মিজোৰামৰ আগশাৰীৰ ছাত্ৰ সংগঠন মিজো জিৰলাই পউল (এম জে পি) বা মিজো ছাত্ৰ সংস্থাই অসম চৰকাৰৰ ইচ্ছানুসৰি যদি কেন্দ্ৰীয় চৰকাৰে অসম-মিজোৰামৰ মাজৰ ৰাজ্যিক সীমান্তৰ মীমাংসা কৰিব খোজে তেনেহ’লে ১৯৬৬ ৰ পৰিস্থিতিৰ পুনৰাবৃত্তি ঘটাৰ ভাবুকি দিছে।
১৯৬৬ চনৰ ১ মাৰ্চত মিজোৰামে ভাৰত ৰাষ্ট্ৰৰ পৰা ‘স্বাধীনতা’ ঘোষণা কৰিছিল য’ত সাৰ্বভৌমত্বৰ বাবে তেওঁলোকৰ বহুতেই জীৱন হেৰুৱাবলগীয়া হৈছিল।
ছাত্ৰ সংগঠনটোৰ নেতৃবৰ্গই মঙলবাৰে নতুন দিল্লীত অসম আৰু মিজোৰামৰ মুখ্য সচিব দুগৰাকীৰ সৈতে হোৱা আলোচনা সম্পৰ্কত নিজৰ মত প্ৰকাশ কৰি কয় যে তেওঁলোকে নৰেন্দ্ৰ মোডীৰ চৰকাৰখনৰ প্ৰতি আস্থা হেৰুৱাইছে।
শেহতীয়াকৈ আন্ত:ৰাজ্যিক সীমান্তত উদ্ভৱ হোৱা সমস্যাটোৰ সমাধানৰ বাবে কেন্দ্ৰীয় গৃহমন্ত্ৰী ৰাজনাথ সিঙে দুয়োখন ৰাজ্যৰ মুখ্যসচিবক ৰাষ্ট্ৰীয় ৰাজধানীত এখন বৈঠকলৈ মাতি নিছিল। উক্ত বৈঠকত অধ্যক্ষতা কৰিছিল কেন্দ্ৰীয় গৃহ সচিব ৰাজীৱ গৌবাই।
যোৱা ৮ আৰু ১০ মাৰ্চত অসম সীমান্তৰ ওচৰত মিজোৰামৰ কলাশিৱ জিলাৰ জ’ফাই বৈৰাবীত মিজো ছাত্ৰৰ ওপৰত অসম আৰক্ষীৰ আতিশয্যৰ বিৰুদ্ধে বৃহস্পতিবাৰে আইজলত ছাত্ৰ নেতাসকলে এক তীব্ৰ প্ৰতিবাদ সাৱ্যস্ত কৰে।
প্ৰতিবাদী কাৰ্যসূচীৰ সময়ত মিজো জিৰলাই পউলৰ নেতাসকলে তেওঁলোকৰ দৃষ্টিভংগী দোহাৰি কয় যে মিজোৰাম চৰকাৰে ১৮৭৩ ৰ বেংগল ইষ্টাৰ্ণ ফ্ৰন্টিয়াৰ ৰেগুলেশ্যনৰ অধীনত ১৮৭৫ত জাৰি কৰা স্থিতিৰ বাহিৰে আন্ত:ৰাজ্যিক সীমাৰ কোনো নতুন সিদ্ধান্ত কেতিয়াও গ্ৰহণ কৰা উচিত নহয়।
ছাত্ৰ নেতাসকলে লগতে দাবী কৰে যে অসমে মিজোৰাম ইয়াৰ অংশ হৈ থকাৰ সময়ত মিজো জিলা পৰিষদৰ আওতাত থকা ৫০৯ বৰ্গ কিলোমিটাৰ জোৰা আন্ত:ৰাজ্যিক বনাঞ্চল হস্তান্তৰ কৰা উচিত।
