মঙলবাৰে বাংলাদেশৰ এখন আদালতে দেশখনৰ প্ৰাক্তন প্ৰধানমন্ত্ৰী তথা বিএনপি নেত্ৰী বেগম খালেদা জিয়ালৈ গ্ৰেপ্তাৰী পৰোৱানা জাৰি কৰিছে। দুবছৰ আগতে চৰকাৰ বিৰোধী এক প্ৰতিবাদী কাৰ্যসূচীত ভাগ লোৱাৰ সময়ত সংঘটিত অগ্নিসংযোগৰ ঘটনাত তেওঁৰ বিৰুদ্ধে এই গ্ৰেপ্তাৰী পৰোৱানা জাৰি কৰা হৈছে।
কামিল্লা জিলা আদালতৰ দণ্ডাধীশ জয়নাব বেগমে মঙলবাৰে বেগম জিয়াৰ লগতে আন ৪৮ গৰাকী বিৰোধী সদস্যৰ বিৰুদ্ধে নিৰ্দেশটো জাৰি কৰে। আৰক্ষীয়ে দাবী কৰা অনুসৰি ২০১৫ চনত এখন বাছত আক্ৰমণ কৰাৰ ফলত আঠগৰাকী লোকৰ মৃত্যু হোৱা ঘটনাৰ বাবে বেগম জিয়া আৰু আনসকলেই দায়ী আছিল।
ঢাকাৰ আইনী বিশেষজ্ঞসকলে দাবী কৰা অনুসৰি বেগম জিয়া গ্ৰেপ্তাৰ হোৱাৰ সম্ভাৱনা নাই কিয়নো তেওঁ উচ্চ ন্যায়ালয় বা উচ্চতম ন্যায়ালয়ৰ পৰা প্ৰায়েই আইনী সুৰক্ষা লাভ কৰি আহিছে। গ্ৰেপ্তাৰী পৰোৱানা সম্পৰ্কে বিএনপিৰ পৰা কোনো বিবৃতি প্ৰকাশ কৰা নাই।
বাংলাদেশত ৰাজনৈতিক নাটকৰ অংশ ৰাজনৈতিক প্ৰতিশোধ হিচাপে বেগম জিয়াই দেশখনত এক ডজনতকৈয়ো অধিক গোচৰৰ সন্মুখীন হৈছে।
বিএনপিয়ে এই গোচৰসমূহক ৰাজনৈতিক অভিপ্ৰায়ৰ উদ্দেশ্যে তৰা বুলি অভিযোগ কৰিছে যদিও কোনো এটা গোচৰত তেওঁ দোষী সাব্যস্ত হ’লেই তেওঁ কোনো ৰাষ্ট্ৰীয় নিৰ্বাচনত প্ৰতিদ্বন্দিতা কৰিব নোৱাৰিব।
