ক’ত উত্তৰ-পূৰ্বাঞ্চলৰ উন্নয়নৰ লক্ষ্য আৰু ক’ত তামিল ভক্তিমূলক গীত-নাট! কিন্তু আশ্চৰ্য্যৰ কথা যে দেশৰ উত্তৰ-পূৰ্বাঞ্চলৰ উন্নয়নৰ লক্ষ্যৰে গঠিত হোৱা ড’নাৰ মন্ত্ৰ্যালয়ৰ ৱেবছাইট খুঁচৰি চালে তাকেই পোৱা যায়। মন্ত্ৰ্যালয়টোৰ ৱেবছাই http://www.mdoner.gov.in লৈ গৈ আপুনি events-and-announcements ত সোমালে যিকেইটা ভিডিঅ’ দেখা পাব সেইকেইটা দেখি আপোনাৰ চকু কপালত উঠিব।
উল্লেখযোগ্য যে এই মন্ত্ৰ্যালয়টো ২০০১ চনত গঠন কৰা হৈছিল দেশৰ উত্তৰ-পূৰ্বাঞ্চলৰ ৰাজ্যকেইখনৰ আৰ্থ-সামাজিক বিকাশৰ ক্ষেত্ৰত এটা সমন্বয়ক প্ৰাধিকাৰী হিচাপে। ইয়াৰ কাম হ’ল উত্তৰ-পূবৰ অৰ্থনৈতিক উন্নয়ন, আন্তঃগাঁথনি, বুনিয়াদী সেৱাবোৰৰ সুব্যৱস্থা, বিনিয়োগ আৰু শান্তি তথা নিৰাপত্তা বিষয়বোৰ সন্দৰ্ভত কেন্দ্ৰীয় চৰকাৰৰ বিভিন্ন মন্ত্ৰ্যালয়বোৰ আৰু উত্তৰ-পূবৰ ৰাজ্য চৰকাৰকেইখনৰ মাজত সমন্বয়ক হিচাপে কাম কৰা।
কিন্তু ডিজিটেল ইণ্ডিয়াৰ শ্ল’গান দি থকা চৰকাৰৰ এটা মন্ত্ৰ্যালয়ৰ ৱেবছাইটতে কোনো সংগতি নথকা ভিডিঅ’ই কেনেকৈ স্থান পালে সেয়া চিন্তনীয় বিষয়। ৱেবছাইটটোৰ উক্ত শিতানৰ অধীনত ৰখা ভিডিঅ’ দুটা হ’ল তামিলনাডুৰ স্বাস্থ্য সেৱা বিষয়ক তথা প্ৰচাৰমূলক ভিডিঅ’ যেন লাগে। আনহাতে এটা পাৱাৰ পইণ্ট প্ৰেজেণ্টেইশ্যনো আছে, যিটোৰ বিষয়বস্তুও তামিলনাডুৰ এন আৰ এইচ্ছ এমৰ ভিতৰুৱা। নক’লেও হ’ব যে এইবোৰৰ সৈতে উত্তৰ-পূৰ্বাঞ্চলৰ উন্নয়নৰ কোনো সম্পৰ্ক নাই।
ভিডিঅ’কেইটাৰ প্ৰথমটো হ’ল মহিলাসকলে কৰা নাটক সদৃশ এটা অনুষ্ঠানৰ, য’ত দৰ্শক আৰু ভাৱৰীয়াই একেলগে হাঁহি-খিকিন্দালি কৰি অনুষ্ঠানত ভাগ লৈছে। ইংৰাজীত কোনো ছাব-টাইটল নথকাত ভালদৰে বুজিব পৰা নগ’ল।
আনহাতে আনটো হ’ল কেইগৰাকীমান মহিলাই ভক্তিমূলক গীত পৰিৱেশন কৰা এটা অনুষ্ঠানৰ। ইয়াতো কোনো ছাব-টাইটল নাই।
এই ভিডিঅ’কেইটাৰ জৰিয়তে কেন্দ্ৰীয় মন্ত্ৰী জিতেন্দ্ৰ সিঙৰ এই মন্ত্ৰ্যালয়টোৱে উত্তৰ-পূৰ্বাঞ্চলৰ ৰাইজলৈ কি বাৰ্তা দিব বিচাৰিছে সি দুৰ্বোধ্য সাঁথৰ হৈ পৰিছে অঞ্চলটোৰ ৰাইজৰ বাবে।
‘ড’নাৰ মন্ত্ৰ্যালয়ে তামিল নাডুৰ এই ভিডিঅ’কেইটাৰ জৰিয়তে আমাক কি বাৰ্তা দিব বিচাৰিছে আমি বুজি পোৱা নাই।’ শ্বিলঙৰ এজন ছাত্ৰ এইবৰ ধাৰে কয়। তেওঁ লগতে জানিবলৈ দিয়ে যে তেওঁ উত্তৰ-পূৰ্বাঞ্চলৰ বাবে কিবা থাকিব পাৰে বুলিহে ৱেবছাইটটোৰ Events and Announcements শিতানটো চাইছিল।
এইবৰৰ দৰে গুৱাহাটীৰ এজন নিবনুৱা শিক্ষিত যুৱক মনোজ দাসেও কয় উত্তৰ-পূৰ্বাঞ্চলৰ বাবে গঠন কৰা ড’নাৰ মন্ত্ৰ্যালয়ে এইটো হাস্যকৰ কাম কৰিছে।
আনহাতে এইবৰ ধাৰে কয় যে মন্ত্ৰ্যালয়ে এইবোৰ কৰি উত্তৰ-পূবৰ মানুহক বুৰ্বক বনাইছে। ইয়াৰ বিৰুদ্ধে সকলোৱে একেলগে প্ৰতিবাদ কৰিব লাগে।
