মেঘালয়ৰ শ্বিলংস্থিত উত্তৰ-পূবৰ এখন আগশাৰীৰ চিকিৎসা প্ৰতিষ্ঠান নৰ্থ-ইষ্টাৰ্ণ ইণ্ডিৰা গান্ধী ৰিজনেল ইনষ্টিটিউট অৱ হেল্থ এণ্ড মেডিকেল ছায়েন্সত কৰ্মচাৰীৰ গভীৰ নাটনি হোৱা বুলি জানিব পৰা গৈছে।
২০০৫ চনৰ পৰা আজিলৈ চিকিৎসা প্ৰতিষ্ঠানখনত শিক্ষক আৰু অন্যান্য বিভিন্ন পদত মুঠ ২০৭ টা পদ খালী হৈ আছে বুলি পূব জয়ন্তীয়া পাহাৰৰ উমকিয়াং গাঁৱৰ অধিবক্তা কিনজাইমন আমছেই কৰা এক আৰ টি আই তথ্যত প্ৰকাশ পাইছে।
অধিবক্তাজনে কৰা আবেদনৰ উত্তৰত আৰ টি আয়ে প্ৰতিষ্ঠানখনত প্ৰায় ২৭ টা শিক্ষক বিভাগৰ পদ খালী হৈ থকা বুলি জানিবলৈ দিয়ে।
এই সমূহৰ ভিতৰত ব্লাড বেংক, জেনেৰেল মেডিচিন, জেনেৰেল চাৰ্জাৰী, হস্পিটেল এডমিনিষ্ট্ৰেশ্যন, মেডিকেল অনক’লজী, নেফ্ৰ’লজী, অবষ্টেট্ৰিকছ আৰু গায়নাক’লজীত ১০ টা সহযোগী প্ৰফেছৰৰ পদ আৰু অন্যান্য বিভাগত মুঠ ১৭ টা সহকাৰী প্ৰফেছৰৰ পদ খালী হৈ আছে।
ইয়াৰ উপৰি আৰ টি আয়ে উক্ত চিকিৎসালয় প্ৰতিষ্ঠানখনত অন্যান্য শাখাতো প্ৰায় ২১ টা পদ খালী হৈ থকা বুলি সদৰী কৰে।
আনহাতে গ্ৰুপ বিত ৩৪ টা আৰু গ্ৰুপ চিত মুঠ ১০৮ টা পদ খালী হৈ থকাৰ কথাও উক্ত আৰ টি আইত প্ৰকাশ পায়।
চিকিৎসালয়খনত চিকিৎসকৰ অভাৱৰ বাবে বহুতো সময়ত ৰোগীসকল বিনা চিকিৎসায়ে ঘৰলৈ উভতি আহিবলগীয়া হয় বুলি আৰ টি আই কৰ্মীজনে গুৰুতৰ অভিযোগ উত্থাপন কৰে।
আনহাতে চিকিৎসালয় কৰ্তৃপক্ষই খালী হৈ থকা পদসমূহত স্থায়ী নিযুক্তি প্ৰদানৰ বিপৰীতে ঠিকাভিত্তিক পদত হে নিযুক্তি প্ৰদান কৰা বুলি মন্তব্য কৰে আৰ টি আই কৰ্মী আমছে। চিকিৎসালয় প্ৰতিষ্ঠানখনত বিভিন্ন বিভাগত বৰ্তমানলৈ সৰ্বমুঠ ৫১ গৰাকী ঠিকাভিত্তিক কৰ্মচাৰীয়ে চাকৰি কৰি আছে।
