বোকাখাতত বৃদ্ধা শ্ৰমিকৰ কষ্টোপাৰ্জিত ধন জালিয়াতিৰে বেংকৰ পৰা আত্মসাৎ কৰা দুৰ্বৃত্তক জে’ললৈ
বোকাখাত মহকুমাৰ লখৌজান চাহ বাগিচাৰ এগৰাকী বৃদ্ধা শ্ৰমিকৰ ভৱিষ্যৎ নিধিৰ ধন বেংকৰ পৰা জালিয়াতিৰে আত্মসাৎ কৰাৰ এক ঘটনাই সম্প্ৰতি বোকাখাতত চাঞ্চল্যৰ সৃষ্টি কৰিছে ৷
উল্লেখযোগ্য যে লখৌজান চাগ বাগিচাৰ সাধ মুড়া নামৰ স্থায়ী শ্ৰমিক গৰাকীয়ে ২০১৫ চনৰ ডিচেম্বৰ মাহত অৱসৰ গ্ৰহণ কৰে ৷ অৱসৰ গ্ৰহণৰ পাচত মহিলা শ্ৰমিক গৰাকীয়ে লাভ কৰা ভৱিষ্যৎ নিধিৰ ২ লাখ ৮৮ হেজাৰ ৯১০ টকা ইউনাইটেড বেংকৰ বোকাখাত শাখাৰ নিজা একাউণ্টত জমা থয়।
কিন্তু শেহতীয়াভাৱে ধন উলিয়াবলৈ সাধ মুড়া বেংকলৈ যোৱাত বেংক কৰ্তৃপক্ষই তেওঁৰ একাউণ্টত কোনো ধন নাই বুলি নিৰক্ষৰ সাধ মুড়াক জানিবলৈ দিয়ে ৷ উপায়হীন হৈ সাধ মুড়াই বিষয়টো চাহ জনজাতি ছাত্ৰ সন্থাক অৱগত কৰাত ছাত্ৰ সংগঠনটোয়ে ১১ জুলাইত ইউনাইটেড বেংকৰ বোকাখাত শাখাত উপস্থিত হৈ ঘটনাৰ অনুসন্ধান কৰে।
স্থানীয় সাংবাদিকৰ সহযোগত চলোৱা এই অনুসন্ধানত বিগত সময়ত সাধ মুড়াৰ একাউণ্টৰ পৰা ১ লাখ, ৮০ হেজাৰ আৰু ৫০ হেজাৰ টকা উলিয়াওঁতে বোকাখাত গড়মুৰ গাঁৱৰ ৰাতুল বৰুৱাই সাক্ষী হিচাপে উইড্ৰল ফৰ্মত স্বাক্ষৰ কৰাৰ কথা পোহৰলৈ আহে ৷
ইফালে ৰাতুল বৰুৱা বেংকলৈ আহি উইড্ৰল ফৰ্মত সাক্ষী হিচাপে স্বাক্ষৰ প্ৰদানৰ কথা স্বীকাৰ কৰাৰ পাচত ঘটনা সম্পৰ্কত সাধ মুড়াই বোকাখাত আৰক্ষী থানাত এখন এজাহাৰ দাখিল কৰে ৷
বৃদ্ধ গৰাকীৰ এজাহাৰৰ ভিত্তিত বোকাখাত আৰক্ষী গৈ বেংকত উপস্থিত হৈ সাক্ষী হিচাপে স্বাক্ষৰ প্ৰদান কৰা ৰাতুল বৰুৱাক থানালৈ অনাৰ উপৰিও সাধ মুণ্ডাৰ একাউণ্টৰ যাৱতীয় কাগজ-পত্ৰ বেংকৰ পৰা জব্দ কৰে ৷
লগতে ৰাতুল বৰুৱাৰ স্বীকাৰোক্তিৰ আধাৰত বোকাখাত আৰক্ষীয়ে যোৱা নিশা সাধ মুড়াৰ ভতিজাক পেচাত ৰাজমিস্ত্ৰী বোকাখাতৰ গড়মুৰ বৰটিকাৰ নিৱাসী সুজিত মুড়াক আটক কৰে ৷
আৰক্ষীৰ জেৰাত সুজিত মুড়াই সাধ মুড়াৰ বেংক একাউণ্টৰ পৰা জাল চহী আৰু ৰাতুল বৰুৱাৰ স্বাক্ষৰৰ জৰিয়তে সমুদায় ধন আত্মসাৎ কৰাৰ কথা স্বীকাৰ কৰে ৷ ফলত বোকাখাত আৰক্ষীয়ে আজি বোকাখাত আদালতত থিয় কৰা সুজিত মুড়াক জেল হাজোতলৈ প্ৰৰণ কৰে ৷
