এসময়ত সমগ্ৰ উত্তৰ-পূবৰ চিকিৎসাৰ ৰাজধানীৰূপে জনাজাত ডিব্ৰুগড় চহৰত অসমৰ স্বাস্থ্য বিভাগৰ বদান্যতাত এতিয়া ফিজিঅ’থেৰাপি কেন্দ্ৰৰ অনুজ্ঞাপত্ৰৰেও চলাব পাৰি ব্যক্তিগত চিকিৎসালয়!
ডিব্ৰুগড়ৰ আজিৰ পৰা প্ৰায় দুই দশক পূৰ্বেই স্থাপিত অৰ্চনা ট্ৰমা আৰু অৰ্থ’পেদিকছ হস্পিটেল স্বাস্থ্য বিভাগৰ পৰা কোনো অসুবিধা নোপোৱাকৈ ফিজিঅ’থেৰাপি চেন্তাৰৰ অনুজ্ঞাপত্ৰৰে চলি আছিল।
পিছে কেচু খান্দোতে সাপ ওলোৱাদি আজি ২৬ জুলাইত জিলা প্ৰশাসনে পাৰ্কিঙৰ পৰিদৰ্শন কৰোঁতে পোহৰলৈ আহে ডিব্ৰুগড়ৰ প্ৰখ্যাত অস্থিশল্য বিশেষজ্ঞ ডাঃ শান্তনু লহকৰৰ জনাজাত নাৰ্ছিং হ’মখনৰ এই কাহিনী।
‘অৰ্চনা ট্ৰমা এণ্ড অৰ্থ’পেদিক হস্পিটেলখন ফিজিঅ’থেৰাপি চেন্টাৰৰ অনুজ্ঞাপত্ৰৰে চলি আছে,’ নৰ্থ ইষ্ট নাও-ক জনালে ডিব্ৰুগড়ৰ উপায়ুক্ত লায়া মাদুৰিয়ে।
ডিব্ৰুগড়ৰ পল্টন বজাৰত থকা এই ৩০খন বিচনাযুক্ত নাৰ্ছিং হ’মখনক ১০ দিনৰ ভিতৰত অনুজ্ঞাপত্ৰ নুলিয়ালে বন্ধ কৰি দিয়া হ’ব বুলিও ঘোষণা কৰিছে উপায়ুক্তগৰাকীয়ে।
‘তেওঁলোকক ১০ দিনৰ ভিতৰত যাৱতীয় অনুমতিৰ ব্যৱস্থা কৰিবৰ বাবে নিৰ্দেশ দিয়া হৈছে। অন্যথা তেওঁলোকক বন্ধ কৰি দিয়া হ’ব,’ মাদুৰিৰ ঘোষণা।
ডিব্ৰুগড় যে কাঠফুলাৰ দৰে গজি উঠা আইন উলংঘাকাৰী নাৰ্ছিং হ’মৰ ঘাটিত পৰিণত হৈছে সেই কথা পুনৰ প্ৰমাণ কৰি আজি জিলা প্ৰশাসনৰ পৰিদৰ্শনত পোহৰলৈ আহে আন বহুকেইখন নাৰ্ছিং হ’মত নাই পাৰ্কিঙৰ সুবিধা।
অৰ্চনা ট্ৰমা এণ্ড অৰ্থপেদিক হস্পিটেলৰ লগতে চহৰখনৰ এম জি এম হস্পিটেল, জি এম হস্পিটেল আৰু ছান ডায়েগনষ্টিক্স পাৰ্কিঙৰ ব্যৱস্থা নোহোৱাকৈয়ে চলি আছে।
পাৰ্কিঙৰ সুবিধা নোহোৱা বাবে চিকিৎসালয়সমূহলৈ অহা গাড়ী-মটৰ ৰাষ্টাতে পাৰ্ক কৰাৰ ফলত গোটেই চহৰখনতে সৃষ্টি হয় যান-জঁটৰ সমস্যা।
‘আমি নাৰ্ছিং হ’মৰ মালিকসকলৰ সৈতে যোৱা ২১ জুলাইত আলোচনা কৰিছিলো আৰু তেওঁলোকক ১০ দিনৰ ভিতৰত পাৰ্কিঙৰ ব্যৱস্থা কৰিবলৈ নিৰ্দেশ দিয়া হৈছে। অহা ৩১ জুলাইৰ ভিতৰত এই নিৰ্দেশ নামানিলে এই প্ৰতিষ্ঠানসমূহ বন্ধ কৰি দিয়া হ’ব,’ উপায়ুক্তৰ ঘোষণা।
উপায়ুক্তৰ পৰিদৰ্শনত ওলোৱা এই ভয়ানক ত্ৰুটীসমূহ স্বাস্থ্য বিভাগৰ চকুত পৰা নাছিল নেকি?
স্বাস্থ্য বিভাগৰ কৰ্তব্য চকুত নেপেলোৱাকে থকাটো নেকি?
বেৰি ৱাইট মেডিকেল কলেজৰ ৰূপত ১৯০০ চনতে মেডিকেল শিক্ষাৰ অংকুৰণ ঘটা ডিব্ৰুগড়ত আজি চিকিৎসা ব্যৱস্থাৰ এই অধোগতিৰ বাবে দায়ী কোন?
