বৰ্ণ বিদ্বেষৰ বলি হৈ ডেৰাডুনত মৃত্যু হয় ত্ৰিপুৰাৰ ছাত্ৰ এঞ্জেল চাকমাৰ। গণ প্ৰহাৰৰ উপৰিও এদল দুষ্কৃতিকাৰীয়ে তেওঁক ছুৰীকাঘাত কৰি হত্যা কৰাৰ অভিযোগ উত্থাপন হৈছে। এইবাৰ ৰাষ্ট্ৰীয় মানৱ অধিকাৰ আয়োগে এই ঘটনাত ডেৰাডুন জিলা দণ্ডাধীশ আৰু এছ এছ পিলৈ জাননী প্ৰেৰণ কৰিছে।
জানিব পৰা মতে, ৰাষ্ট্ৰীয় মানৱ অধিকাৰ আয়োগৰ সদস্য প্ৰিয়াংক কানুনগোৰ নেতৃত্বত গঠিত বিচাৰপীঠে ১৯৯৩ চনৰ মানৱ অধিকাৰ সুৰক্ষা আইনৰ ১২ নং ধাৰাত শুনানি গ্ৰহণ কৰি আছে।
এজাহাৰত উল্লেখ কৰা হৈছে যে ত্ৰিপুৰাৰ ছাত্ৰজনক ডেৰাডুনত “বৰ্ণবাদী আক্ৰমণ কৰি উদ্দেশ্য প্ৰণোদিতভাৱে” নৃশংসভাৱে হত্যা কৰা হৈছিল। অভিযোগত দাবী কৰা হৈছে যে এই ঘটনাই মৃত ছাত্ৰজনৰ জীৱন আৰু সমতাৰ অধিকাৰ খৰ্ব কৰিছে।
ৰাষ্ট্ৰীয় মানৱ অধিকাৰ আয়োগে ডেৰাডুন প্ৰশাসনক সকলো অভিযোগৰ তদন্ত কৰিবলৈ নিৰ্দেশ দিছে। লগতে সাত দিনৰ ভিতৰত ঘটনা সন্দৰ্ভত এক ব্যৱস্থা গ্ৰহণ কৰা প্ৰতিবেদন দাখিল কৰিবলৈও কৈছে। আয়োগে এই গোচৰৰ প্ৰতিবেদনৰ প্ৰতিলিপি উত্তৰাখণ্ডৰ মুখ্য সচিব আৰু আৰক্ষীৰ ডিজিপিলৈ প্ৰেৰণ কৰাৰো নিৰ্দেশ দিছে।
এই ঘটনাত কংগ্ৰেছৰ সাংসদ শশী থাৰুৰ সৰৱ হৈছে। থাৰুৰে নিজৰ এক্স হেণ্ডেলত লিখিছে, “এয়া কোনো বিচ্ছিন্ন কাণ্ড নহয়। দেশৰ বাবে এইটো এটা লজ্জাজনক অধ্যায়। আমি এনে এখন সমাজ গঢ়ি তুলিব লাগিব য’ত কোনো ভাৰতীয়ই যাতে বিদেশী অনুভৱ নকৰে।”
তেওঁ লগতে লিখিছে, “সকলো বিদ্যালয়তে ভাৰতীয় ইতিহাস আৰু সংস্কৃতিৰ শিক্ষা দিয়া উচিত। সংবাদ মাধ্যমেও উত্তৰ-পূব ভাৰতৰ জনসাধাৰণক মৰ্যাদা দিব লাগে। কোনো পক্ষপাতিত্ব হ’ব নালাগে। ৰাজনৈতিক নেতাসকলে মাত মাতিব লাগে। মনত ৰাখিব, মৌনতা মানে অপৰাধক সহ্য কৰা।”
কংগ্ৰেছ সাংসদ ৰাহুল গান্ধীয়ে কয়, “ডেৰাডুনত এঞ্জেল চাকমা আৰু তেওঁৰ ভাতৃ মাইকেলৰ লগত যি হ’ল সেয়া এক ভয়ংকৰ অপৰাধ। ঘৃণা এৰাতিৰ ভিতৰতে প্ৰকাশ নাপায়। বছৰ বছৰ ধৰি বিশেষকৈ যুৱক-যুৱতীসকলৰ মাজত প্ৰতিদিনে বিষাক্ত বিষয়বস্তু প্ৰচাৰ হৈ আছে। ঘৃণাত লিপ্ত হোৱা শাসকীয় বিজেপি নেতৃত্বই ইয়াক স্বাভাৱিক কৰি তুলিছে।”
তেওঁ লগতে কয়, “ভাৰত ভয় আৰু অত্যাচাৰৰ ওপৰত নহয়, সন্মান আৰু ঐক্যৰ ওপৰত প্ৰতিষ্ঠিত। আমি প্ৰেম আৰু বৈচিত্ৰ্যৰ দেশ। আমি এনে এখন মৃত সমাজ হ’ব নালাগে য’ত সহ-ভাৰতীয়সকলে আক্ৰমণৰ সন্মুখীন হ’লে আনফালে চাই থাকিব।”
