নিৰ্বাচনকেন্দ্ৰিক ৰাজনৈতিক অস্থিৰতাত থকা নাগালেণ্ডৰ শানাধিষ্ঠিত নাগালেণ্ড পীপলছ ফ্ৰণ্ট, চমুকৈ এন পি এফে আগন্তুক বিধানসভা নিৰ্বাচনত অংশগ্ৰহণ কৰা-নকৰা সন্দৰ্ভত দলীয় স্থিতি স্পষ্ট কৰি কৈছে যে এই ক্ষেত্ৰত তেওঁলোক এটা ব্যতিক্ৰম হৈ থাকিব নোৱাৰে, যিহেতু নিৰ্বাচন বৰ্জন সম্পৰ্কত সকলো নাগা সংগঠন আৰু ৰাজনৈতিক দল এটা সহমতত উপনীত হ’ব পৰা নাই। ইয়াৰ পৰা এইটোৱে স্পষ্ট হৈছে যে যোৱা ২৯ জানুৱাৰিত নিৰ্বাচন বৰ্জন কৰাৰ বাবে এটা যৌথ ঘোষণাত চহী কৰা সত্ত্বেও দলটোৱে নিৰ্বাচনত অংশগ্ৰহণ কৰাৰ দিশত খোজ দিছে।
উল্লেখযোগ্য যে নাগা ৰাজনৈতিক সংকটৰ সমাধান নিৰ্বাচনৰ পূৰ্বেই সমাধা কৰাৰ দাবীত যোৱা ২৯ জানুৱাৰিত নাগালেণ্ডৰ ১১ টা ৰাষ্ট্ৰীয় আৰু ৰাজ্যিক দলৰ প্ৰতিনিধি মিলি এটা উমৈহতীয়া ঘোষণাত চহী কৰিছিল, যাৰ বক্তব্য আছিল আগন্তুক নিৰ্বাচন কৰা। কিন্তু বিজেপি দলে ইয়াৰ পৰা ফালৰি কাটি আহি নিৰ্বাচনত অংশগ্ৰহণ কৰাৰ সিদ্ধান্ত লোৱাৰ লগতে যৌথ ঘোষণাটোত চহী কৰা তেওঁলোকৰ প্ৰতিনিধিজনকো নিলম্বিত কৰিছিল।
আনহাতে নাগা হোহো আৰু শীৰ্ষস্থানীয় বেচৰকাৰী সংগঠনবোৰৰ নেতৃবৰ্গই নিৰ্বাচন বৰ্জন কৰিবলৈ ৰাজনৈতিক দলবোৰলৈ আহ্বান জনাই আছে যদিও এটা স্পষ্ট সমূহীয়া স্থিতিত তেওঁলোকে উপনীত হ’ব পৰা নাই। তেওঁলোকে এই বিষয়ত ভৱিষ্যত কৰ্মপন্থা সম্পৰ্কে আলোচনা কৰিবলৈ কাইলৈ এখন সভা আহ্বান কৰিছে। এই পটপৰিৱৰ্তনৰ পৰিপ্ৰেক্ষিতত কংগ্ৰেছ আৰু এন পি এফ দলে এতিয়া ৰাজ্যখনত নিৰ্বাচনত অংশগ্ৰহণ কৰাৰ সিদ্ধান্ত লৈছে।
‘যিহেতু আটাইবোৰ ৰাজনৈতিক দলে নিৰ্বাচনৰ বাবে কুচকাৱাজ চলাই আছে, এটা পুৰণি দল হিচাপে ই ইয়াৰ নিৰ্বাচনী ইস্তাহাৰ প্ৰকাশ কৰিব।’ কংগ্ৰেছৰ সূত্ৰ এটাই এইদৰে কয়।
আনহাতে এন পি এফে এটা বিবৃতিত কয় যে এটা স্বীকৃত ৰাজনৈতিক দল হিচাপে তেওঁলোক সমাজবাদ, ধৰ্ম নিৰপেক্ষতা আৰু গণতন্ত্ৰৰ প্ৰতি গভীৰভাৱে আনুগত্যশীল। ইয়াৰ পিছতো নাগা ৰাজনৈতিক সমস্যাৰ সমাধানৰ প্ৰতি দলটোৰ দায়বদ্ধতা অব্যাহত থাকিব।
বিবৃতিটোত কোৱা হয় যে দলটোৱে নাগা সমস্যাৰ সমাধানৰ বাবে পূৰ্বেও বহু গুৰুত্বপূৰ্ণ সংকট মূৰ পাতি লৈছে। ইয়াৰ ভিতৰত দলটোৱে ১৯৯৮ চনত বৃহত্তৰ ৰাজহুৱা স্বাৰ্থত নিৰ্বাচন বৰ্জন কৰি নিৰ্বাচন আয়োগৰ ৰোষৰ সন্মুখীন হৈ প্ৰতীক হেৰুওৱাৰ লগতে ইয়াৰ স্বীকৃতিবিহীন হৈছিল।
দলটোৱে এইটোও আঙুলিয়াই দিয়ে যে ভাৰত চৰকাৰে বাৰে বাৰে কৈ আছে যে সময়ত নিৰ্বাচন অনুষ্ঠিত কৰাটো এটা সাংবিধানিক প্ৰয়োজন আৰু কেন্দ্ৰ সাংবিধানিক ব্যৱস্থাৰ দ্বাৰা বান্ধ খাই আছে। গতিকে ২৭ ফেব্ৰুৱাৰিৰ নিৰ্বাচনত অংশগ্ৰহণ কৰাটো এটা বাস্তৱতা।
