সকলো কৌশল বাদ দি উত্তৰ কাছাৰ পাৰ্বত্য স্বায়ত্তশাসিত পৰিষদৰ সাধাৰণ নিৰ্বাচন সময়মতে অনুষ্ঠিত কৰাৰ কাৰণে চৰকাৰক দাবী জনাইছে অগপৰ কেন্দ্ৰীয় কমিটিৰ সাংগঠিনক সম্পাদক তথা উত্তৰ কাছাৰ পাৰ্বত্য স্বায়ত্তশাসিত পৰিষদৰ প্ৰাক্তন মুখ্য কাৰ্য্যবাহী দেৱজিত থাউচেনে।
উল্লেখযোগ্য যে অলপতে দিচপুৰত পাৰ্বত্য স্বায়ত্তশাসিত পৰিষদৰ নিৰ্বাচন সন্দৰ্ভত এক গুৰুত্বপূৰ্ণ বৈঠক অনুষ্ঠিত হৈছিল। এই বৈঠকত পৰিষদৰ কাৰ্যকাল বৃদ্ধি কৰাৰ কথাই গুৰুত্ব লাভ কৰে। যদিও ৰাজ্যিক নিৰ্বাচন আয়োগ নিৰ্বাচন অনুষ্ঠিত কৰাৰ কাৰণে সাজু হৈ আছে, গৃহ বিভাগৰ ফালৰ পৰা কোৱা হৈছে যে পঞ্চায়ত নিৰ্বাচন আৰু ৰাষ্ট্ৰীয় নাগৰিকপঞ্জী উন্নীতকৰণৰ সৈতে একে লগে হ’লে পৰিষদৰ নিৰ্বাচনত নিৰাপত্তাকৰ্মীৰ নাটনি আহিব। এই অজুহাতত পৰিষদীয় নিৰ্বাচন পৰোক্ষভাৱে পিছুওৱাৰ সিদ্ধান্ত লোৱা হয়।
মংগলবাৰে হাফলঙত এন ই নাওৰ লগত আছুতীয়া সাক্ষাৎকাৰত থাউচেনে এই সন্দৰ্ভত কয় যে চলিত বছৰৰ জুন মাহৰ ৩ তাৰিখে একাদশ উত্তৰ কাছাৰ পাৰ্বত্য স্বায়ত্ত শাসিত পৰিষদৰ কাৰ্যকাল শেষ হ’ব। সেই অনুসৰি তাৰ আগেয়েই নতুন নিৰ্বাচিত পৰিষদ গঠন হোৱা সাংবিধানিক নিয়ম।
বিজেপি দল আৰু বিজেপি শাসিত স্বায়ত্ত পৰিষদ নেতৃত্বই পৰিষদৰ কাৰ্যকাল বৃদ্ধি কৰাৰ কাৰণে যো-জা চলাই আছে। কিন্তু অগপ দলে কেতিয়াও গেৰুৱা দলৰ এই কৌশল মানি নলয়। প্ৰয়োজনত ন্যায়ালয়ৰ দ্বাৰস্থ হোৱাৰ হ’ব অগপ দল। থাউচেনে এইদৰে কয়।
লগতে তেওঁ কয় যে ডিমা হাচাও জিলাত বিজেপি দলৰ সামগ্ৰিক স্থিতি ভাল নহয়। অগপ দলৰ উত্থান দেখি শংকিত গেৰুৱা দলৰ নেতা-কৰ্মী সকল। কাৰণ অহা নিৰ্বাচনত অগপ দলে নিৰংকুশ সংখ্যাগৰিষ্ঠতা লৈ চৰকাৰ গঠন কৰিব। সেইকাৰণে এতিয়া নিৰ্বাচন অনুষ্ঠিত হ’লে বিজেপি দল মুখ থেকেচা খাব। যাৰ কাৰণে কাৰ্যকাল বৃদ্ধিৰ প্ৰস্তুতি চলি আছে।
উল্লেখনীয় যে ৰাজ্যত অগপ মিত্ৰজোঁটৰ চৰকাৰৰ সহযোগী দল হিচাপে আছে যদিও কিন্তু পাৰ্বত্য জিলাত অগপ দলটো বিজেপিৰ বিৰোধী শিবিৰতহে আছে। তেওঁৰ মতে অহা স্বায়ত্তশাসিত পৰিষদৰ নিৰ্বাচনত অগপ দলে অকলে নিৰ্বাচনত অবতীৰ্ণ হ’ব।
দেৱজিত থাউচেনে লগতে কয় যে বিজেপি চৰকাৰ পঞ্চায়ত নিৰ্বাচন আৰু ৰাষ্ট্ৰীয় নাগৰিকপঞ্জীৰ খচৰা প্ৰকাশৰ অজুহাতেৰে পৰিষদৰ নিৰ্বাচন অনুষ্ঠিত কৰাৰ পৰা বিৰত থকাৰ কৌশল একপ্ৰকাৰ চূড়ান্ত কৰি থৈছে। কাৰণ পঞ্চায়ত নিৰ্বাচন হ’লে ৰাজ্যজুৰি নিৰাপত্তা কৰ্মীৰ নাটনিয়ে দেখা দিব। আনহাতে ৰাষ্ট্ৰীয় নাগৰিকপঞ্জীৰ কাৰণ কটকটীয়া কৰিব লাগিব নিৰাপত্তা। কিন্তু থাউচেনে স্পষ্ট কৰি দি কয় যে ৰাষ্ট্ৰীয় নাগৰিকপঞ্জীৰ কাৰণে কোনোপধ্যেই নিৰ্বাচন স্থগিত ৰখাৰ প্ৰশ্ন উঠিব নোৱাৰে। পঞ্চায়ত নিৰ্বাচনৰ কাৰনে ছমাহ কিয় পৰিষদৰ কাৰ্যকাল বৃদ্ধি কৰা হ’ব বুলিও তেওঁ প্ৰশ্ন কৰে।
ইপিনে উত্তৰ কাছাৰ পাৰ্বত্য স্বায়ত্ত শাসিত পৰিষদৰ এগৰাকী কাৰ্য্যবাহী সদস্যৰ ভাষ্য অনুসৰি পৰিষদৰ নিৰ্বাচন অনুষ্ঠিত হ’ব নে নহয় এতিয়ালৈকে স্পষ্ট হোৱা নাই।
