“২০১০ চনত ঠিকাভিত্তিত যিসকল শিক্ষকক নিযুক্তি দিয়া হৈছিল, সেই সকলক পূৰ্বৰ শিক্ষা মন্ত্ৰীয়ে পৰিকল্পনাহীনভাৱে নিযুক্তি দিছিল। এইসকলৰ চাকৰি মই নিয়মীয়াকৰণ কৰিব নোৱাৰো। এই ৬৫০০গৰাকী শিক্ষকক বেতন দিবলৈ সামৰ্থ্য নাই বাবেই মই নিযুক্তি নিদিওঁ।” আজি এইদৰে কৈ পূৰ্বৰ শিক্ষা মন্ত্ৰীৰ দায়িত্বহীনতা উদঙাই দিয়ে শিক্ষা মন্ত্ৰী সিদ্ধাৰ্থ ভট্টাচাৰ্য্যই।
আজি বিশ্বনাথ মহাবিদ্যালয়ত উপস্থিত হৈ ৰাজ্যৰ শিক্ষা আৰু আইন মন্ত্ৰীজনে বিশ্বনাথ মহাবিদ্যালয়খনৰ প্ৰশাসনিক ভৱনৰ লগতে আন দুটা নিৰ্মাণকাৰ্য্য উদ্বোধন কৰাৰ সময়ত সাংবাদিকৰ আগত এইদৰে কয়। তেওঁ কয় যে পূৰ্বৰ শিক্ষা মন্ত্ৰীজনে এই শিক্ষকসকলক নিযুক্তি দিওঁতে প্ৰয়োজনীয় পৰিকল্পনাৰ মাজেৰে যোৱা নাছিল। ফলত এইসকলৰ বাবে পুঁজিৰ কোনো শিতান নাই।
উল্লেখযোগ্য যে তেতিয়া কংগ্ৰেছৰ চৰকাৰ আছিল যদিও বৰ্তমানৰ বিজেপি চৰকাৰৰ ক্ষমতাশালী মন্ত্ৰী ড০ হিমন্ত বিশ্ব শৰ্মাই শিক্ষা মন্ত্ৰী আছিল। আনকি কেইমাহ মানৰ আগলৈকে এইখন চৰকাৰৰো শিক্ষা মন্ত্ৰী হৈ আছিল ড০ হিমন্ত বিশ্ব শৰ্মা।
তাৎপৰ্য্যপূৰ্ণভাৱে হিমন্ত বিশ্ব শৰ্মা শিক্ষা মন্ত্ৰী হৈ থাকোতে ঘোষণা কৰা উচ্চতৰ মাধ্যমিক পৰীক্ষাত কৃতিত্বৰে উত্তীৰ্ণ নিৰ্ধাৰিত সংখ্যক মেধাৱী ছাত্ৰীক স্কুটি প্ৰদান সম্পৰ্কতো সিদ্ধাৰ্থ ভট্টাচাৰ্য্যই কয়, “মই স্কুটি নিদিওঁ। মই চাইকেল দিম। কাৰণ ১৮-১৯ বছৰীয়া কম বয়সীয়া এজনী ছোৱালীয়ে কেনেকৈ স্কুটি চলাব লাগে সেই বিষয়ে নাজানে বা গতিবেগৰ বিষয়ে নজনা হেতু বহু দুৰ্ঘটনাও সংঘটিত হৈছে।”
মন্ত্ৰীজনে জিলাখনৰ শিক্ষা মণ্ডলৰ বিষয়ববীয়াসকলৰ লগতে বিভিন্ন দল-সংগঠনৰ প্ৰতিনিধিৰ সৈতেও বিভিন্ন অভিযোগ সম্পৰ্কে আলোচনাত বহে। চলিত বিত্তীয় বৰ্ষতে বিশ্বনাথত এখন অভিযান্ত্ৰিক মহাবিদ্যালয়, এখন আই টি আই আৰু এখন বি এড কলেজৰ আধাৰশিলা স্থাপন কৰা হ’ব বুলি মন্ত্ৰীগৰাকীয়ে ঘোষণা কৰে।
আজি মন্ত্ৰী গৰাকীৰ লগত কেৱিনেট মন্ত্ৰী ৰঞ্জিত দত্ত, বিধায়ক প্ৰমোদ বৰঠাকুৰ, উৎপল বৰাও উপস্থিতি আছিল।