আজি মহাবীৰ লাচিত দিৱস। ৰাজ্যখনৰ বিভিন্ন প্ৰান্তৰ লগতে নাজিৰাতো আজি লাচিত দিৱস পালন কৰা হৈছে। নাজিৰা নাট্য মন্দিৰ প্ৰাংগণত দিনজোৰা বৰ্ণাঢ্য কাৰ্যসূচীৰে অসমীয়া জাতিৰ শৌৰ্য বীৰ্যৰ প্ৰতীক মহাবীৰ লাচিত বৰফুকনক স্মৰণ কৰা হয়। লাচিত সেনা নাজিৰা মহকুমা সমিতিৰ উদ্যোগত উৎযাপন কৰা এই লাচিত দিৱসত এক ব্যতিক্ৰমী পদক্ষেপ গ্ৰহণ কৰিছে উদ্যোক্তাসকলে। যি সময়ত দৰিদ্ৰ ৰোগীয়ে এটুপি তেজৰ বাবে হাহাকাৰ কৰিবলগা হয় তেনে সময়তে লচিত সেনাৰ নাজিৰা মহকুমা সমিতিয়ে এক ৰক্তদান শিবিৰৰ আয়োজন কৰে। ৰক্তদান জীৱন দান মন্ত্ৰ সাৰোগত কৰি লাচিত সেনাৰ নাজিৰা মহকুমা সমিতিৰ ১০০ গৰাকীৰো অধিক সদস্যৰ লগতে স্থানীয় বহু ব্যক্তিয়ে শিবিৰত ৰক্তদান কৰে। লাচিত সেনাৰ সদস্যসকলে দৰিদ্ৰ ৰোগীৰ বাবে প্ৰয়োজনীয় ৰক্ত ধাৰাবাহিকভাৱে প্ৰদান কৰি যাব বুলি লাচিত দিৱসৰ দিনাই এক সংকল্প গ্ৰহণ কৰিছে।
