গুলীচালনা, বোমা নিক্ষেপৰ দৰে হিংসাত্মক ঘটনাৰে অন্ত পৰিল ত্ৰিপুৰা স্বায়ত্তশাসিত জিলা পৰিষদৰ নিৰ্বাচন। ২৮খন আসনৰ স্বায়ত্তশাসিত জিলা পৰিষদৰ নিৰ্বাচনত ৮.৫ লাখৰো অধিক ভোটাৰৰ আছিল। ভোটাৰৰ ভোটদানৰ হাৰ ৭০%ৰ ওপৰত আছে।
নিৰ্বাচনত বিজেপিৰ মিত্ৰদলবোৰৰ মাজত সংঘৰ্ষ তীব্ৰতৰ হৈ পৰে। বিশেষকৈ টিপ্ৰা মথা আৰু বিজেপিৰ মাজত সংঘৰ্ষ পৰ্যায়ক্ৰমে অব্যাহত আছিল। আহত হয় কেইবাজনো লোক। মুঠৰ ওপৰত নিৰ্বাচনত হিংসাত্মক পৰিস্থিতিৰ সাক্ষী হৈ ৰ’ল বিজেপি শাসিত ত্ৰিপুৰাত।
দেওবাৰে ত্ৰিপুৰা জনজাতি এলেকা স্বায়ত্তশাসিত জিলা পৰিষদৰ নিৰ্বাচন অনুষ্ঠিত হয়। নিৰ্বাচনক কেন্দ্ৰ কৰি দেওবাৰে ৰাজ্যজুৰি কটকটীয়া নিৰাপত্তা বেষ্টনি গঢ়ি তোলা হয়। ইয়াৰ পিছতো হিংসা সম্পূৰ্ণৰূপে পৰিহাৰ কৰিব পৰা নগ’ল। কেইবাটাও অঞ্চলত বিক্ষিপ্ত ঘটনা সংঘটিত হয়। স্পৰ্শকাতৰ অঞ্চলত অতিৰিক্ত কেন্দ্ৰীয় বাহিনী আৰু ৰাজ্যিক আৰক্ষী নিয়োগ কৰাৰ পাছতো কেইবাটাও স্থানত সংঘৰ্ষ, আক্ৰমণ আৰু ভোটদানত বাধাৰ অভিযোগ উত্থাপন হৈছে।
পুৱা তুলনামূলকভাৱে শান্তিপূৰ্ণভাৱে আৰম্ভ হৈছিল ভোটদানৰ কাম। কিন্তু দিনটো আগবাঢ়ি যোৱাৰ লগে লগে ছবিখন সলনি হৈ গ’ল। দুপৰীয়াৰ পিছত পৰিস্থিতিৰ অৱনতি ঘটে। বিভিন্ন ৰাজনৈতিক দলৰ কৰ্মী আৰু সমৰ্থকৰ মাজত উত্তেজনা বাঢ়ি সংঘৰ্ষলৈ পৰিণত হয়। ক’ৰবাত ভোটাৰক ভয় দেখুৱাই, ক’ৰবাত বা বুথ জব্দ কৰাৰ চেষ্টাৰ অভিযোগ চৰ্চালৈ আহিছে, যাৰ ফলত প্ৰশাসনৰ প্ৰস্তুতিৰ ওপৰত প্ৰশ্ন উত্থাপন হৈছে।
এনে পৰিপ্ৰেক্ষিতত বিৰোধী দলসমূহে নিৰ্বাচনী প্ৰক্ৰিয়াৰ নিৰপেক্ষতাক লৈ উদ্বেগ প্ৰকাশ কৰিছে। আইন-শৃংখলা বজাই ৰখাৰ ক্ষেত্ৰত প্ৰশাসনৰ ভূমিকাক লৈও প্ৰশ্ন উত্থাপন কৰিছে সমালোচকসকলে। আচৰণ বিধি উলংঘা কৰি হিংসাত্মক কাৰ্যত লিপ্ত হোৱা লোকৰ বিৰুদ্ধে ক্ষিপ্ৰ আৰু কঠোৰ আইনী ব্যৱস্থা গ্ৰহণ কৰিবলৈ নিৰ্বাচন আয়োগক দাবী জনাইছে। সামগ্ৰিকভাৱে কটকটীয়া নিৰাপত্তাৰ মাজতো এডিচি নিৰ্বাচনক কেন্দ্ৰ কৰি সৃষ্টি হোৱা উত্তেজনা আৰু বিতৰ্কই ৰাজ্যখনৰ ৰাজনৈতিক পৰিৱেশ আৰু অধিক উত্তপ্ত কৰি তুলিছে।
উল্লেখ্য যে কেৱল ত্ৰিপুৰা স্বায়ত্তশাসিত জিলা পৰিষদৰ নির্বাচনত ২৮খন আসনতে বিজেপিয়ে প্রতিদ্বন্দ্বিতা আগবঢ়াইছে৷ টিপ্ৰা মথাৰ সৈতে মিত্ৰতা ভংগ হোৱাৰ বাবে গেৰুৱা শিবিৰে অকলশৰীয়াকৈ যুঁজ দিছে। এইবাৰ ত্ৰিপুৰাত অকলে জিলা পৰিষদ দখল কৰিব বুলি দাবী কৰিছে বিজেপিয়ে। টিপ্ৰা মথাৰ কেইবাগৰাকীও নেতাই গেৰুৱা শিবিৰত যোগদান কৰিছে।
