কন্যা শ্বীনা বৰাৰ হত্যাকাণ্ডৰ মূল অভিযুক্ত ইন্দ্ৰানী মুখাৰ্জীয়ে তেওঁৰ স্বামী পিটাৰ মুখাৰ্জীৰ পৰা বিবাহ বিচ্ছেদ বিচাৰিছে। বাইকুলা মহিলা কাৰাগাৰাত কয়েদী হিচাপে থকা ৪৬ বছৰীয়া ইন্দ্ৰানী মুখাৰ্জীয়ে গোচৰটোৰ সহ-অভিযুক্ত তথা তেওঁৰ স্বামী পিটাৰ মুখাৰ্জীলৈ এখন আইনী জাননী প্ৰেৰণ কৰিছে।
জাননীখনত কোৱা হৈছে যে তেওঁলোকৰ বিবাহ অপৰিৱৰ্তনীয়ভাৱে ভাগি যোৱাৰ বাবে তেওঁ বিবাহ বিচ্ছেদ বিচাৰিছে। বিবাহ বিচ্ছেদৰ প্ৰক্ৰিয়া যাতে আৰম্ভ কৰিব পৰা যায় তাৰ বাবে এক সৌহাৰ্দ্যমূলক বিত্তীয় মীমাংসাও বিচৰা হৈছে। অহা ৩০ এপ্ৰিলৰ ভিতৰত পিটাৰ মুখাৰ্জীৰ পৰা এই বিষয়ত জাননীখনৰ জৰিয়তে উত্তৰ বিচৰা হৈছে।
৬৪ বছৰীয়া পিটাৰ মুখাৰ্জী বৰ্তমান আৰ্থাৰ ৰোডৰ কাৰাগাৰত কাৰাবাস খাটি আছে। তীব্ৰ চাঞ্চল্যৰ সৃষ্টি কৰা শ্বীনা বৰাক হত্যা কৰাৰ অপৰাধত মাতৃ ইন্দ্ৰানী মুখাৰ্জীৰ সৈতে ইন্দ্ৰানীৰ স্বামী পিটাৰো অভিযুক্ত হৈছিল।
ইন্দ্ৰানী মুখাৰ্জীয়ে এজন অধিবক্তাৰ জৰিয়তে যোৱা ২৫ এপ্ৰিলত পিটাৰলৈ বিবাহ বিচ্ছেদৰ জাননী প্ৰেৰণ কৰিছে।