জখলাবন্ধা আৰক্ষীৰ অভিযানত যোৱা নিশা এজন চোৰাং চিকাৰী নিহত হয়। জখলাবন্ধা আৰক্ষী আৰু চোৰাং চিকাৰীৰ মাজত হোৱা প্ৰচণ্ড গুলিয়াগুলীত নিহত হয় চোৰাং চিকাৰীজন। কাজিৰঙা ৰাষ্ট্ৰীয় উদ্যানৰ সমীপৰ দেওচুৰত এই গুলিয়াগুলীৰ ঘটনা সংঘটিত হৈছিল ।
জখলাবন্ধা আৰক্ষী থানাৰ ভাৰপ্ৰাপ্ত বিষয়া দেবেন বৰাৰ নেতৃত্বত তিনিজনীয়া আৰক্ষীৰ এটা দলে নিশা তহল দি থকা সময়ত আৰক্ষীৰ দলটোৱে চোৰা চিকাৰীৰ দলটোক প্ৰত্যক্ষ কৰে ।
চোৰাং চিকাৰীৰ দলটোৱে কাজিৰঙা ৰাষ্ট্ৰীয় উদ্যানৰ বুঢ়াপাহাৰ বনাঞ্চলত গঁড় মাৰিবৰ বাবে প্ৰৱেশ কৰাৰ সময়তে পূ্ৰ্বৰে পৰা খাপ পিটি থকা আৰক্ষীৰ তিনিজনীয়া দলটোৱে চোৰাং চিকাৰীৰ কেইজনক আত্মসমৰ্পণ কৰিবলৈ নিৰ্দেশ দিয়াত চোৰাং চিকাৰী কেইজনে আৰক্ষীলৈ লক্ষ্য কৰি গুলীবৰ্ষণ কৰে। আৰক্ষীয়েও ইয়াৰ প্ৰত্যুত্তৰত গুলী বৰ্ষণ কৰাত চোৰাং চিকাৰীজন আহত হয় ।
গুৰুতৰভাৱে আহত চোৰাং চিকাৰীজনক ততাতৈয়াকৈ জখলাবন্ধা অসামৰিক চিকিৎসালয়লৈ লৈ অনা হয় যদিও চিকিসৎকে তেওঁক মৃত বুলি ঘোষণা কৰে।
ঘটনাস্থলীৰ পৰা আৰক্ষীয়ে উদ্ধাৰ কৰিছে এটা AK 47 চিৰিজৰ ৰাইফল আৰু ১৫৮ টা সজীৱ গুলী। চোৰাং চিকাৰীৰ বিৰুদ্ধে চলা অভিযানত আন দুই তিনিজন চোৰাং চিকাৰী আহত হোৱাৰ আশংকা কৰি জখলাবন্ধা আৰক্ষীয়ে আজি পুৱাৰে পৰা তালাচী অভিযান অব্যাহত ৰাখিছে।
জানিব পৰা মতে নিহত চোৰাং চিকাৰী জনৰ পৰিচয় এতিয়াও লাভ কৰিব পৰা নাই জখলাবন্ধা আৰক্ষীয়ে।
বিগত তিনিবছৰ ধৰি জখলাবন্ধা আৰক্ষী থানাত ভাৰপ্ৰাপ্ত বিষয়া হিচাপে থকা দেবেন বৰাই চোৰা চিকাৰীৰ বিৰুদ্ধে অভিযান চলাই তিনিশতাধিক চোৰাং চিকাৰী গ্ৰেপ্তাৰ কৰাৰ লগতে বৃহৎ পৰিমানৰ অস্ত্ৰ শস্ত্ৰ জব্দ কৰিবলৈ সক্ষম হৈছে। চোৰাং চিকাৰীৰ বিৰুদ্ধে আৰক্ষী বিষয়াগৰাকীয়ে চলোৱা এই অভিযান আৰু সাহসিকতাক ৰাইজে প্ৰশংসা কৰিছে।
