এছিয়াৰ সৰ্ববৃহৎ গীৰ্জা হিচাপে পৰিগণিত হোৱা নাগালেণ্ডত থকা ছুমি ব্যাপ্তিষ্ট গীৰ্জাঘৰত এই বছৰ প্ৰথমবাৰৰ বাবে খ্ৰীষ্টমাছ উদযাপনৰ প্ৰস্তুতি সম্পূৰ্ণ হৈ উঠিছে। নাগালেণ্ডৰ ঝুনেহেবুট’ চহৰৰ পাহাৰত অৱস্থিত এই বিশেষ গীৰ্জাঘৰটো।
ডিমাকৃতিৰ গীৰ্জাঘৰটোত ৮,৫০০ লোক বহিব পৰা ব্যৱস্থা আছে আৰু ইয়াৰ ২৭ টা কোঠালি আছে। নীলা আৰু বগা ৰঙৰ সংমিশ্ৰণ ঘটা ছুমি ব্যাপ্তিষ্ট গীৰ্জাঘৰটোত অকল ঝুনেহেবুট’ জিলাৰে প্ৰায় ২০ খন গাওঁৰ লোকক দেখা যাব।
এছিয়াৰ সৰ্ববৃহৎ গীৰ্জাটো ২০০০ তকৈয়ো অধিক কৰ্মীৰ সহযোগত ৩৬ কোটি টকা ব্যয়সাপেক্ষে নিৰ্মাণ কৰি উলিওৱা হৈছে। গীৰ্জাঘৰটো নিৰ্মাণ কৰোতে প্ৰায় দহ-এঘাৰ বছৰ সময়ৰ প্ৰয়োজন হৈছিল।
ছুমি ব্যাপ্তিষ্ট গীৰ্জাঘৰটো ডিজাইন কৰিছে একিটেকতুৰা ফাৰ্মৰ আৰ্কিটেক্ট হনোহলি কে চিশি-ঝিমমিয়ে। তেওঁ এই ৰাজকীয় নিৰ্মাণৰ ডিজাইনেৰে ইতিহাস সৃষ্টি কৰিছে।
‘’ ঝুনহেবুট’ গীৰ্জাটো ১৩ বছৰ আগতে ডিজাইন কৰা হৈছিল আৰু ইয়াৰ নিৰ্মাণৰ বাবে সময় লৈছিল প্ৰায় দহ-এঘাৰ বছৰ। গতিকে ই এটা অতি দীঘলীয়া কিন্তু ভাল প্ৰকল্প। এতিয়া, মই যেতিয়া উভতি চাওঁ, বিশেষকৈ ডিজাইনটো চাই প্ৰকাশ কৰা সকলোৰে সন্তুষ্টিৰ কথা ভাৱো, সেইটোৱে মোক আনন্দ দিয়ে,’’-আৰ্কিটেক্টগৰাকীয়ে এইদৰে কয়।
