ক্ৰীড়া ক্ষেত্ৰত এজনৰ পাছত আন এজন খেলুৱৈৰ সফলতাই ৰাষ্ট্ৰীয় তথা আন্তঃৰাষ্ট্ৰীয় পৰ্যায়ত উজলাই তুলিবলৈ সক্ষম হৈছে অসমৰ নাম। হিমাৰ পাছত এইবাৰ আন্তঃৰাষ্ট্ৰীয় পৰ্যায়ত পুনৰ উজলিছে হৃদয় হাজৰিকা ।
অসমৰ উদীয়মান শ্বুটাৰ হৃদয়ে চেক গণৰাজ্যৰ পিলজেনত অনুষ্ঠিত আন্তঃৰাষ্ট্ৰীয় শ্বুটিং প্ৰতিযোগিতাৰ জুনিয়ৰ শাখাত ব্ৰঞ্জ পদক অৰ্জন কৰে। হৃদয়ৰ এই সাফল্যই দেশৰ লগতে অসমকো গৌৰৱান্বিত কৰি তোলা পৰিলক্ষিত হৈছে।
জানিব পৰা মতে হৃদয়ে প্ৰতিযোগিতাখনত যোগ্যতা নিৰ্ধাৰণ মেচত ৬২৬.২ পইণ্ট স্ক’ৰ লাভ কৰি ফাইনেললৈ অগ্ৰসৰ হয়। আৰু ফাইনেলত ২২৭.২ পইণ্টেৰে দলীয় শাখাত দিব্যাঞ্চ পানবাৰ আৰু ঋতৃক ৰমেশৰ লগত খেলি ব্ৰঞ্জৰ পদক লাভ কৰিবলৈ সক্ষম হয়।
উল্লেখ্য যে ইতিমধ্যে নিজৰ প্ৰতিভাৰ উমান দি যোৱা ২৫ জুনত হৃদয় হাজৰিকাই জাৰ্মানীৰ শ্বুলত অনুষ্ঠিত হোৱা আই এছ এছ এফ জুনিয়ৰ বিশ্বকাপ শ্বুটিঙত ১০ মিটাৰ এয়াৰ ৰাইফল ইভেণ্টত ব্যক্তিগত আৰু দলীয় শাখাত সোণৰ পদক অৰ্জন কৰিছে।
প্ৰচুৰ সম্ভাৱণাপূৰ্ণ এইগৰাকী যুৱ শ্বুটাৰৰ সফলতাত গৃহভূমি লখিমপুৰ জিলাৰ নাৰায়ণপুৰবাসী আনন্দত আত্মহাৰা হোৱা দেখিবলৈ পোৱা যায়।
উল্লেখ্য যে নাৰায়ণপুৰৰ ঐতিহ্যমণ্ডিত মাধৱদেৱ মহাবিদ্যালয়ৰ অধ্যক্ষ ড০ শৰৎ হাজৰিকা আৰু ইভা শইকীয়া হাজৰিকাৰ একমাত্ৰ সন্তানৰ সফলতাত গৌৰৱান্বিত সমগ্ৰ অসমবাসী।
