৪ জুলাইত ত্ৰিপুৰাৰ খোৱাই জিলাৰ ঠেলাকুম অঞ্চলত ২১ নং আসাম ৰাইফলছৰ উদ্যোগত এটা স্বাস্থ্য শিবিৰ অনুষ্ঠিত হয়। শিবিৰটোৰ জৰিয়তে অঞ্চলটোৰ লোকসকলৰ মাজত স্বাস্থ্য সজাগতা বৃদ্ধি তথা বাৰিষা কালত পানীৰ পৰা হ’ব পৰা বিভিন্ন ৰোগ কেনেদৰে নিৰাময় কৰিব পৰা পৰা যায় সেই সম্বন্ধে আলোচনা কৰা হয়।
ঠেলাকুম অঞ্চলৰ যুৱ প্ৰজন্ম, মহিলা, শিশু তথা গাঁৱৰ জ্যেষ্ঠ লোকসকলে উক্ত স্বাস্থ্য শিবিৰটোত অংশগ্ৰহণ কৰে বুলি আসাম ৰাইফলছে এক প্ৰেছ বিজ্ঞপ্তিৰ জৰিয়তে প্ৰকাশ কৰে।
উল্লেখ্য যে বিশেষজ্ঞসকলৰ দ্বাৰা পৰিচালিত পানীৰ পৰা সংক্ৰমিত ৰোগ বিশেষকৈ কলেৰা, হেপাটাইটিছ এ, দেংগি আৰু টাইফয়ডৰ ভয়াবহতা সম্পৰ্কে তথা ইয়াৰ পৰা কেনেদৰে পৰিত্ৰাণ পাব পাৰি আদি বিষয়ে উক্ত স্বাস্থ্য শিবিৰটোত উপস্থিত থকা লোকসকলক অৱগত কৰে।
আসাম ৰাইফলছৰ উদ্যোগত আয়োজন কৰা এই স্বাস্থ্য শিবিৰটোৰ জৰিয়তে উক্ত অঞ্চলৰ লোকসকল যথেষ্ট উপকৃত হোৱা বুলি কোৱাৰ লগতে গাঁওবাসীয়ে আসাম ৰাইফলছক ধন্যবাদ জ্ঞাপন কৰে বুলিও প্ৰেছ বিজ্ঞপ্তিৰ জৰিয়তে জনায়।