বুধবাৰে বাইহাটা চাৰিআলিত অবিভক্ত কামৰূপ জিলা ভিত্তিত অসম গণ পৰিষদ দলৰ এখন মাণ্ডলিক সভা অনুষ্ঠিত হৈ যায়। ৰঙিয়া জিলা অগপৰ উদ্যোগত বাইহাটা চাৰিআলিস্থিত ৰাজহুৱা প্ৰেক্ষাগৃহত অনুষ্ঠিত সভাখনৰ সভাপতিত্ব কৰে অগপ দলৰ সাধাৰণ সম্পাদক তথা প্ৰাক্তন মন্ত্ৰী ডাঃ কমলা কলিতাই।
কমলপুৰ সমষ্টিৰ বিধায়ক সত্যব্ৰত কলিতাই আঁত ধৰা সভাখনত অগপৰ সাংগঠনিক ভেটি, পঞ্চায়ত নিৰ্বাচন আদি বিষয়ৰ ওপৰত বিস্তৃত ৰূপত আলোচনা কৰা হয়। এই সভাতে উপস্থিত থকা অগপৰ নেতা-কৰ্মীসকলে অসমৰ বাস্তৱতাক লৈয়ে অগপ দলক আগুৱাই লৈ যাব বুলি উল্লেখ কৰে।
ইয়াৰ উপৰি পঞ্চায়ত নিৰ্বাচন সম্পৰ্কত মিত্ৰতাক লৈ শংকিত হৈ থকা তৃণমূল পৰ্যায়ৰ কৰ্মীসকলক স্পষ্ট কৰি সভাত উপস্থিত থকা বক্তাসকলে আগন্তুক পঞ্চায়ত নিৰ্বাচন অকলে খেলিব বুলিও পুনৰ এবাৰ স্পষ্ট কৰি দিয়ে। তাৰোপৰি জিলা পৰ্যায়ৰ প্ৰতিনিধিসকলে কেন্দ্ৰীয় নেতৃত্বক উদ্দেশ্যি কয় যে যদি তৃণমূল কৰ্মীসকলৰ মতামতক প্ৰাধান্য দি দলে পঞ্চায়ত নিৰ্বাচনত অকলে প্ৰতিদ্বণ্ডিতা আগবঢ়াই তেন্তে যথেষ্ট ভাল ফল আশা কৰিব পাৰি।
বিজেপিয়ে জাতি-মাটি-ভেটি ধ্বংস কৰিছে বুলি ভাষণত জ্যেষ্ঠ নেতাসকলে মত ব্যক্ত কৰাৰ লগতে ৰাষ্ট্ৰীয় দলবিলাকে সদায় আঞ্চলিক দলসমূহক ধ্বংস কৰাৰ ষড়যন্ত্ৰত লিপ্ত থাকে বুলি অভিযোগ আনে।
আনহাতে সভাত আঞ্চলিকতাবাদ জীয়াই ৰখাৰ হকে দলৰ প্ৰতিজন কৰ্মীয়ে যুঁজিব লাগিব বুলি উল্লেখ কৰে। তদুপৰি পঞ্চায়ত নিৰ্বাচনত সংশ্লিষ্ট পঞ্চায়তখনৰ এলেকাধীন সমস্যাসমূহক গুৰুত্ব দিব লাগে বুলিও তেওঁলোকে ভাষণত উল্লেখ কৰে।
কালিৰ এই সভাত দলৰ মুখ্য সম্পাদক মনোজ শইকীয়া, সাধাৰণ সম্পাদক নুৰুল হুছেইন, অগপ নেতা জ্যোতিপ্ৰসাদ দাস, বিধায়ক গুণীন্দ্ৰ দাস, অসম যুৱ পৰিষদৰ সভাপতি সুনীল ডেকা, অসম মহিলা পৰিষদৰ কেন্দ্ৰীয় সম্পাদিকা দীপালী বৈশ্য, অসম কৃষক পৰিষদৰ সভাপতি দীপক সৰকাৰ, ডাঃ মনোৰঞ্জন দাস আৰু প্ৰাক্তন বিধায়ক অনন্ত ডেকাকে ধৰি গুৱাহাটী মহানগৰ, ৰঙিয়া, তামুলপুৰ, নলবাৰী, বজালী, বৰপেটা জিলা সমিতিসমূহৰ বিষয়ববীয়া, নেতা-কৰ্মী, সদস্যসকলে অংশগ্ৰহণ কৰা সভাখনত বক্তাসকলে আঞ্চলিকতাবাদী আদৰ্শ শক্তিশালী কৰাত গুৰুত্ব আৰোপ কৰে।
