সৰ্বভাৰতীয় গ্ৰামীণ ডাকসেৱক সন্থাৰ আহ্বানমৰ্মে কেন্দ্ৰীয় চৰকাৰৰ ডাক বিভাগৰ গ্ৰামীণ ডাকসেৱকসকলে তেওঁলোকৰ বিভিন্ন সমস্যা সমাধানৰ দাবীত যোৱা ২২ মে’ৰ পৰা চলাই অহা অনিৰ্দিষ্টকালীন ধৰ্মঘট অব্যাহত আছে।
সৰ্বভাৰতীয় পৰ্যায়ৰ উক্ত ধৰ্মঘটৰ ফলত কালি নলবাৰী জিলাৰ টিহু উপ ডাকঘৰৰ কাম- কাজ দিনটোৰ বাবে স্তব্ধ হৈ পৰে। কালি পুৱা টিহু উপ ডাকঘৰৰ অধীনৰ অৰ্ধশতাধিক গ্ৰামীণ ডাকসেৱকে টিহু উপ-ডাকঘৰত সমৱেত হৈ ধৰ্মঘট কাৰ্যসূচী ৰূপায়ণ কৰি ইয়াৰ মূল প্ৰৱেশদ্বাৰত তলা লগাই দি কাম- কাজ স্তব্ধ কৰি দিয়ে। গ্ৰামীণ ডাকসেৱক সকলে আনকি বিভিন্ন শ্ল’গানেৰে কাৰ্যালয়টোৰ পৰিৱেশ উত্তাল কৰি তোলে।
তেওঁলোকে অভিযোগ কৰা মতে গ্ৰামীণ ডাকসেৱকসকলৰ বাবে সপ্তম দৰমহা আয়োগৰ প্ৰতিবেদন দাখিল হোৱাৰ দুবছৰ চাৰি মাহ পাৰ হৈ যোৱাৰ পাছতো হেমাহি কৰি আজি পৰ্যন্ত কেন্দ্ৰীয় চৰকাৰ তথা ডাক বিভাগে কাৰ্যকৰী কৰা নাই। ফলস্বৰূপে ডাকসেৱকসকলে পূৰ্বৰ নিৰিখৰ দৰমহাতে চলিব লগা হোৱাত কৰ্মচাৰীসকলৰ পানীত হাঁহ নচৰা অৱস্থাৰ সৃষ্টি হোৱা বুলিও তেওঁলোকে অভিযোগ কৰে।
আনহাতে কালি টিহু উপ-ডাকঘৰৰ কাম-কাজ স্তব্ধ হৈ পৰাত স্বাভাৱিকতে ডাকঘৰৰ গ্ৰাহকসকল চৰম অসুবিধাৰ সন্মুখীন হোৱা পৰিলক্ষিত হয়।
