ত্ৰিপুৰাৰ ফটিকৰয়ত পুখুৰীত পৰি দুটিকৈ শিশুৰ সলিলসমাধি

ত্ৰিপুৰাৰ উনাকোতি জিলাৰ ফটিকৰয় আৰক্ষী থানাৰ অন্তৰ্গত কুলেশনগৰ অঞ্চলৰ এটা পুখুৰীত পৰি দুটি শিশুৰ সলিলসমাধি ঘটে।

নিহত শিশু দুটিক মধুমিতা নামো (৬) আৰু তনুশ্ৰী নামো (৮) বুলি চিনাক্ত কৰা হৈছে। প্ৰাপ্ত তথ্য মতে আজি দিনৰ ভাগত সমীপৰে এটা পুখুৰীত গা ধুবলৈ যোৱা শিশুদুটিয়ে দুৰ্ভাগ্যক্ৰমে পানীত ডুবি মৃত্যুক সাবটিবলগীয়া হয়।

উল্লেখযোগ্য যে গা ধুবলৈ গৈ বহু সময়লৈকে ঘৰলৈ উভতি নহা শিশুদুটিক পৰিয়ালৰ লোকে বিচাৰ-খোঁচাৰ কৰাত উক্ত পুখুৰীত তেওঁলোকক উদ্ধাৰ কৰে।

উদ্ধাৰ কৰাৰ পিছতে তেওঁলোকক ততাতৈয়াকৈ প্ৰথমতে ফতিকৰয় চিকিৎসালয়লৈ আৰু তাৰ পিছত উনাকোতি জিলা চিকিৎসালয়লৈ লৈ যোৱা হৈছিল যদিও জিলা চিকিৎসালয়ত তেওঁলোকক মৃত ঘোষণা কৰা হয়।

দুটিকৈ শিশুৰ এইদৰে সলিল সমাধি ঘটা দুৰ্ভাগ্যজনক ঘটনাই পৰিয়ালৰ লগতে সমগ্ৰ অঞ্চলটোতে শোকৰ ছাঁ পেলাইছে।