“আন্তৰ্জাতিক বজাৰত খাৰুৱা তেলৰ মূল্য যথেষ্ট কমি যোৱাৰ পাছতো ভাৰতত অস্বাভাৱিক হাৰত বৃদ্ধি পাই আছে পে’ট্ৰল-ডিজেলৰ দাম। আগত কংগ্ৰেছৰ চৰকাৰ চলি থকাৰ সময়ত খাৰুৱা তেলৰ মূল্য আন্তৰ্জাতিক বজাৰত আকাশলংঘী আছিল। কিন্তু ২০১৪ চনৰ নৱেম্বৰ মাহৰ পৰা এই মূল্য হ্ৰাস পায়। তেতিয়া প্ৰতি বেৰেলত ১০৯ ডলাৰ। কিন্তু এতিয়া ৫০-৫৫ ডলাৰ প্ৰতি বেৰেল খাৰুৱা তেলৰ মূল্য। তথাপিতো ভাৰতত পে’ট্ৰল-ডিজেলৰ মূল্যবৃদ্ধি হৈয়ে আছে।” -এই মন্তব্য অসম প্ৰদেশ কংগ্ৰেছৰ কমিটিৰ সভাপতি তথা ৰাজ্যসভাৰ সাংসদ ৰিপুণ বৰাৰ।
যোৱা আঠদিন ধৰি ক্ৰমাগতভাৱে পে’ট্ৰল-ডিজেলৰ মূল্যবৃদ্ধি হৈ থকাৰ প্ৰতিবাদ স্বৰূপে নিখিল ভাৰত কংগ্ৰেছ কমিটীৰ আহ্বান মৰ্মে সমগ্ৰ দেশৰ লগতে গুৱাহাটীত আজি অসম প্ৰদেশ কংগ্ৰেছে উলিওৱা প্ৰতিবাদী শোভাযাত্ৰাৰ সময়ত ৰিপুণ বৰাই এইদৰে কয়।
তাৎপৰ্য্যপূৰ্ণভাৱে, প্ৰদেশ কংগ্ৰেছৰ সভাপতিজনে ভাৰতৰ চুবুৰীয়া ৰাষ্ট্ৰ নেপাল, ভূটান, বাংলাদেশ, পাকিস্তান আদিত পে’ট্ৰল-ডিজেলৰ মূল্য বহু কম বুলি উল্লেখ কৰে। তাৰ বিপৰীতে ভাৰতত অত্যধিক মূল্যৰ জৰিয়তে গ্ৰাহকক মাধমাৰ শোধাই থকা বুলিও অভিযোগ কৰে।
ইয়াৰ উপৰি বিজেপি চৰকাৰে কৰ্প’ৰেট আৰু বণিক গোষ্ঠীক সুবিধা প্ৰদান কৰিবলৈ এইদৰে পে’ট্ৰল-ডিজেলৰ দাম অস্বাভাৱিক হাৰত বৃদ্ধি কৰি থকা বুলি ৰিপুণ বৰাই অভিযোগ উত্থাপন কৰে।
অসম প্ৰদেশ কংগ্ৰেছৰ ৫ শতাধিক নেতা-কৰ্মীয়ে এই প্ৰতিবাদী কাৰ্যসূচীটো ৰূপায়ণ কৰে। কংগ্ৰেছ নেতা-কৰ্মীসকলে ৰাজীৱ ভৱনৰ পৰা এক প্ৰতিবাদী সমদল উলিয়াই বিজেপি নেতৃত্বাধীন চৰকাৰখনৰ বিৰুদ্ধে শ্ল’গান দিয়াৰ লগতে মূল্যবৃদ্ধি ৰোধত ব্যৰ্থ হোৱা বাবে ধিক্কাৰ দিয়ে।
ইপিনে, সমদলটোত নিজে ৰিক্সা চলাই প্ৰতিবাদত ভাগ ল’লে প্ৰদেশ কংগ্ৰেছৰ সভাপতি ৰিপুণ বৰাই।
প্ৰতিবাদত অংশ লোৱা প্ৰদেশ কংগ্ৰেছৰ সাধাৰণ সম্পাদক অপূৰ্ব ভট্টাচাৰ্যই কয়, “বিজেপি চৰকাৰে ‘সবকা সাথ সবকা বিকাশ’ৰ কথা কয়, কিন্তু তেওঁলোকে সাধাৰণ জনতাৰ সমস্যাক সদায় উপলুঙা কৰি আহিছে।” তেওঁ লগতে এইখন চৰকাৰ কৰ্প’ৰেটৰ হৈ কাম কৰা এখন দৰিদ্ৰ বিৰোধী চৰকাৰ বুলিও অভিহিত কৰে।
পে’ট্ৰল-ডিজেলৰ মূল্যবৃদ্ধিৰ বিৰুদ্ধে ৰাইজক সজাগ কৰাৰ উদ্দেশ্যে কৰা এই প্ৰতিবাদত বিৰোধী দলপতি দেৱব্ৰত শইকীয়া, প্ৰাক্তন মন্ত্ৰী ৰকিবুল হুছেইন, বিধায়ক আব্দুল খালেক, জাকিৰ হুছেইন শিকদাৰ, প্ৰাক্তন সাংসদ দ্বিজেন শৰ্মাকে ধৰি দলটোৰ ভালেসংখ্যক নেতা-কৰ্মীয়ে অংশগ্ৰহণ কৰে।
