নাগৰিকত্ব সংশোধনী বিধেয়ক : কেন্দ্ৰক একমুখে সকীয়ালে নাগৰিকত্ব আইন সংশোধনী বিৰোধী মঞ্চ আৰু আছু, ২৮ জাতীয় সংগঠনে
“অসম চুক্তিৰ আধাৰতে অসমৰ বিদেশী নাগৰিকৰ জ্বলন্ত সমস্যাটো সমাধান কৰিবই লাগিব।” এই ঐক্যবদ্ধ দাবী আছুকে ধৰি২৮ জাতীয় সংগঠন আৰু নাগৰিকত্ব আইন সংশোধনী বিৰোধী মঞ্চৰ।
আজি নাগৰিকত্ব সংশোধনী বিধেয়ক, ২০১৬ সন্দৰ্ভত আলোচনা কৰিবলৈ মহানগৰস্থিত চহিদ ভৱনত এক বৈঠকত মিলিত হোৱাৰ সময়ত আছুকে ধৰি ২৮ জাতীয় সংগঠন আৰু নাগৰিকত্ব আইন সংশোধনী বিৰোধী মঞ্চৰ প্ৰতিনিধিসকলে বিধেয়কখনৰ স্পষ্ট আৰু ঐক্যবদ্ধ বিৰোধিতা কৰে। সংগঠনকেইটাই এই বিধেয়কখনৰ বিৰোধিতা কৰিবলৈ ৰাজপথলৈ ওলাব বুলিও কয়।
আটাইকেইটা সংগঠনে বিধেয়কখন আইনত পৰিণত কৰি অসমৰ জনগণৰ ওপৰত বলেৰে জাপি নিদিবলৈ আজি কেন্দ্ৰক কঠোৰ সকীয়নি দিয়ে। তেওঁলোকে বিধেয়কখন অনতি পলমে বাতিল কৰিবলৈ কেন্দ্ৰীয় চৰকাৰক একমুখে দাবী কৰে।
অসমৰ খিলঞ্জীয়া মানুহৰ পৰিচয়, অস্তিত্ব ভাষা, কৃষ্টি-সংস্কৃতিৰ প্ৰতি তীব্ৰ ভাবুকি কঢ়িয়াই অনা নাগৰিকত্ব আইনৰ সংশোধনী কোনোপধ্যে অসমৰ ৰাইজে মানি নলয় বুলি বৈঠকে দৃঢ়তাৰে মত প্ৰকাশ কৰে আৰু যিকোনো মূল্যৰ বিনিময়ত দিল্লীৰ এই ভয়ংকৰ ষড়যন্ত্ৰ প্ৰতিহত কৰা হ’ব বুলি স্পষ্ট মত প্ৰকাশ কৰে। বৈঠকে এই বিধেয়কখনৰ বিৰুদ্ধে আলোচনাৰ মেজত আৰু ৰাজপথৰ আন্দোলনৰ মাধ্যমেৰে নিজৰ নিজৰ মঞ্চৰ জৰিয়তে উভয় পক্ষই যুঁজ দি যাব বুলিও স্পষ্ট আৰু দৃঢ় মত প্ৰকাশ কৰিছে। আলোচনাত এই কথাও স্পষ্ট কৰি দিয়া হয় যে অসমত অবৈধ বাংলাদেশীৰো স্থান নাই আৰু সাম্প্ৰদায়িকতাৰো কোনো স্থান নাই।
বৈঠকত নাগৰিকত্ব আইন সংশোধনী বিৰোধী মঞ্চৰ তৰফৰ পৰা অধ্যক্ষ ড০ হীৰেন গোহাঁই, হৰেকৃষ্ণ ডেকা, উদয়াদিত্য ভৰালী, আৰু মঞ্চৰ আহ্বায়কদ্বয় ক্ৰমে মনজিৎ মহন্ত আৰু কমল কুমাৰ মেধি উপস্থিত থাকে। আনহাতে আছু আৰু ২৮টা জনগোষ্ঠীয় সংগঠনৰ তৰফৰ পৰা ক্ৰমে আছুৰ মুখ্য উপদেষ্টা ড০ সমুজ্জ্বল কুমাৰ ভট্টাচাৰ্য্য, সাধাৰণ সম্পাদক লুৰিণজ্যোতি গগৈ, সদৌ অসম ট্ৰাইবেল সংঘৰ সাধাৰণ সম্পাদক আদিত্য খাখলাৰী, নিখিল বড়ো ছাত্ৰ সন্থাৰ সভাপতি প্ৰমোদ বড়ো, নিখিল ৰাভা ছাত্ৰ সন্থাৰ সভাপতি ৰমেন সিং ৰাভা, উপ-সভাপতি বিপুল ৰাভা, সদৌ অসম শৰণীয়া কছাৰী ছাত্ৰ সন্থাৰ নেতা অৰুণ শৰণীয়া, গাৰো ছাত্ৰ সন্থাৰ নেতাদ্বয় ক্ৰমে ক্ৰনেল চাংমা আৰু বিজয় চাংমা, আছুৰ ক্ৰীড়া সম্পাদক পূৰ্ণ ডেকা, গাৰো ছাত্ৰ সন্থাৰ উপদেষ্টা ফৰিলিন আৰ মাৰাক আদি উপস্থিত আছিল।