”জনসংখ্যাৰ অনুপাতে নাৰীৰ অপৰাধৰ ক্ষেত্ৰত ত্ৰিপুৰাই দেশৰ ভিতৰত তালিকাৰ আগফালে স্থান লৈছে। আৰু এইটো হৈছে ৰাজ্যখনত বাওঁ দল শাসনত থকা বাবে।” আজি এই বিস্ফোৰক মন্তব্য কৰে বিজেপি মহিলা মৰ্চাৰ ৰাষ্ট্ৰীয় সভানেত্ৰী বিজয়া ৰাহাতকাৰে। নেশ্যনেল ক্ৰাইম ৰেকৰ্ড ব্যুৰোৰ তথ্য (২০১৬) মতে যদিও ৰাজ্যখনৰ স্থান ১৪ নম্বৰতহে আছে, জনসংখ্যা অনুপাতে ইয়াৰ স্থান উদ্বেগজনকভাৱে ওপৰত। ৰাহাতকাৰে কয়। তেওঁ লগতে কয় যে ত্ৰিপুৰা এখন কম জনসংখ্যাৰ সৰু ৰাজ্য। গতিকে সেই অনুপাতে ইয়াত নাৰীৰ বিৰুদ্ধে অপৰাধৰ সংখ্যা বেছি। আনহাতে তেওঁ এই বুলিও অভিযোগ কৰে যে ত্ৰিপুৰাত দোষীয়ে শাস্তি পোৱাৰ হাৰো খুবেই কম। ইয়াৰ কাৰণ হিচাপে তেওঁ কৈছে যে মাৰ্ক্সবাদৰ শাসন থকা ত্ৰিপুৰাত বেছিভাগ অপৰাধেই গাপ দিয়া হয়, কিয়নো এইবোৰ তেওঁলোকৰ কেডাৰেই কৰে। ‘চৰকাৰখনৰ এনে কাৰ্য্যই অপৰাধক উৎসাহিত কৰে আৰু এইটো এটা উদ্বিগ্নতাৰ বিষয়।’ এই বুলি কয় নেত্ৰীগৰাকীয়ে। অপৰাধীক শাস্তি দিয়াৰ হাৰ ৰাজ্যখনৰ মাত্ৰ ২৪ শতাংশহে, যিটো দেশৰ ভিতৰতে নিম্ন বুলি তেওঁ দাবী কৰে। উল্লেখযোগ্য যে নেত্ৰীগৰাকীয়ে অহা বছৰৰ আগ ভাগতে নিৰ্বাচন হ’ব লগীয়া ৰাজ্যখনলৈ তিনি দিনীয়া ভ্ৰমণসূচীলৈ আহোতে এখন সভাত সাংবাদিকৰ আগত এই অভিযোগ কৰে।
