ধেমাজিৰ কছাৰী ময়দানত প্ৰায় দহ সহস্ৰাধিক লোকৰ উপস্থিতিত নাগৰিকত্ব সংশোধনী বিধেয়ক ২০১৬’ৰ বিৰোধিতাৰে শনিবাৰে অনুষ্ঠিত গণ সত্যাগ্ৰহ কাৰ্যসূচীত ৰাজ্য আৰু কেন্দ্ৰীয় চৰকাৰক সকীয়ানি প্ৰদান কৰি বিধেয়কখনৰ বিৰোধিতাৰে ৰাইজক ঐক্যবদ্ধ সংগ্ৰাম চলাই যাবলৈ আহ্বান জনায় আছুৰ সাধাৰণ সম্পাদক লুৰীণজ্যোতি গগৈয়ে।
ধেমাজি জিলা ছাত্ৰ সন্থাৰ উদ্যোগত ৰূপায়িত শনিবাৰৰ গণ সত্যাগ্ৰহৰ জৰিয়তে সদৌ অসম ছাত্ৰ সন্থা আৰু ২৮টা জনগোষ্ঠীয় সংগঠনৰ প্ৰতিনিধি আৰু স্থানীয় জনতাই দবা-শংখ-বৰতাল বজাই একপ্ৰকাৰ ৰাজ্য আৰু কেন্দ্ৰীয় চৰকাৰক বিধেয়কৰ বিৰুদ্ধে চলা সংঘবদ্ধ আন্দোলনৰ বাৰ্তা প্ৰেৰণ কৰে।
‘জাতি-মাটি-ভেটি ৰক্ষাৰ প্ৰতিশ্ৰুতি দিয়া সৰ্বানন্দ সোণোৱালৰ চৰকাৰখনে নাগৰিকত্ব (সংশোধনী) বিধেয়কৰ পোষকতা কৰি অসমীয়া জাতিক চূড়ান্ত প্ৰতাৰণা কৰিছে। শেষ বিন্দু তেজ থকালৈকে আমি ধৰ্মৰ ভিত্তিত বিভাজন কৰিব বিচৰা নাগৰিকত্ব (সংশোধনী) বিধেয়ক ২০১৬ গৃহীত হ’বলৈ নিদিওঁ। আমাৰ স্পষ্ট কথা যে ১৯৭১ চনৰ ২৫ মাৰ্চৰ পিছত অসমত প্ৰৱেশ কৰা হিন্দু-মুছলমান সকলোৱেই অবৈধ বিদেশী। এই বিদেশীৰ বোজা অসমে নলয়’ — প্ৰতিবাদস্থলীত এই মন্তব্য কৰে সদৌ অসম ছাত্ৰ সন্থাৰ সাধাৰণ সম্পাদক লুৰীণজ্যোতি গগৈয়ে।
প্ৰতিবাদী সভাত অংশ লৈ শিল্পী মহেন্দ্ৰ হাজৰিকাই গীতেৰে ৰাইজক দেশ তথা স্বজাতিৰ ৰক্ষাৰ বাবে সংগ্ৰাম চলাই যোৱাৰ আহ্বান জনায় কয় যে জনতাই নিবিচৰা বিধেয়ক এখন জনতাৰ দ্বাৰা নিৰ্বাচিত চৰকাৰে একপ্ৰকাৰ হেঁচা প্ৰযোগ কৰি আইন হিচাপে গৃহীত কৰিব বিচৰাটো মাৰাত্মক ভুল সিদ্ধান্ত। জাতি-মাটি-ভেটিৰ কথা কোৱা সোণোৱাল চৰকাৰে বিধেয়কখন বাতিলৰ বাবে কেন্দ্ৰৰ ওচৰত দাবী উত্থাপন কৰক।
সদৌ অসম ছাত্ৰ সন্থাৰ উপ-সভাপতি চিত্ৰৰঞ্জন বসুমতাৰীয়ে কয় যে জাতীয় নায়কৰ আখ্যা পোৱা মুখ্যমন্ত্ৰী সৰ্বানন্দ সোণোৱালৰ নাগৰিকত্ব সংশোধনী বিধেয়কৰ সন্দৰ্ভত লোৱা ভূমিকাই অসমৰ ৰাইজক বৰ কষ্ট দিছে।
উল্লেখ্য যে শনিবাৰৰ গণ সত্যাগ্ৰহত ২৭ কিলোমিটাৰ নিলগৰ চিলাপথাৰকে ধৰি বিভিন্ন অঞ্চলৰ ৰাইজে দোকান-বজাৰ বন্ধ ৰাখি গণ সত্যাগ্ৰহ কাৰ্যসূচীত অংশ লৈছিল।
