অসম জাতীয়তাবাদী যুৱ ছাত্ৰ পৰিষদ, নৰ্ডান ৰেঞ্জৰ তথা বন বিভাগৰ সহযোগত অসম গৌৰৱ এশিঙীয়া গঁড় হত্যাৰ বিৰুদ্ধে তথা সজাগতা সৃষ্টি কৰাৰ বাবে অসম জাতীয়তাবাদী যুৱ ছাত্ৰ পৰিষদ বিশ্বনাথ জিলা সমিতিৰ সদস্য বসন্ত দাসে আজি এক ব্যতিক্ৰমী পদক্ষেপ গ্ৰহণ কৰা পৰিলক্ষিত হয়।
ব্ৰহ্মপুত্ৰৰ বুকুত ২০ কি.মি দুৰত্ব সাঁতুৰি গঁড় হত্যা ৰোধ কৰাৰ বাবে সজাগতা সৃষ্টি কৰাৰ প্ৰয়াস কৰে এইজন যুৱকে। এই সাহসী পদক্ষেপত তেওঁক সহযোগ কৰে এছ ডি আৰ এফ বাহিনীয়ে।
১ এপ্ৰিলৰ পুৱা ৯:৩০ বজাৰ পৰা অৰ্থাৎ আজি ব্ৰহ্মপুত্ৰ পূব মণ্ডলৰ পৰা বিশ্বনাথ ঘাটলৈ বসন্ত দাসে আৰম্ভ কৰে এই যাত্ৰা | বসন্ত দাসে সাঁতুৰি থকা অৱস্থাতে বিভিন্ন লোকবাদ্য বজাই এই দুৰত্ব অতিক্ৰম কৰে। এই আশ্চৰ্যজনক আৰু সাহসীকতাৰ মাজৰে দাঙি ধৰা ব্যতিক্ৰমী প্ৰচেষ্টাক সকলো লোকে ধন্যবাদ জ্ঞাপন কৰে বসন্ত দাসক।
উল্লেখ্য যে আন্তঃৰাষ্ট্ৰীয় পৰ্যায়ত এশিঙীয়া গঁড়ৰ বাবে বিখ্যাত অসম। এই বিষয়ে সকলো জ্ঞাত যদিও বিগত কিছু বছৰৰ পৰা ক্ৰমান্বয়ে বৃদ্ধি পাবলৈ ধৰা গঁড় হত্যাৰ বাবে এই সংকট বৃদ্ধি পোৱাৰ লগতে প্ৰকৃতি প্ৰেমীৰ বাবে এয়া এক চিন্তনীয় বিষয় হৈ পৰিছে।
সমগ্ৰ অসমৰ লগতে আন্তৰাষ্ট্ৰীয় প্ৰেক্ষাপটতো গঁড় হত্যাৰ ঘটনা এক চৰ্চাৰ বিষয় হৈ পৰা পৰিলক্ষিত হৈছে। ৰাজ্যৰ সৰ্বত্ৰে বহু প্ৰতিবাদ হ’ল, মুখ্য মন্ত্ৰী তথা প্ৰধান মন্ত্ৰীলৈ প্ৰেৰণ কৰা হ’ল বহু স্মাৰক পত্ৰ। তথাপিও ইয়াৰ কোনো সুফল লাভ কৰা দেখা নগ’ল। কিন্তু ইয়াৰ মাজতে বিশ্বনাথৰ এই যুৱকজনৰ সাহসিকতা তথা আন্তৰিক প্ৰচেষ্টাক সকলোৱে শলাগ লোৱা দেখা গৈছে |
