নগাৱঁৰ ধিঙৰ ভিতৰুৱা ঠাইৰ ছোৱালী হিমা দাসে আন্তঃৰাষ্ট্ৰীয় এথলেটিকছত দপদপাই থকাৰ সময়তে গুৱাহাটীৰ অস্মিতা চলিহাই এক প্ৰকাৰৰ চাঞ্চল্য সৃষ্টি কৰিছে দেশৰ ক্ৰীড়া ক্ষেত্ৰত।
অসমৰ প্ৰতিভাৱান বেডমিণ্টন খেলুৱৈ ১৮ বছৰীয়া অস্মিতাই হায়দৰাবাদত চলি থকা অল ইণ্ডিয়া ছিনিয়’ৰ বেডমিণ্টনত আজি উইমেন ছিংগলছ শাখাত বিজয়ী হয় দেশৰ তৃতীয় ৰেংকৰ খেলুৱৈ উত্তেজিতা ৰাওক 21-16, 14-21, 21-15-ত পৰাজিত কৰি।
ফাইনেলত দেশৰ তৃতীয় শীৰ্ষস্থানৰ খেলুৱৈ অন্ধ্ৰ প্ৰদেশৰ উত্তেজিতা ৰাৱে ফেভাৰিট হিচাপেই অৱতীৰ্ণ হৈছিল যদিও অস্মিতাৰ প্ৰাণোচ্ছ্বল, সতেজ ক্ৰীড়া প্ৰতিভাৰ আগত মূৰকত হাৰ মানে। এই জয়েৰে অস্মিতাই এছিয়ান গেইমছত ভাৰতক প্ৰতিনিধিত্ব কৰিব লগীয়া দলতো স্থান নিশ্চিত কৰিলে। অৱশ্যে বেংগালুৰু টুৰ্নামেণ্টত জিকাৰ সূত্ৰে উ্তেজিতায়ো এই দলত স্থান নিশ্চিত কৰি থৈছে।
আনহাতে অস্মিতাই এই চাঞ্চল্য সৃষ্টি কৰা জয়েৰে দেশৰ বেডমিণ্টন খেলৰ জগতখনত অসমৰ নাম উজলাই তুলিলে।
মন কৰিব লগীয়া যে ফাইনেলত প্ৰৱেশ কৰাৰ পূৰ্বে ছেমিফাইনেলতো ১৮ বছৰীয়া অস্মিতাই দেশৰ জুনিয়’ৰ চেম্পিয়ন আকাশী কাশ্যপক 19-21, 21-17, 21-12 ব্যৱধানত হৰুৱাইছিল।
ফাইনেলৰ প্ৰথম ছেটত 8-11 লৈকে পিছপৰিও অস্মিতাই মনোবল আৰু স্নায়ুচাপৰ যুঁজত বিপক্ষক পিছ পেলাই 21-16 ব্যৱধানত ছেটটো দখল কৰিছিল। পুনৰ দ্বিতীয় ছেট অস্মিতাৰ হাতৰ পৰা 14-21 ব্যৱধানত হেৰুৱাব লগীয়া হয় অস্মিতাই। ফলত তৃতীয় তথা নিৰ্ণায়ক ছেটটো যথেষ্ট চাপৰ মাজত খেলে দুয়োগৰাকী প্ৰতিযোগীয়ে। এটা সময়লৈকে উত্তেজিতাই 10-6 ৰ অগ্ৰগতি লৈ আছিল। কিন্তু তাৰ পিছতে অস্মিতাই একেৰাহে 6 টা পইণ্ট দখল কৰে। ফলত চাপত পৰে উত্তেজিতা। শেষ পৰ্য্যন্ত 21-15 ব্যৱধানত ছেটটো দখল কৰি হাঁহি মাৰেগৈ অস্মিতাই।
বেডমিণ্টনক কেৰিয়াৰ হিচাপে লোৱা আৰু এইবাৰ দ্বাদশ শ্ৰেণীৰ পৰীক্ষাত অৱতীৰ্ণ হোৱা অস্মিতাই ইয়াৰ পূৰ্বেও কেইবাটাও সফলতা দেখুৱাইছে। যোৱা বছৰ অনুষ্ঠিত ৪২ সংখ্যক জুনিয়’ৰ নেশ্যনেল বেডমিণ্টনত তেওঁ ৰূপৰ পদক লাভ কৰিছিল। মালয়েছিয়াৰ তাৰকা বেডমিণ্টন খেলুৱৈ লী চং ৱেইক আদৰ্শ হিচাপে লোৱা গুৱাহাটীৰ যুৱ খেলুৱৈগৰাকীৰ এই ঈৰ্ষণীয় সাফল্য আৰু বৰ্তমান ইণ্ডিয়াৰ ট্ৰেক ৰাণীত পৰিণত হোৱা ধিঙৰ হিমা দাসক লৈ আগন্তুক জাকাৰ্টা এছিয়ান গেইমছত সপোন দেখিবলৈ আৰম্ভ কৰিছে অসমবাসীয়ে।
