মৰিগাঁৱৰ বিদেশী ন্যায়াধিকৰণে বিদেশী বুলি ঘোষণা কৰা ৩৯টা পৰিয়ালৰ নাম ৰাষ্ট্ৰীয় নাগৰিকপঞ্জীৰ চূড়ান্ত খচৰাত অন্তৰ্ভুক্ত হোৱা ঘটনাৰ পাছত ইয়াক লৈ উদ্বেগ প্ৰকাশ কৰে অসম গণ পৰিষদে।
এই সন্দৰ্ভত সোমবাৰে দলৰ কাৰ্যকৰী সভাপতি তথা মন্ত্ৰী কেশৱ মহন্তৰ নেতৃত্বত যোৱা এটা প্ৰতিনিধি দলে এন আৰ চিৰ ৰাজ্যিক সমন্বয়ক প্ৰতীক হাজেলাক সাক্ষাৎ কৰে।
ইয়াৰ পাছতেই দলটোৰ আমবাৰীস্থিত মুখ্য কাৰ্যালয়ত এখন সংবাদমেল সম্বোধন কৰি মহন্তই কয়, “আমি এখন নিখুঁত, বিদেশীৰ নামমুক্ত এন আৰ চি প্ৰস্তুত হোৱাটো বিচাৰো। কিন্তু মৰিগাঁৱৰ বিদেশী ন্যায়াধিকৰণে বিদেশী বুলি ঘোষণা কৰা ৩৯টা পৰিয়ালৰ লোকসকলৰ নাম এন আৰ চিৰ চূড়ান্ত খচৰাত অন্তৰ্ভুক্ত হৈছে। এই তথ্য আৰু অভিযোগসমূহে স্পষ্ট কৰে যে এন আৰ চিৰ চূড়ান্ত খচৰাত নাম থকাসকলৰ ভিতৰত বিদেশী নাগৰিকৰ নাম থাকিল।”
অগপৰ প্ৰতিনিধি দলটোৱে প্ৰতীক হাজেলাক সাক্ষাৎ কৰি এন আৰ চিৰ দ্বিতীয়খন খচৰা পূনৰীক্ষণৰ আহ্বান জনোৱা বুলি কেশৱ মহন্তই প্ৰকাশ কৰে।
“ৰাষ্ট্ৰীয় নাগৰিকপঞ্জী উন্নীতকৰণৰ নীতিত সন্নিৱিষ্ট ধাৰা অনুসৰি এন আৰ চিৰ খচৰাৰ suo moto scrutiny হ’ব লাগে। ইয়াৰ পাছত cross scrutiny হ’ব লাগে, অৰ্থাৎ আগৰ যিজন বিষয়া আছিল তেওঁৰ দ্বাৰা নহয়, বেলেগ এজন বিষয়াৰ দ্বাৰা পুনৰীক্ষণ কৰি এই খচৰাখন বিদেশীৰ নামমুক্ত কৰিব লাগে। আমি প্ৰতীক হাজেলাক অসম গণ পৰিষদ দলৰ ফালৰ পৰা এইখিনি কথা ব্যক্ত কৰিছো।”, কেশৱ মহন্তই কয়।
দলটোৰ ফালৰ পৰা প্ৰকাশ কৰা অনুসৰি বিদেশী নাগৰিকৰ নাম এন আৰ চিৰ খচৰাত অন্তৰ্ভুক্ত হ’লে দাবী, আপত্তি আৰু সংশোধনী আৱেদন কৰাৰ ৱ্যৱস্থা ৰখা হৈছে যদিও ই ফলদায়ক হোৱাটো কঠিন। গতিকে এখন বিদেশীৰ নামমুক্ত এন আৰ চিৰ স্বাৰ্থত এই বিশেষ ব্যৱস্থা গ্ৰহণৰ বাবে অসম গণ পৰিষদে আহ্বান জনোৱা বুলি মহন্তই জানিবলৈ দিয়ে।
তেওঁ লগতে কয়, “ৰাষ্ট্ৰীয় নাগৰিকপঞ্জীখন অসমত থকা ভাৰতীয় নাগৰিকৰ স্বাৰ্থত, ভাৰতীয় নাগৰিকক লৈ উন্নীতকৰণ কৰা হৈছে। গতিকে প্ৰতিজন ভাৰতীয় নাগৰিকৰ নাম ৰাষ্ট্ৰীয় নাগৰিকপঞ্জীত থাকিব লাগিব।”
আনহাতে এন আৰ চিৰ চূড়ান্ত খচৰাত বাদ পৰা ৪০,০৭,৭০৭জন লোকৰ প্ৰসংগত তেওঁ এজনো প্ৰকৃত ভাৰতীয় নাগৰিক যাতে এন আৰ চিৰ পৰা বাদ নপৰে তাৰ বাবে অতি শক্তিশালী ব্যৱস্থা গ্ৰহণ কৰাৰ বাবে আহ্বান জনায়।
অগপৰ প্ৰতিনিধি দলটোত কেশৱ মহন্তৰ উপৰি ফণীভূষণ চৌধুৰী, বীৰেন্দ্ৰ প্ৰসাদ বৈশ্য, কমলা কলিতা, সত্যব্ৰত কলিতা আৰু মনোজ শইকীয়াও আছিল।
