ধৰ্ম ইছলাম, কিন্তু জাতি অসমীয়া। নাগৰিকত্ব বিধেয়কৰ বোকোচাত উঠি হিন্দু-মুছলমান পৰিচয়ক লৈ অসমত পূৰ্বে নোহোৱা ধৰণৰ সামাজিক-ৰাজনৈতিক বিতৰ্কৰ উন্মেষ ঘটাৰ পৰতে ৩ হাজাৰ হজযাত্ৰীয়ে মক্কাত উৰুৱাব অসমৰ পৰিচয়ৰ নিচান অসমীয়া গামোচা।
হজ সমাপনৰ মুহূৰ্তত ডিঙিত আদৰৰ গামোচাখন লোৱাৰ লগতে অসম তথা উত্তৰ-পূবৰ পৰা যোৱা ৩ হাজাৰ হজযাত্ৰীয়ে তেওঁলোক থকা ফ্লেটসমূহটো উৰাই ৰাখিব অসমীয়া গামোচা।
‘উত্তৰ-পূবৰ তিনি হেজাৰ হজ যাত্ৰীয়ে অসমীয়া সংস্কৃতিৰ বাহক, অসমীয়াৰ অতি আদৰৰ গামোচাখনি হজ সমাপনৰ বাবে যোৱা মুহূৰ্তত ডিঙিত লৈ ঘূৰিব। হজযাত্ৰীসকলে মক্কাত থাকিবলগীয়া প্ৰতিটো ফ্লেটটো উৰাই ৰাখিব অসমীয়াৰ আদৰৰ গামোচা,’ নলবাৰীত হজযাত্ৰীসকলৰ এক সভাত এই কথা জানিবলৈ দিয়ে অধিবক্তা, প্ৰাক্তন আছু নেতা তথা উত্তৰ পূৰ্বাঞ্চল হজ যাত্ৰী সমন্বয়ক সমিতিৰ কাৰ্যকৰী সভাপতি নেকিবুৰ জামানে।
গামোচাখনৰ যোগেদি অসমীয়া কৃষ্টি-সংস্কৃতিক বিশ্ব দৰবাৰলৈ নিয়াৰ প্ৰয়াস কৰা হৈছে বুলি প্ৰকাশ কৰি জামানে লগতে কয় যে উৰি থকা গামোচাখনৰ জৰিয়তে হজ সমাপন কৰি অহা উত্তৰ-পূবৰ হজযাত্ৰীসকলৰ বাবে নিজৰ নিজৰ ফ্লেটসমূহ চিনাক্ত কৰাটো সহায়ক হ’ব।
নলবাৰীৰ টাউন মোক্তাবত গিয়াছ আলীয়ে পৰিচালনা কৰা আয়োজিত সভাখনত স্থানীয় বিধায়ক অশোক শৰ্মা, উপায়ুক্ত সঞ্জীৱ কুমাৰ দাস, অতিৰিক্ত আৰক্ষী অধীক্ষক সুৰেন মছাহাৰীকে ধৰি ভালেসংখ্যক ব্যক্তিয়ে অংশগ্ৰহণ কৰে।
১৪ জুলাইৰ পৰা ২২ জুলাইলৈকে উত্তৰ-পূবৰ তিনি হেজাৰ হজযাত্ৰীয়ে মক্কালৈ হজ সমাপনৰ বাবে যাব।