নাগৰিকত্ব বিধেয়ক সন্দৰ্ভত বিধান সভাৰ জৰুৰী অধিৱেশন আহ্বানৰ দাবী
নাগৰিকত্ব সংশোধনী বিধেয়ক ২০১৬ বাতিলৰ দাবীত বাওঁ গণতান্ত্ৰিক দলৰ উমৈহতীয়া মঞ্চ ‘বাওঁ গণতান্ত্ৰিক মঞ্চ, অসম’ৰ সৈতে যৌথভাৱে আন্দোলন চলোৱাৰ বাবে আজি ১৭ মে’ত ঐক্যবদ্ধ হৈছে নাগৰিকত্ব আইন সংশোধনবিৰোধী মঞ্চ। গুৱাহাটীৰ এন চি পি দলৰ কাৰ্যালয়ত আজি অনুষ্ঠিত এক বৈঠকত বিধেয়কখনক ‘সংবিধান বিৰোধী, সাম্প্ৰদায়িক আৰু জাতিধ্বংসী’ বুলি অভিহিত কৰি ইয়াৰ বিৰুদ্ধে ঐক্যবদ্ধ সংগ্ৰামৰ পোষকতা কৰে দুয়োটা মঞ্চই।
অহা ২৯ মে’ত গুৱাহাটীত দুয়োটা সংগঠনে যৌথভাৱে এক ধৰ্মঘট কাৰ্যসূচী ৰূপায়িত কৰিব বুলি বৈঠকত সিদ্ধান্ত গ্ৰহণ কৰে। ‘জাতিধ্বংসী বিধেয়কখনৰ বিৰোধিতা কৰি প্ৰস্তাৱ গ্ৰহণ কৰিবলৈ বিধান সভাৰ জৰুৰী অধিৱেশন অনুষ্ঠিত কৰিবলৈ মুখ্য মন্ত্ৰী আৰু বিৰোধী দলপতিলৈ পত্ৰ প্ৰেৰণ’ কৰিবলৈ আজি সিদ্ধান্ত গ্ৰহণ কৰে।
‘অসম চুক্তিৰ আধাৰত বিদেশী নাগৰিকৰ সমস্যাটো সমাধান হ’ব লাগে’ বুলি দুয়োখন মঞ্চই স্পষ্ট মত ব্যক্ত কৰে।
বৈঠকত অসমৰ মানুহৰ ভাষা, কৃষ্টি, সংস্কৃতিৰ লগতে সামগ্ৰিকভাৱে অসমৰ বিভিন্ন জাতি-জনগোষ্ঠীৰ স্বকীয়তা ৰক্ষা আৰু ভাৰতৰ সংবিধানৰ ধৰ্মনিৰপেক্ষ চৰিত্ৰ অক্ষুন্ন ৰখাৰ স্বাৰ্থত সৰ্বস্তৰৰ জনগণক ঐক্যবদ্ধ কৰি বিধেয়খনৰ বিৰুদ্ধে বুজাবুজিৰে কাম কৰি যাব বুলি সিদ্ধান্ত গ্ৰহণ কৰে।
‘এই বিধেয়কখন আইনত পৰিণত কৰি ভাৰতক এখন ‘হিন্দু ৰাষ্ট্ৰ’ হিচাপে গঢ়ি তুলিবলৈ বিজেপি আৰু আৰ এচ এচ-এ ষড়যন্ত্ৰ’ কৰা বুলি অভিযোগ কৰি মঞ্চই ‘অসমৰ ৰাইজক এই ষড়যন্ত্ৰত ভোল নাযাবলৈ আহ্বান জনায়’।
লগতে ৰাজ্যৰ বিভিন্ন ভাষা-ভাষী আৰু সম্প্ৰদায়ৰ মাজৰ ঐক্য-শান্তি বিনষ্ট কৰিব পৰা শক্তিসমূহক প্ৰতিহত কৰিবলৈ ৰাইজক আহ্বান জনায়।
বৈঠকত নাগৰিকত্ব আইন সংশোধন বিৰোধী মঞ্চৰ অধ্যক্ষ ড: হীৰেন গোহাঁই, উদয়াদিত্য ভৰালী, হৰেকৃষ্ণ ডেকা আৰু বাওঁ গণতান্ত্ৰিক মঞ্চৰ উদ্ধৱ বৰ্মন, ৰমনী বৰ্মন, দেৱেন ভট্টাচাৰ্য, মুনিন মহন্ত প্ৰমুখ্যে ১১টা বাওঁ ৰাজনৈতিক দলৰ ভালেসংখ্যক নেতা-কৰ্মী উপস্থিত আছিল।