ত্ৰিপুৰাত ধাৰাসাৰ বৰষুণ আৰু ভূমিস্খলন : ৪ গৰাকী লোকৰ মৃত্যু
প্ৰবল বৰষুণ আৰু ভূমিস্খলনৰ ফলত কালি অৰ্থাৎ শুকুৰবাৰে ত্ৰিপুৰাত চাৰি গৰাকী লোকৰ মৃত্যু হয়।
পশ্চিম ত্ৰিপুৰাৰ কামভুকচেৰা গাঁৱত সংঘটিত প্ৰথমটো ঘটনাত একেটা পৰিয়ালৰে ৩ গৰাকী সদস্য নিহত হয়। নিহত লোককেইজনক শনিৰাম দেববৰ্মা (৩০), অম্ৰিটবালা দেববৰ্মা (৩০) আৰু অভি দেববৰ্মা (৪) বুলি চিনাক্ত কৰা হৈছে। তদুপৰি বোকাত পোত যোৱা দিপাঙ্কৰ নামৰ এটি শিশুক গুৰুতৰ অৱস্থাত উদ্ধাৰ কৰি আগৰতলাৰ জি বি চিকিৎসালয়লৈ প্ৰেৰণ কৰা হয়।
আনহাতে বেলফুংপাৰা গাঁৱত সংঘটিত আনটো ভূনিস্খলনৰ ঘটনাত মলেন্দ্ৰ দেববৰ্মা (৬২) নামৰ এজন লোকৰ মৃত্যু হয়।
উল্লেখযোগ্য নিহত আটাইকেইগৰাকী লোকে জনগোষ্ঠীয় সম্প্ৰদায়ৰ।
গোটেই নিশা ধৰি হৈ থকা ধাৰাসাৰ বৰষুণে ত্ৰিপুৰাত জনজীৱন স্তব্ধ কৰি তুলিছে। আগৰতলা নগৰৰ কেইবাঠাইত একাঁঠুলাকে পানী উঠে। মুখ্য মন্ত্ৰী বিপ্লব কুমাৰ দেবে বান প্ৰভাবিত স্থান সমূহ পৰিদৰ্শন কৰে।
কেন্দ্ৰীয় গৃহ মন্ত্ৰী ৰাজনাথ সিঙে মুখ্য মন্ত্ৰী বিপ্লব দেবলৈ ফোন কৰি শোকসন্তপ্ত পৰিয়ালবৰ্গলৈ সমবেদনা জ্ঞাপন কৰাৰ লগতে ভুক্তভোগী পৰিয়ালৰ সদস্যক সাহায্য দিয়াৰ প্ৰতিশ্ৰুতি দিয়ে।
ৰাজ্যখনৰ শিক্ষা মন্ত্ৰী ৰতন লাল নাথ আৰু বিধায়ক বিশ্বকেটু দেববৰ্মাই ভুক্তভোগীৰ পৰিয়ালক সাক্ষাৎ কৰে।