দেশৰ চিকিৎসা ক্ষেত্ৰলৈ বিশিষ্ট বৰঙণি আগবঢ়োৱা অসমৰ এগৰাকী সু-চিকিৎসক ডাঃ সৰ্বেশ্বৰ চহৰীয়াক গুৱাহাটী বিশ্ববিদ্যালয়ে সন্মানীয় ডি লিট ডিগ্ৰী প্ৰদান কৰিব। বিশ্ববিদ্যালয় কৰ্তৃপক্ষই গ্ৰহণ কৰা সিদ্ধান্তত বিশ্ববিদ্যালয়খনৰ আচাৰ্য ৰাজ্যপাল অধ্যাপক জগদীশ মুখীয়ে অনুমোদন জনাইছে।
জানিব পৰা মতে অহা ৮ আগষ্টত অনুষ্ঠিত হ’বলগীয়া বিশ্ববিদ্যালয়খনৰ সমাৱৰ্তন অনুষ্ঠানত বিশিষ্ট চিকিৎসকগৰাকীক এই ডিগ্ৰী প্ৰদান কৰা হ’ব।
আনহাতে, বিশিষ্ট চিকিৎসক, গৱেষক তথা পদ্মশ্ৰী বটাঁপ্ৰাপক অসম সন্তান ডাঃ সৰ্বেশ্বৰ চহৰীয়াক চলিত বৰ্ষতে ‘টাইম্ছ অব্ ইণ্ডিয়া’ৰ তৰফৰ পৰা ২০১৮ চনৰ বৰ্ষশ্ৰেষ্ঠ চিকিৎসকৰ সন্মান আগবঢ়োৱা হৈছিল।
হায়দৰাবাদৰ হোটেল ‘নভ’টেল’ৰ প্ৰেক্ষাগৃহত সংবাদ গোষ্ঠীটোৰ দ্বাৰা আয়োজিত এক অনুষ্ঠানত ডাঃ চহৰীয়াক বৃক্ক সংৰোপণৰ ক্ষেত্ৰখনত দেখুওৱা অসাধাৰণ পাৰদৰ্শিতাৰ স্বীকৃতি স্বৰূপে ‘দ্য লিজেণ্ড অব্ দ্য ইয়েৰ ২০১৮ ইন ৰেনেল ট্ৰান্সপ্লেণ্টেশ্যন’ উপাধিৰে বিভূষিত কৰা হৈছিল।
উল্লেখযোগ্য যে চিকিৎসা বিজ্ঞানলৈ আগবঢ়োৱা চহৰীয়াৰ অনবদ্য অৱদানৰ স্বীকৃতি স্বৰূপে ভাৰত চৰকাৰে ২০১৪ চনত তেওঁক পদ্মশ্ৰী বটাঁৰে সন্মানিত কৰে।
১৯৪৫ চনত মঙলদৈৰ টেঙাবাৰীত জন্ম গ্ৰহণ কৰা ডাঃ চহৰীয়াই ১৯৭৫ চনত ভাৰতত সফলভাৱে সম্পন্ন প্ৰথমটো বৃক্ক সংৰোপণ অস্ত্ৰোপচাৰত অংশ লোৱাৰ পিছত ১৯৮১ চনৰ পৰা নিৰৱচ্ছিন্নভাৱে এই ক্ষেত্ৰত আত্মনিয়োগ কৰিছে।
এতিয়ালৈকে ডাঃ চহৰীয়াই অন্ধ্ৰ প্ৰদেশ, অসম, মহাৰাষ্ট্ৰ, ওড়িষ্যাকে ধৰি দেশৰ বিভিন্ন ৰাজ্যত ৩৫০০তকৈ অধিক বৃক্ক সংৰোপণ সম্পন্ন কৰিছে।
