ধাৰাসাৰ বৰষুণত মাটিৰ দেৱাল খহি ত্ৰিপুৰাত চাৰিজন লোকৰ মৃত্যু
বৃহস্পতিবাৰৰ নিশাৰ পৰা ত্ৰিপুৰাৰ বিভিন্ন অঞ্চলত হোৱা মূষলধাৰ বৰষুণৰ ফলত চাৰিজন লোকে কৰুণ মৃত্যুক সাৱটি ল’বলগীয়া হয়। নিশাৰে পৰা হৈ থকা এই ধাৰাসাৰ বৰষুণত মাটিৰ দেৱাল খহি লোক চাৰিজনৰ মৃত্যু ঘটে বুলি জানিব পৰা গৈছে।
উল্লেখ্য যে পশ্চিম ত্ৰিপুৰাৰ থামবুকবাৰী আৰু সুবালছিং অঞ্চলত সংঘটিত হৈছে এই ভয়াবহ প্ৰাকৃতিক দুৰ্যোগৰ ঘটনা। ওৰে নিশা চলা বৰষুনৰ ফলত মাটিৰ দেৱাল খহি থামবুকবাৰী অঞ্চলৰ একেটা পৰিয়ালৰে তিনিজন সদস্য আৰু সুবালছিং অঞ্চলৰ সমীপৰ এজন লোকে প্ৰাণ হেৰুৱাইছে।
ইফালে থামবুকবাৰী অঞ্চলৰে আন এজন লোক বেয়াকৈ আঘাতপ্ৰাপ্ত হয় যদিও বৰ্তমান তেওঁক চিকিৎসাৰ বাবে মোহৰপুৰ চিকিৎসালয়ত ভৰ্তী কৰোৱা হৈছে।
এই কৰুণ ঘটনা সংঘটিত হোৱাৰ পাছতে গাঁওবাসীয়ে মৃতদেহ কেইটা উদ্ধাৰ কৰি ঘটনা সন্দৰ্ভত আৰক্ষীক খবৰ দিয়ে। লগে লগে আৰক্ষীৰ এটা বৃহৎ দল ঘটনাস্থলীত আহি উপস্থিত হয় আৰু মৃতদেহকেইটা মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰে।
আনহাতে জানিব পৰা মতে যোৱা নিশাৰ পৰা হৈ থকা মূষলধাৰ বৰষুণৰ ফলত ত্ৰিপুৰাৰ স্বাভাৱিক জন জীৱন ব্যাহত হৈ পৰাৰ লগতে ৰাজ্যখনৰ বহু গুৰুত্বপূৰ্ণ পথ বন্ধ হৈ পৰিছে।