ৰাজহুৱা বিতৰণ ব্যৱস্থাৰ চাউলৰ চোৰাং ব্যৱসায়ত জড়িত থকাৰ সন্দেহ : ডিফুত ব্যৱসায়িক প্ৰতিষ্ঠানত আয়কৰ বিভাগৰ তালাচী
দীৰ্ঘ দিনৰ পৰা ৰাজহুৱা বিতৰণ ব্যৱস্থাৰ চাউলৰ চোৰাং ব্যৱসায়ত জড়িত থকাৰ অভিযোগ থকা ডিফুৰ প্ৰতিষ্ঠিত ব্যৱসায়ী সবৰমল স্বামীৰ ব্যৱসায়িক প্ৰতিষ্ঠানত আয়কৰ বিভাগে ২৭ মাৰ্চত হঠাতে তালাচী চলায়। তেওঁৰ হনুমন্ত এণ্টাৰপ্ৰাইজ নামৰ ডিফুৰ বজাৰস্থিত ব্যৱসায়িক প্ৰতিষ্ঠানটোত আয়কৰ বিভাগৰ দলটো উপস্থিত হৈ তন্নতন্নকৈ অনুসন্ধান কৰে। লগতে তেওঁৰ মাঞ্জাস্থিত ব্যৱসায়িক প্ৰতিষ্ঠানটো আয়কৰ বিভাগৰ দলটোৱে তালাচী চলায় বুলি জানিব পৰা গৈছে।
উল্লেখযোগ্য যে ব্যৱসায়ীজনে দীৰ্ঘদিনৰ পৰা দৰিদ্ৰ লোকক সকাহ দিবৰ বাবে চৰকাৰে ৰাজহুৱা বিতৰণ ব্যৱস্থাৰ জৰিয়তে যোগান ধৰা চাউলৰ চোৰাং ব্যৱসায়ত জড়িত থকাৰ অভিযোগ আছে। খাদ্য আৰু অসামৰিক বিভাগৰ চাউলৰ এখন বৃহৎ চোৰাং বজাৰ থকাৰ কথাটো প্ৰায় সকলোৱে জনা কথা। বিশেষকৈ এই বিভাগকেইটাৰ বিষয়া কৰ্মচাৰীৰে চাউলৰ চোৰাং কাৰবাৰীৰ সুসম্পৰ্ক থকাৰ কথাটো।
আনহাতে সূত্ৰটোৱে জনোৱা মতে, আয়কৰ বিভাগৰ দলটোৱে ডিফুৰ খাদ্য নিগমৰ গুদামতো অনুসন্ধান কৰিছিল। দলটো ডিফুৰ আন এজন প্ৰতিষ্ঠিত ব্যৱসায়ী সুৰেশ শৰ্মাৰ বাসগৃহলৈও গৈছিল বুলি জানিব পৰা গৈছে। কিন্তু ব্যৱসায়ীজনৰ ঘৰত তালাচীত যোৱা দলটোক দুৱাৰ খুলি নিদিয়াত বিমুখ হৈ ঘূৰি আহে।
আয়কৰ বিভাগৰ দলটো ডিমাপুৰৰ পৰা আহিছিল বুলি জানিব পৰা গৈছে।