নাগা শান্তি (Naga Peace) চুক্তিয়ে অসমৰ লগতে উত্তৰ-পূবৰ কোনো ৰাজ্যৰে ভৌগোলিক অখণ্ডতা খৰ্ব নকৰে। আজি ৭ এপ্ৰিলত গুৱাহাটীত এক সংবাদমেলত এইদৰে কয় কেন্দ্ৰীয় গৃহ ৰাজ্য মন্ত্ৰী কিৰেন ৰিজিজুৱে।
ৰাজ্যৰ ভূমি হেৰাব বুলি অসমকে ধৰি নাগালেণ্ডৰ সীমামূৰীয়া ৰাজ্যসমূহৰ জনসাধাৰণ দীৰ্ঘদিন ধৰি উদ্বিগ্ন হৈ থকা এই নাগা শান্তি ‘আলোচনা ৰাজনৈতিক সমাধানৰ বাবে আৰু ই ৰাজ্যসমূহৰ ভূখণ্ডৰ সত্যাসত্য পৰীক্ষণৰ বাবে নহয়’ বুলি তেওঁ সংবাদমেলখনত মন্তব্য কৰে।
অসমৰ মাটি যে নাগালেণ্ডত নাযায় ‘তাক লৈ আপোনালোকে সম্পূৰ্ণৰূপে নিশ্চিত হ’ব লাগে’ বুলি উল্লেখ কৰি মন্ত্ৰীজনে কয় যে গোটেই উত্তৰ-পূৰ্বাঞ্চলৰ ৰাজ্যসমূহৰ ভৌগোলিক অখণ্ডতা অক্ষুন্ন থাকিব আৰু ৰাজ্যসমূহৰ সীমা পূৰ্বে যিদৰে নিৰ্ধাৰণ কৰা হৈছে তাত এক ইঞ্চিও ইফাল-সিফাল নহয়।
কিন্তু আন্তঃৰাজ্যিক সীমাসমূহক লৈ উত্তৰ-পূৰ্বাঞ্চলৰ ৰাজ্যসমূহৰ মাজৰ দীৰ্ঘদিন ধৰি মাজে-মাজে উত্তপ্ত পৰিস্থিতিৰ সৃষ্টি হয় আৰু শেহতীয়াকৈ অসম-মিজোৰাম সীমান্তৰ এটা এলেকা ‘বিবদমান’ বুলি কেন্দ্ৰীয় গৃ্হ মন্ত্ৰ্যালয়েই স্বীকাৰ কৰি কিছুদিন পূৰ্বে যুটীয়া গৃ্হ সচিবক পৰিদৰ্শনৰ বাবে পঠিয়াইছিল। ৰাজ্যসমূহৰ মাজৰ এনে সীমা বিবাদ সন্দৰ্ভত তেওঁ কোনো মন্তব্য আজিৰ সংবাদমেলত কৰা নাছিল।
এন ই নাও-এ কৰা কিৰেন ৰিজিজুৰ সংবাদমেলৰ ফে’ছবুক লাইভ ভিডিঅ’ চাবলৈ ইয়াত ক্লিক কৰক।
আনহাতে ২০১৫ চনত স্বাক্ষৰ কৰা নাগা ফ্ৰে’মৱৰ্ক বা আধাৰ চুক্তি (Frame-work agreement)ক বহুতে ভুল বুজা বুলি উল্লেখ কৰি তেওঁ কয় ‘নাগা শান্তি আলোচনা দীৰ্ঘদিন ধৰি চলি আহিছে। আমি কৈছিলো যে আমি নিৰ্দিষ্ট সময়সীমা লৈ আগবাঢ়িম। কিন্তু তাৰ আগতে আমি এক ধৰণৰ বুজাবুজিলৈ অহাটো দৰকাৰ, যাৰ আধাৰত আলোচনাটো আগবাঢ়িব। সেয়ে আধাৰ চুক্তিখন কৰা হৈছিল। তেওঁলোকৰ কাৰ্য্যসূচীত সাৰ্বভৌমত্বকে ধৰি আন কিছুমান গুৰুতৰ বিষয় আছিল, যিবোৰ তেওঁলোকে পৰিহাৰ কৰিলে। ভাৰতীয় সংবিধানৰ আধাৰতে আলোচনা আগবাঢ়িব আৰু সেইটোৱে হ’ল আধাৰ চুক্তি।’
তেওঁ কয় যে ‘নাগাসকলৰ অনন্য ঐতিহ্যক স্বীকৃতি দিয়াটোত ফ্ৰে’মৱৰ্ক চুক্তিয়ে জোৰ দিছে। শান্তি আলোচনা সুচাৰুৰূপে চলি আছে আৰু সম্পূৰ্ণ স্পষ্টতাৰ সৈতে আগবাঢ়িছে।’
