ৰাতিৰ ৰে’লত অহা আত্মীয়ক আগ বঢ়াই আনিবলৈ পুৱাই নিজৰ মাৰুতি গাড়ীখন লৈ ওলাই যোৱা এজন চফল ডেকা নিজেই মৃতদেহ হৈ আহিল। এই মৰ্মান্তিক দুৰ্ঘটনাটো ঘটিছে ডুমডুমাত। ৰাজ্যত প্ৰতিদিনে বৃদ্ধি পাই অহা পথ দুৰ্ঘটনাৰ মাজতে ১ মে’ দিনা এই ঘটনাটোত মৃত্যু হয় অঞ্চলটোৰ অবিনাশ দত্ত নামৰ এজন সৰবৰহী যুৱকৰ।
ঘটনাৰ বিৱৰণি মতে, অবিনাশে ৰে’লত অহা তেওঁৰ আত্মীয়ক আগ বঢ়াই আনিবলৈ নিজৰ মাৰুতি গাড়ীখন লৈ গৈ থাকোতেই গংগাবাৰী চাহ বাগিচাৰ আলি কেঁকুৰিটোতে তিনিচুকীয়াৰ ফালৰ পৰা তীব্ৰ গতিত অহা এখন আইটেন গাড়ীয়ে (নং এ এছ ০৬ এম ৮১৮৮) অবিনাশৰ কাৰখনত প্ৰচণ্ড জোৰত খুন্দা মাৰে। খুন্দাটো ইমানেই ডাঙৰ আছিল যে অবিনাশৰ থিতাতে মৃত্যু হয়।
অবিনাশ অঞ্চলটোৰ ৰূপাই লাচিত নগৰ নিৱাসী, অসম সাহিত্য সভাৰ তিনিচুকীয়া জিলা সমিতিৰ প্ৰাক্তন সম্পাদক, ৰূপাই হাইস্কুলৰ প্ৰধান শিক্ষক প্ৰকাশ দত্তৰ একমাত্ৰ সন্তান আছিল।
তেওঁ এজন যুৱ ব্যৱসায়ী হোৱাৰ লগতে অঞ্চলটোৰ বহুকেইটা দল-সংগঠনৰ লগত জড়িত আছিল। বিভিন্ন ধৰণৰ সামাজিক কাম-কাজতো জড়িত আছিল।
আনহাতে দুৰ্ঘটনাটোৰ পিছত উত্তেজিত স্থানীয় লোকে গোট খাই ৰাষ্ট্ৰীয় পথটো কিছু সময়ৰ বাবে অৱৰোধ কৰে। দুৰ্ঘটনাটোত আইটেন গাড়ীখনৰ চালক চাবুৱা দিনজানৰ সুভাষ নায়ক (২৬) আৰু আৰোহী অৰূপজ্যোতি নায়ক (২৫) আৰু আন দুজন আৰোহী ক্ৰমে তিনিচুকীয়াৰ ৰাতুল বসু (২৫) আৰু ডুমডুমাৰ বিকাশ তাঁতী (২৬)ও আহত হয়। বিকাশ তাঁতীৰ বাদে বাকী ৩ জনৰ আঘাত গুৰুত্বভাৱে হোৱাত তেওঁলোকক ডিব্ৰুগড় অসম চিকিৎসা মহাবিদ্যালয়লৈ নিয়া হৈছে।
সৰবৰহী যুৱকজনৰ মৃতদেহটো মৰণোত্তৰ পৰীক্ষাৰ পিছত নিজ ঘৰলৈ অনা হয় আৰু বহুকেইটা স্থানীয় সংঘ-সংগঠন আদিয়ে শেষ শ্ৰদ্ধাঞ্জলি জ্ঞাপন কৰে।