠিছে সদৌ অসম কোচ ৰাজবংশী সন্মিলনী।
আজি, ১৬ জুলাইত দিচপুৰ প্ৰেছ ক্লাবত এখন সংবাদমেল অনুষ্ঠিত কৰি সদৌ অসম কোচ ৰাজবংশী সন্মিলনীৰ সভাপতি বীৰেশ্বৰ শইকীয়াই আদিত্য খাখলাৰীৰ এই মন্তব্যৰ গৰিহণা দিয়ে। সংবাদমেলত সংগঠনটোৰ কাৰ্যকৰী সভাপতি প্ৰণৱ নাৰায়ণ দেব, সাধাৰণ সম্পাদক ৰঞ্জিত কুমাৰ ৰায় আৰু সহকাৰী সম্পাদক দীপক বৰ্মনো উপস্থিত থাকে।
“তেওঁলোক জনজাতি হৈ আছে, গতিকে আন কোনোবাই জনজাতিৰ মৰ্য্যাদা পোৱাত তেওঁলোকে হকাবাধা কৰিব নালাগে। এনেকুৱা মন্তব্য কৰি অসমৰ জাতি-জনগোষ্ঠীসমূহৰ মাজত বিভেদ তথা ভাতৃঘাতী সংঘৰ্ষৰ সৃষ্টি নকৰিব।” এইদৰে আজি বীৰেশ্বৰ শইকীয়াই আদিত্য খাখলাৰীক সকীয়াই দিয়ে।
উল্লেখ্য যে, যোৱা ১৪ জুলাইত জনজাতি সংগঠনসমূহৰ সমন্বয়ৰক্ষী সমিতিৰ মুখ্য আহ্বায়ক আদিত্য খাখলাৰীয়ে জনজাতি সংগঠন আৰু বুদ্ধিজীৱীসকলৰ বৈঠকত ছয় জনগোষ্ঠীৰ জনজাতিকৰণৰ বিষয়টো অসাংবিধানিক বুলি মন্তব্য কৰিছিল।
তাৎপৰ্য্যপূৰ্ণভাৱে সংগঠনটোৱে বড়োসকলৰ জনজাতিৰ মৰ্য্যাদা কৰ্তন কৰিব লাগে বুলিও মন্তব্য কৰে। তেওঁলোকে কয় যে বিটিচি গঠন হোৱাৰ পাছৰ পৰাই বড়োসকলৰ অৱস্থাৰ যথেষ্ট পৰিৱৰ্তন ঘটিছে। তেওঁলোক এতিয়া আন জনগোষ্ঠীৰ তুলনাত বহু উন্নত হৈছে। গতিকে তেওঁলোক এতিয়া জনজাতি হৈ থকাৰ কোনো প্ৰয়োজন নাই বুলি সংবাদমেলত মন্তব্য কৰে।
আনহাতে, জনজাতিকৰণৰ ক্ষেত্ৰত বিজেপি নেতৃত্বাধীন কেন্দ্ৰ আৰু ৰাজ্য চৰকাৰৰ স্থিতিকো সমালোচনা কৰে সদৌ অসম কোচ ৰাজবংশী সন্মিলনীৰ সভাপতি বীৰেশ্বৰ শইকীয়াই। তেওঁ কয়, “বিজেপিয়ে লোকসভা নিৰ্বাচনৰ নিৰ্বাচনী ইস্তাহাৰত বিজেপি শাসনলৈ আহিলে ছমাহৰ ভিতৰত ছয় জনগোষ্ঠীৰ জনজাতিকৰণ কৰিব বুলি কথা দিছিল। কিন্তু চৰকাৰৰ চাৰিটা বছৰ পূৰ্ণ হোৱাৰ পাছতো এই প্ৰতিশ্ৰুতি পূৰণ নকৰিলে।”
ইয়াৰ লগতে আগন্তুক ২০১৯ৰ লোকসভা নিৰ্বাচনৰ পূৰ্বে ছয়-জনগোষ্ঠীৰ জনজাতিকৰণ নকৰিলে বিজেপিৰ বিৰুদ্ধে কোচ ৰাজবংশীসকলে ব্যাপক জনমত গঠন কৰিব বুলিও সকীয়াই দিয়ে।
ইপিনে, আজিৰ এই সংবাদমেলতেই জনজাতিকৰণৰ দাবীত সদৌ অসম কোচ ৰাজবংশী সন্মিলনীয়ে ধাৰাবাহিক আন্দোলন কাৰ্যসূচীও ঘোষণা কৰে।
সেই অনুসৰি অহা ২০ জুলাইত দীঘলীপুখুৰীপাৰত অৱস্থান ধৰ্মঘট, ৬ আগষ্টত কোকৰাঝাৰৰ চৌটাৰ ৰেইল ষ্টেইশ্যন আৰু শিবসাগৰত ৰে’ল অৱৰোধ কাৰ্যসূচী ৰূপায়ণ কৰিব বুলি জানিবলৈ দিয়ে
