দেশবাসী বিশেষকৈ দুখীয়াসকলৰ বাবে অত্যাৱশ্যকীয় দৰৱ সুলভ কৰি তোলাৰ প্ৰতিশ্ৰুতিৰে আৰম্ভ কৰা প্ৰধান মন্ত্ৰী নৰেন্দ্ৰ মোদীৰ উচ্চাকাংক্ষী আঁচনি ‘জন ঔষধি যোজনা’ ধোঁৱাচাঙত উঠাৰ অভিযোগ উত্থাপিত হৈছে।
জেনেৰিক দৰৱ যোগানৰ বাবে গুৱাহাটীৰ উইনট্ৰব হস্পিটেলত যোৱা ডিচেম্বৰ মাহৰ পৰা খোলা ফাৰ্মাচিখনত যোৱা এমাহ ধৰি কোনো জেনেৰিক দৰৱ যোগান ধৰা হোৱা নাই বুলি এন ই নাও-ৰ সৈতে হোৱা কথা-বাৰ্তাত জানিবলৈ দিছে চিকিৎসালয়খনত কৰ্মৰত ডাঃ ত্ৰিদীৱ বৰুৱাই।
কেন্দ্ৰীয় চৰকাৰৰ ৰসায়ন আৰু সাৰ মন্ত্ৰ্যালয়ৰ অধীনত আৰম্ভ কৰা এই জন ঔষধি যোজনা অনুসৰি প্ৰতিখন ৰাজ্যত ৰাজ্য আৰু কেন্দ্ৰীয় দুয়ো চৰকাৰৰ যৌথ তদাৰকীত দৰৱ যোগানকে ধৰি সকলো দিশ নিয়ন্ত্ৰণ হয়।
উল্লেখযোগ্য যে ফাৰ্মাচিখনৰ ফাৰ্মাচিষ্ট ৰিদীপ শৰ্মাই জানিবলৈ দিয়া মতে সাধাৰণ ফাৰ্মাচিত ১০০ টকা মূল্যৰ কোনোটো দৰৱ সুলভ মূল্যৰ ফাৰ্মাচিখনত আনকি ১৫ৰ পৰা ২০ টকাতো উপলব্ধ হয়।
সুলভ হোৱা বাবে বহু ৰোগীয়ে বৰ্তমান এই জেনেৰিক ঔষধহে বিচৰাৰ বিপৰীতে দৰৱসমূহ উপলব্ধ নোহোৱা বাবে ‘হাহাকাৰ পৰিস্থিতিৰ সৃষ্টি হৈছে’ বুলি উল্লেখ কৰি ডাঃ বৰুৱাই কয় যে ‘যদি ৰোগীক সুলভ মূল্যত ঔষধৰ যোগান ধৰিব নোৱাৰে তেন্তে এনে আঁচনি চৰকাৰে গ্ৰহণ কৰিব নালাগিছিল।’
ডিচেম্বৰৰ পৰা ফেব্ৰুৱাৰিলৈকে ঔষধৰ যোগান সঠিকভাৱেই হৈ আছিল, কিন্তু মাৰ্চৰ আৰম্ভণিৰে পৰা তেওঁলোকে কোনোধৰণৰ ঔষধ লাভ কৰা নাই বুলি নৰ্থ ইষ্ট নাওৰ সৈতে হোৱা কথা-বতৰাত ডাঃ বৰুৱাই জনায়।
তদুপৰি ‘চৰকাৰে প্ৰায় ৬০০ বিধ ঔষধৰ যোগান ধৰাৰ প্ৰতিশ্ৰুতি প্ৰদান কৰিছিল যদিও বৰ্তমান মাত্ৰ ১০০ বিধমান ঔষধহে যোগান ধৰিছে। উদাহৰণস্বৰূপে পেটৰ ৰোগ, ডায়েবেটিছ, জ্বৰ, কাঁহ আদি বেছিকৈ হোৱা ৰোগৰ ঔষধ পৰ্য্যাপ্ত পৰিমাণত থাকিব লাগিছিল যদিও সেয়া বৰ্তমান আমাৰ ফাৰ্মাচিত পোৱা নাযায়‘ বুলিও চিকিৎসকজনে জানিবলৈ দিয়ে।
